సెలవుల కోసం ఇంటికొచ్చిన జవాన్ మిస్సింగ్.. కారులో చెప్పులు, రక్తపు మరకలు

సెలవుపై ఇంటికొచ్చిన ఓ జవాను అదృశ్యమైన ఘటన కశ్మీర్‌లో కలకలం రేపుతోంది. ఆయన వాహనంలో రక్తపు మరకలు ఉండటంతో కుటుంబసభ్యులు ఆందోళన చెందుతున్నారు. దక్షిణ కశ్మీర్‌లోని కుల్గాం జిల్లా అచతల్ ప్రాంతానికి చెందిన 25 ఏళ్ల సైనికుడు జావెద్ అహ్మద్ వనీ గత రాత్రి 8 గంటల సమయంలో ఇంటి నుంచి బయటకు వచ్చి అదృశ్యమయ్యాడు. ఆయన వాహనం పరన్‌హాల్ సమీపంలో లభ్యమైంది. సమాచారం అందుకున్న వెంటనే సైన్యం రంగంలోకి దిగింది. జావెద్ కోసం ఆర్మీ అధికారులు సెర్చ్ ఆపరేషన్ ప్రారంభించారు.

జమ్మూ కశ్మీర్ లైట్ ఇన్‌ఫాంట్రీ రెజ్మెంట్‌కు చెందిన జవాన్ జావెద్ అహ్మద్ వనీ.. ఈద్ కోసం సెలవుపై ఇంటికి వచ్చాడు. అతడు ఆదివారం ఉదయం తిరిగి విధుల్లో చేరాల్సి ఉంది. అయితే, శనివారం రాత్రి సరుకులు తెచ్చేందుకు తన కారులో చౌవల్‌గామ్ వెళ్లిన జావెద్ ఎంతకూ తిరిగి రాకపోవడంతో కుటుంబ సభ్యులు ఆందోళన చెందారు. ఆయన కోసం చుట్టుపక్కల గ్రామాల్లో గాలించగా.. పరన్‌హల్ గ్రామంలో ఆయన కారును గుర్తించారు. వాహనం లాక్ చేసి ఉండగా లోపల అతడి చెప్పులు, రక్తపు మరకలు కనిపించాయి. జావెద్ కిడ్నాప్‌పై సమాచారం అందుకున్న ఆర్మీ చుట్టుపక్కల గ్రామాల్లో పెద్ద ఎత్తున గాలింపు చర్యలు చేపట్టారు.

ఘటనపై కేసు నమోదుచేసిన కశ్మీర్ పోలీసులు.. కొందరు అనుమానితులను అదుపులోకి తీసుకున్నారు. జావెద్‌ను ఉగ్రవాదులే కిడ్నాప్ చేసి ఉంటారని కుటుంబసభ్యులు అనుమానిస్తున్నారు. ఈ నేపథ్యంలో తన కుమారుడ్ని వదలిపెట్టాలని, సైన్యంలో అతడు మళ్లీ పనిచేయడని పేర్కొంటూ సైనికుడి తల్లి ఓ వీడియో స్టేట్‌మెంట్ విడుదల చేశారు. ‘దయచేసి మమ్మల్ని క్షమించండి.. నా కొడుకు విడిచిపెట్టండి.. నా జావెద్‌ను వదిలిపెట్టండి.. నేను అతన్ని ఆర్మీలో పని చేయనివ్వను కానీ దయచేసి అతన్ని విడుదల చేయండి’ అని ఆమె వేడుకున్నారు.

సైనికుడి తండ్రి మహ్మద్ ఆయూబ్ వనీ మాట్లాడుతూ..‘నా కొడుకు లడఖ్‌లో విధులు నిర్వర్తిస్తున్నాడు... అతడు ఈద్ తర్వాత ఇంటికి వచ్చాడు.. రేపు తిరిగి డ్యూటీలో చేరాల్సి ఉంది. కొన్ని వస్తువులను కొనడానికి నిన్న సాయంత్రం ఇంటి నుంచి మార్కెట్‌కు బయలుదేరాడు. అతడిని కొందరు వ్యక్తులు అడ్డుకుని కిడ్నాప్ చేశారు. నేను వారికి విజ్ఞప్తి చేస్తున్నాను.. దయచేసి నా కొడుకును విడుదల చేయండి’అని అభ్యర్థించాడు. కాగా, గతంలోనూ ఈ విధంగా సెలవులపై వచ్చిన సైనికులను ఉగ్రవాదులు అపహరించి, దారుణంగా హత్య చేసిన ఘటనలు చోటుచేసుకున్నాయి.