ఐఫోన్ కొనేందుకు,,,8 నెలల బాలుడిని విక్రయించిన తల్లిదండ్రులు

చాలా మంది పేదవారు తాము బతకడానికి తమ పిల్లల్ని విక్రయిస్తూ ఉంటారు. ఇలా పిల్లల్ని అమ్ముకోవడం నేరం అని తెలిసినా.. వారి ఆర్థిక పరిస్థితి, పుట్టిన పిల్లలను పెంచే స్థోమత లేకపోవడంతో వారిని పిల్లలు లేని వారికి విక్రయించి.. వచ్చిన డబ్బుతో కడుపు నింపుకుంటారు. అయితే ఇలాంటి వారిని చాలామందిని మనం చూస్తూ ఉంటాం. ఇలా విక్రయిస్తూ అధికారులు, పోలీసులకు దొరికిపోయిన వారిని కూడా మనం చూశాం. ఇక ఇప్పుడు చెప్పబోయే జంట మాత్రం దేనికోసం కొడుకును విక్రయించిందో తెలిస్తే ఆశ్చర్యపోతారు. ఖరీదైన ఐఫోన్ కొనాలనే అత్యాశతో వారు అభం శుభం తెలియని 8 నెలల కుమారుడిని విక్రయించారు. అనంతరం 7 ఏళ్ల కుమార్తెను కూడా అమ్మేందుకు సిద్ధమయ్యారు. అయితే ఈ విషయం పోలీసులకు తెలియడంతో నిందితులను అరెస్ట్ చేశారు.

అయితే వీరు బాబును విక్రయించడానికి అసలు కారణం ఐఫోన్ కోసం. అయితే ఆ ఫోన్ తీసుకోవడానికి కారణం రీల్స్ చేయడం కోసం. ఈ మధ్య కాలంలో ఎక్కడ చూసినా వీడియోలు, రీల్స్ తీసేవారి సంఖ్య భారీగా పెరుగుతోంది. రీల్స్ మాయలో పడి ప్రమాదకర స్టంట్‌లు చేస్తూ చనిపోయిన వారిని, గాయపడిన వారిని మనం చూస్తూనే ఉన్నాం. అలాగే ఈ జంట కూడా ఇలాంటి రీల్స్ కోసమే కుమారుడిని విక్రయించింది. అయితే ఈ ఘటన పశ్చిమ బెంగాల్‌లోని ఉత్తర 24 పరగణాల జిల్లాలో జరిగింది. పానిహటి గాంధీనగర్ ప్రాంతంలో నివసించే జయ్‌దేవ్, సాథి అనే జంటకు ఇద్దరు సంతానం. కుమార్తె వయసు 7 ఏళ్లు కాగా.. కుమారుడి వయసు 8 నెలలు.

అయితే జయ్‌దేవ్, సాథి కుటుంబం పేదరికంతో బాధపడుతుండగా.. ఇటీవల వారి జీవన విధానం పూర్తిగా మారిపోయింది. ఐఫోన్ కొనడమే కాకుండా రాష్ట్రంలోని పలు ప్రాంతాల్లో తిరిగి వీడియోలు కూడా చేశారు. దీంతో అనుమానం వచ్చి.. పొరుగింటి వారు ప్రశ్నించగా.. తమ కుమారుడిని విక్రయించినట్లు చెప్పారు. ఈ విషయాన్ని వారు పోలీసులకు చెప్పడంతో అసలు విషయంవెలుగులోకి వచ్చింది. రంగంలోకి దిగిన పోలీసులు.. వారు ఇచ్చిన సమాచారం ఆధారంగా ఖార్దా ప్రాంతంలోని ఓ మహిళ వద్ద 8 నెలల వయసున్న వారి కుమారుడిని స్వాధీనం చేసుకున్నారు. అనంతరం జయ్‌దేవ్‌తోపాటు బాబును కొనుగోలు చేసిన మహిళను పోలీసులు అరెస్ట్ చేశారు. ఈ కేసులో లోతుగా రకరకాల కోణాల్లో దర్యాప్తు సాగిస్తున్నామని పోలీసులు వెల్లడించారు.

బాబును విక్రయించిన తర్వాత జయ్‌దేవ్, సాథిలు జీవించే విధానం ఒక్కసారిగా మారిపోయింది. వారు పశ్చిమ బెంగాల్‌లోని వివిధ ప్రాంతాల్లో పర్యటించి.. రీల్స్ చేసినట్లు పోలీసులు గుర్తించారు. అయితే తర్వాత వారి కుమార్తె అయిన 7 ఏళ్ల బాలికను కూడా ఈ శనివారం విక్రయించడానికి జయ్‌దేవ్ సిద్ధమైనట్లు పోలీసుల విచారణలో తేలింది. మరిన్ని డబ్బుల కోసం ఆశపడి వారు ఈ దారుణానికి పాల్పడేందుకు యత్నించినట్లు గుర్తించారు.