భార్య మౌనికతో కలిసి టీడీపీ అధినేతతో భేటీకానున్న హీరో మంచు మనోజ్

తెలుగుదేశం పార్టీ జాతీయ అధ్యక్షుడు నారా చంద్రబాబు నాయుడిని ఈరోజు సినీ హీరో మంచు మనోజ్ కలవబోతున్నట్టు సమాచారం. ఈరోజు సాయంత్రం భార్య మౌనికతో కలిసి మంచు మనోజ్.. చంద్రబాబుతో భేటీ కానున్నట్టు విశ్వసనీయ వర్గాలు చెబుతున్నాయి. అంతేకాదు, మనోజ్ టీడీపీలో చేరబోతున్నారనే ప్రచారం కూడా ఊపందుకుంది. కానీ, ఈరోజు సాయంత్రం చంద్రబాబుతో మనోజ్ భేటీ అనంతరమే ఆయన పార్టీలో చేరే ప్రచారంపై ఒక స్పష్టత వస్తుంది.

మంచు మనోజ్ భార్య మౌనిక.. దివంగత టీడీపీ నాయకుడు భూమా నాగిరెడ్డి కుమార్తె అన్న విషయం తెలిసిందే. మౌనిక సోదరి భూమా అఖిలప్రియ ప్రస్తుతం టీడీపీలోనే ఉన్నారు. చంద్రబాబు హయాంలో మంత్రిగా కూడా పనిచేశారు. మరోవైపు, మంచు మనోజ్ తండ్రి మోహన్ బాబు వైసీపీకి మద్దతుదారుడుగా ఉన్నారు. ఆయన సోదరుడు విష్ణు భార్య విరానికా.. ఏపీ సీఎం వైఎస్ జగన్ మోహన్ రెడ్డికి సమీప బంధువు. ఈ నేపథ్యంలో చంద్రబాబుతో మంచు మనోజ్ భేటీ ప్రాధాన్యత సంతరించుకుంది.

వాస్తవానికి మంచు మనోజ్ టీడీపీలో చేరబోతున్నారని గతేడాది సెప్టెంబర్‌లోనే ప్రచారం జరిగింది. భూమా మౌనికారెడ్డిని మనోజ్ పెళ్లాడబోతున్నారనే వార్త బయటికి రాగానే మంచు మనోజ్ టీడీపీలో చేరబోతున్నారనే వార్త కూడా వైరల్ అయ్యింది. మంచు మనోజ్ టీడీపీలో చేరబోతున్నారంటూ కాంగ్రెస్ పార్టీ సీనియర్ నాయకుడు, మాజీ ఎమ్మెల్యే గోనె ప్రకాష్ రావు ఆ మధ్య ఒక ఇంటర్వ్యూలో చెప్పారు.

మోహన్ బాబుకు రాజకీయాలు అంటే ఆసక్తి అని.. వైసీపీ అధికారంలోకి రావడంతో తనకు రాజ్యసభ సభ్యుడిగా అవకాశం ఇస్తారని ఆయన ఆశించారని.. కానీ ఆయన ఊహించినట్టు జరగలేదని గోనె ప్రకాష్ రావు చెప్పారు. ఇక మోహన్ బాబుకి వయసు కూడా పైబడింది కాబట్టి మంచు మనోజ్ రాజకీయాల్లోకి రావచ్చన్నారు. అంతేకాదు, మంచు మనోజ్ చంద్రగిరి నియోజకవర్గం నుంచి పోటీ చేసే అవకాశముందని ప్రకాష్ రావు అభిప్రాయపడ్డారు.

చంద్రగిరిలో వైఎస్సార్ కాంగ్రెస్ పార్టీ తరఫున చెవిరెడ్డి భాస్కర్ రెడ్డి సిట్టింగ్ ఎమ్మెల్యేగా ఉన్నారని.. ఆయనకు పోటీ ఇచ్చే గట్టి అభ్యర్థి టీడీపీలో లేరని.. చంద్రగిరి నుంచి టీడీపీ తరఫున గెలవడం కూడా అంత సులభం కాదని ప్రకాష్ రావు అన్నారు. చంద్రబాబు సైతం ఒకసారి చంద్రగిరి నుంచి గెలిచి.. ఆ తరవాత ఓడిపోవడంతో కుప్పంకి మారిపోయారన్నారు. అయినప్పటికీ చెవిరెడ్డి భాస్కర్ రెడ్డి మీద మంచు మనోజ్ పోటీ చేసే అవకాశం ఉందని జోష్యం చెప్పారు. మరి గోనె ప్రకాష్ రావు చెప్పింది నిజం అవుతుందా? మంచు మనోజ్ టీడీపీలో చేరి చంద్రగిరి నుంచి ఎమ్మెల్యేగా పోటీచేస్తారా? చూద్దాం!.