మంగళగిరి ఆలయ పుష్కరిణిలో పురాతన వస్తువులు,,,ప్రజల సందర్శనార్థం అందుబాటులో

గుంటూరు జిల్లా మంగళగిరి శ్రీలక్ష్మీనృసింహస్వామి పుష్కరిణిలో పురాతన వస్తువులు లభ్యం అయ్యాయి. ఎన్నో వందల ఏళ్ల నాటి బంగారు, రాగి నాణేలతో పాటుగా ఆలయంకు సంబంధించిన పూజా సామాగ్రి కూడా లభ్యమైంది. ఈ విషయాన్ని మంగళగిరి ఎమ్మెల్యే ఆళ్ల రామకృష్ణారెడ్డి, ఎమ్మెల్సీ మురుగుడు హనుమంతరావు, ఆలయ అధికారులు వెల్లడించారు. పుష్కరిణిలో లభ్యమైన అతి పురాతన సంపదను తహసీల్దార్ రాంప్రసాద్‌కు అందజేశారు. వీటిని ఏఎస్‌ఐ నివేదికకు పంపనున్నారు.. అనంతరం ప్రజలు సందర్శనార్థం అందుబాటులో ఉంచనున్నారు. బంగారు నాణాలు 18వ శతాబ్దం నాటివని.. జపాన్ తయారీతో ఇత్తడి వస్తువులు బయటపడ్డాయని ఎమ్మెల్యే ఆర్కే తెలిపారు.డిసెంబర్ నాటికి కోనేటిని పునరుద్ధరిస్తామన్నారు.

మంగళగిరి శ్రీపానకాల లక్ష్మీనృసింహస్వామి పుష్కరిణి మరమ్మత్తుల పనులు చేపట్టిన సంగతి తెలిసిందే. ఇప్పటికే కోనేరులో ఉన్న నీటిని మోటార్ల ద్వారా బయటకు పంపే పనులు దాదాపు పూర్తి కావొచ్చాయి. ఈ పుష్కరణికి రూ.1.5కోట్లతో దేవాదాయశాఖ మరమ్మతులు చేస్తోంది. దేవాదాయశాఖ కోనేరు మరమ్మతులు చేపట్టగా.. ప్రభుత్వం రూ.కోటి నిధులు కేటాయించింది.. అలాగే ఆలయానికి సంబంధించి మరో రూ.50లక్షలు జోడించి పనులు చేస్తున్నారు. కోనేరు మెట్లను పునరుద్ధరించడంతో పాటుగా అవసరమైన మరమ్మత్తులు చేయనున్నారు. వాస్తవానికి 2004లో జరిగిన కృష్ణా పుష్కరాల సమయంలో కూడా కోనేరు చుట్టూ రక్షణగా ఓ గోడను నిర్మించారు. ఆ తర్వాత పుష్కరిణి పట్టించుకోలేదని.. అందుకే శిథిలావస్థకు చేరిందంటున్నారు.

క్రీ.శ.1558లో విజయనగర సామ్రాజ్య చక్రవర్తి సదాశివరాయులు మేనల్లుడు తిమ్మరాజయ్య ఈ పుష్కరిణి 86 సెంట్ల స్థలంలో నిర్మించారు. నాలుగు వైపులా రాతిమెట్లు, ప్రవేశ ద్వారాలు ఉన్నాయి.. అలాగే అడుగున రెండు బావులు ఉన్నాయి. చారిత్రక ఆధారాల ద్వారా ఈ విషయాలన్నీ తెలుస్తున్నాయి. ఈ పనులు చేస్తున్న సమయంలోనే 464 ఏళ్ల నాటి రెండు శివలింగాలు కూడా బయటపడ్డాయి. కోనేరులో వంద అడుగుల మేర నీటిని తోడగా.. శివలింగాలు, ప్రపత్తి ఆంజనేయస్వామి ఆలయం కనిపించాయి. అంతేకాదు పుష్కరణి గర్భంలో బంగారు గుడి ఉందని స్థానికంగా గతంలో చర్చించుకునేవారట. 1832 సమయంలో కరవుతో పుష్కరిణి పూర్తిగా ఎండిపోవడంతో కొన్ని పురాతన వస్తువుల్ని దొరికాయని చెబుతంటారు. పుష్కరణిలో దాసాంజనేయ ఆలయం కూడా ఉంది.