పుంగనూరులో హైటెన్షన్.. చంద్రబాబుపై వైసీపీ కార్యకర్తల రాళ్ల దాడి

టీడీపీ అధినేత చంద్రబాబు పుంగనూరు పర్యటన వేళ హైటెన్షన్ నెలకొంది. చంద్రబాబు రోడ్ షోను అడ్డుకునేందుకు ఆయనపై వైసీపీ కార్యకర్తలు రాళ్లు రువ్వగా.. ఎన్‌ఎస్‌జీ కమాండోలు అడ్డుగా నిలబడ్డారు. ఈ క్రమంలో అన్నమయ్య జిల్లా అంగళ్లు దగ్గర టీడీపీ, వైసీపీ కార్యకర్తల పరస్పర గొడవకు దిగారు. ఇరు వర్గాలు రాళ్లు విసురుకోవడంతో పోలీసులు రంగంలోకి దిగి ఇరు వర్గాలపై లాఠీఛార్జ్ చేసి చెదరగొట్టారు.

చంద్రబాబును పుంగనూరు టౌన్‌లోకి రానీయకుండా వైసీపీ నేతలు రోడ్డుకు అడ్డంగా లారీని ఉంచారు. దీంతో లారీని అడ్డు తొలగించాలని ఆందోళననకు దిగిన టీడీపీ కార్యకర్తలపై పోలీసులు లాఠీఛార్జ్ చేయడం ఉద్రిక్త పరిస్థితులకు దారి తీసింది. ఈ లాఠీఛార్జ్‌లో పలువురు టీడీపీ కార్యకర్తలకు తీవ్ర గాయాలయ్యాయి. ఇక చంద్రబాబు వస్తున్న వేళ పుంగనూరులో టీడీపీ బ్యానర్లను వైసీపీ కార్యకర్తలు చింపేశారు. ఈ సందర్భంగా జరిగిన గొడవల్లో టీడీపీ ఎంపీటీసీ దేవేందర్‌కి గాయాలయ్యాయి. పుంగనూరు మీదుగా చంద్రబాబు సోంపల్లి ప్రాజెక్టు సందర్శనకు వెళ్లాల్సి ఉంది. అయితే గో బ్యాక్ చంద్రబాబు అని నినాదాలు చూస్తూ వైసీపీ కార్యకర్తలు రోడ్డుపైకి వచ్చారు. టెన్షన్ వాతావరణం నెలకొనడంతో పుంగనూరులోకి అనుమతి లేదని చంద్రబాబుకు పోలీసులు తెలిపారు. చంద్రబాబు వెళ్లే రోడ్డులో కంటైనర్ లారీ, వాహనాలను అడ్డుగా పెట్టారు.

అటు చంద్రబాబు కాన్వాయ్ వెళుతున్న టీడీపీ నేతల వాహనాలపై వైసీపీ కార్యకర్తలు రాళ్ల దాడికి పాల్పడ్డారు. ఈ దాడిలో 20 వాహనాల కాళ్ల అద్దాలు ధ్వంసమయ్యాయి. ఉద్రిక్త పరిస్థితుల నేపథ్యంలో అంగళ్లులో మంత్రి పెద్దిరెడ్డికి చంద్రబాబు వార్నింగ్‌ ఇచ్చారు. దాక్కోవడం కాదు, దమ్ముంటే రమ్మని పిలిస్తున్నానంటూ సవాల్‌ విసిరారు. అయితే ఉదయం నుంచి చంద్రబాబు పర్యటనలో ఉద్రిక్త పరిస్థితులు చోటుచేసుకుంటున్నాయి. పుంగనూరు మీదుగా చంద్రబాబు సోంపల్లి ప్రాజెక్టు సందర్శనకు చంద్రబాబు వెళ్లాల్సి ఉంది. ఉద్రిక్తల నడుమ ఈ పర్యటన సాగుతోంది. టెన్షన్ వాతావరణం నేపథ్యంలో చంద్రబాబు పర్యటనకు పోలీసులు భారీగా భద్రత ఏర్పాటు చేశారు. దాదాపు 500 మంది పోలీసులతో బందోబస్తు ఏర్పాటు చేశారు.