ఎవ‌రీ మోనూ మ‌నేస‌ర్‌.. హ‌ర్యానా మతఘర్షణలతో సంబంధం ఏంటి

హర్యానాలో చెలరేగిన మత ఘర్షణలు తీవ్ర విధ్వంసాన్ని కలిగిస్తున్నాయి. కార్లు, వాహనాలు, దేవాలయాలు, మసీదులు ధ్వంసం అవుతున్నాయి. విశ్వహిందూ పరిషత్ ఆధ్వర్యంలో నుహ్ జిల్లాలో సోమవారం నిర్వహించిన శోభాయాత్రలో ఈ అల్లర్లు చోటు చేసుకున్నాయి. ఇప్పటివరకు ఇద్దరు పోలీసులు సహా నలుగురు చనిపోగా.. 200 మందికిపైగా గాయపడినట్లు తెలుస్తోంది. అయితే ఈ ఘర్షణలకు ప్రధాన కారణం భజరంగ్ దళ్‌కు చెందిన మోనూ మ‌నేస‌ర్ అని తెలుస్తోంది. ఈ క్రమంలోనే మోనూ పనేసర్ ఎవరు అనేది తీవ్ర చర్చనీయాంశంగా మారింది. నుహ్‌‌లో జరుగుతున్న శోభాయాత్రకు మోనూ పనేసర్ వస్తున్నాడని తెలియడంతోనే మొదట వివాదం చెలరేగినట్లు తెలుస్తోంది.

మరోవైపు.. హర్యానాలో చెలరేగిన మత ఘర్షణల్లో ఇప్పటివరకు ఇద్దరు హోంగార్డులు సహా నలుగురు మృత్యువాత పడ్డారు. ఈ ఘటనల్లో 200 మందికి పైగా గాయాలపాలైనట్లు తెలుస్తోంది. వందలాది వాహనాలు, కార్లకు.. నిరసనకారులు నిప్పంటించారు. ఈ ఘటనతో ఒక్కసారిగా హర్యానాలో శాంతిభద్రతలు దెబ్బతిన్నాయి. హర్యానా ముఖ్యమంత్రి మనోహర్ లాల్ ఖట్టర్.. ప్రజలు శాంతి, సామరస్యాలతో ఉండాలని పిలుపునిచ్చారు. ఈ మత ఘర్షణలకు కారణమైన వారిని ఎట్టి పరిస్థితుల్లో వదిలిపెట్టమని స్పష్టం చేశారు. మరోవైపు.. నుహ్ జిల్లా కమిషనర్ కార్యాలయంలో ఇరువర్గాలకు చెందిన నేతలతో శాంతి కమిటీ సమావేశం నిర్వహించారు.

హ‌ర్యానాలోని నుహ్ జిల్లాలో సోమ‌వారం జ‌రిగిన ఘ‌ర్ష‌ణ‌ల‌కు మోనూ మ‌నేస‌ర్ కార‌ణ‌మ‌ని తెలుస్తోంది. భ‌జ‌రంగ్ ద‌ళ్‌కు చెందిన అత‌ను.. ఊరేగింపుకు వ‌స్తున్న‌ట్లు తెలియ‌డంతోనే వివాదం చెల‌రేగిన‌ట్లు భావిస్తున్నారు. ఇద్ద‌రు ముస్లిం యువ‌కుల హ‌త్య కేసులో మోనూ మ‌నేస‌ర్ కీల‌క నిందితుడిగా ఉన్నారు. సోమ‌వారం వీహెచ్‌పీ నిర్వ‌హించిన ఊరేగింపులో అత‌ను పాల్గొన‌నున్న‌ట్లు తెలిసింది. దీంతో మ‌రో వ‌ర్గం వారు ఆ ర్యాలీని అడ్డుకునే ప్ర‌య‌త్నం చేశారు. దీంతో రెండు వ‌ర్గాల మ‌ధ్య ఉద్రిక్త‌త నెల‌కొన్న‌ది. భారీ స్థాయిలో ఆస్తి న‌ష్టం జ‌రిగింది. న‌లుగురు వ్య‌క్తులు కూడా మ‌ర‌ణించారు. గురుగ్రామంలో రాత్రికి రాత్రే ఓ మ‌సీదును కాల్చిన ఘ‌ట‌న కూడా చోటుచేసుకున్న‌ది.

భ‌జ‌రంగ్ ద‌ళ్‌ సభ్యుడు అయిన ఈ మోనూ మనేసర్.. ఇద్దరు ముస్లిం యువకులను హత్య చేసిన కేసులో ప్రధాన నిందితుడిగా ఉన్నాడు. 30 ఏళ్ల మోనూ మనేసర్.. రాజస్థాన్‌లోని బివానీలో ఈ ఏడాది ఫిబ్రవరిలో ఇద్దరు ముస్లిం యువకుల్ని కిడ్నాప్ చేసి.. హత్య చేసినట్లు ఆరోపణలు ఉన్నాయి. జునైద్, నాసిర్ అనే ఇద్దరు యువకులు ఆవులను తరలిస్తున్నారనే అనుమానంతో వారిపై దాడి చేసిన మోనూ మ‌నేస‌ర్.. ఆ ఇద్దర్ని కారులోనే ఉంచి దగ్ధం చేసినట్లు సమాచారం. అయితే ఈ ఘటనతో తమకేమీ సంబంధం లేదని భజరంగ్ దళ్ స్పష్టం చేసింది.

అయితే ఈ రెండు హత్యల తర్వాత మోనూ మ‌నేస‌ర్‌ను పట్టుకునేందుకు రాజస్థాన్ పోలీసులు చేసిన ప్రయత్నాలు విఫలం అయ్యాయి. అరెస్ట్ వివరాలు తెలుసుకుని అక్కడి నుంచి పరారైనట్లు తెలుస్తోంది. అయితే మోనూ మ‌నేస‌ర్ అసలు పేరు మోహిత్ యాదవ్ అని తెలుస్తోంది. మోనూ మ‌నేస‌ర్ మీవాట్‌లో గో సంరక్షణ దళాన్ని నడిపిస్తూ.. ఆవుల అక్రమ రవాణాపై చాలా వీడియోలను సోషల్ మీడియాలో పోస్ట్ చేసినట్లు తెలుస్తోంది. ల‌వ్ జిహాద్‌కు వ్య‌తిరేకంగా కూడా మోనూ మనేసర్ ప్ర‌చారం చేసినట్లు పోలీసులు గుర్తించారు. హ‌ర్యానా ప్ర‌భుత్వం 2015 లో ఆవుల సంర‌క్ష‌ణ చ‌ట్టాన్ని తీసుకువ‌చ్చింది. ఈ చ‌ట్టం కింద ఏర్ప‌ాటు చేసిన జిల్లా టాస్క్‌ఫోర్స్‌ కమిటీలో ఈ మోనూ మనేసర్ ఓ స‌భ్యుడిగా కూడా ఉన్నాడు. మోనూ మనేసర్‌కు యూట్యూబ్‌, ఫేస్‌బుక్‌లో వేలాది మంది ఫాలోవ‌ర్లు ఉన్నట్లు పోలీసులు తెలిపారు.

అయితే ఈ మోనూ మనేసర్.. నుహ్ జిల్లాలో విశ్వహిందూ పరిషత్ నిర్వహించనున్న శోభాయాత్రకు హాజరు కానున్నట్లు కొన్ని రోజుల క్రితం సోషల్ మీడియాలో ఓ వీడియోను పోస్ట్ చేశాడు. ఈ శోభాయాత్రకు భారీగా తరలి రావాలని పిలుపునిచ్చాడు. ఈ నేపథ్యంలోనే ముస్లిం యువకులను చంపిన కేసులో నిందితుడిగా ఉన్న మోనూ మనేసర్.. నుహ్ జిల్లాకు రావద్దని సోషల్ మీడియాలో బెదిరింపులు వచ్చాయి. ఈ నేపథ్యంలో విశ్వ హిందూ ప‌రిష‌త్ ఇచ్చిన స‌ల‌హా మేర‌కు ఆ ర్యాలీకి వెళ్ల‌లేద‌ని మోనూ మ‌నేస‌ర్ తెలిపాడు. అయితే సోమవారం నుహ్ జిల్లాలో విశ్వహిందూ పరిషత్ నిర్వహించిన శోభాయాత్రకు మోనూ మనేసర్ పాల్గొన్నట్లు మరో వర్గం వారు గుర్తించారు. అందుకే ఆ శోభాయాత్రను అడ్డుకుని రాళ్లు రువ్వినట్లు తెలుస్తోంది.