గౌరీకుండ్ సమీపంలో విరిగిపడ్డ కొండచరియలు,,,,భారీ వర్షాలే కారణమంటోన్న అధికారులు

ఉత్తరాఖండ్లో గురువారం రాత్రి కొండచరియలు విరిగిపడి.. స్థానికంగా ఉన్న దుకాణాలు నేలమట్టమయ్యాయి. ఈ శిథిలాల కింద 12 మందికిపైగా చిక్కుకున్నట్టు అధికారులు వెల్లడించారు. రుద్రప్రయాగ్ జిల్లాలోని కేదార్‌నాథ్ మార్గంలోనే ఈ ఘటన చోటుచేసుకుంది. దీనిపై సమాచారం అందుకున్న అధికారులు.. హుటాహుటిన ప్రమాద స్థలానికి చేరుకుని సహాయక చర్యలు చేపట్టారు. ఉత్తరాఖండ్ సహా ఉత్తర భారతంలో దాదాపు నాలుగు వారాల నుంచి కురుస్తోన్న భారీ వర్షాల కారణంగా అనేక రాష్ట్రాల్లో కొండచరియలు విరిగిపడుతున్నాయి. తాజా, ఘటనకు భారీ వర్షాలే కారణమని, శిథిలాల కింద చిక్కుకున్న బాధితులు ప్రాణాలతో బయటపడే అవకాశాలు చాలా తక్కువగా ఉన్నాయని అధికారులు తెలిపారు.

రుద్రప్రయాగ్ విపత్తు నిర్వహణ అధికారులు వెల్లడించిన వివరాల ప్రకారం.. కొండచరియలు కింద కనీసం 12 మంది చిక్కుకున్నారు. భారీ వర్షం కారణంగా గౌరీకుండ్ పోస్ట్ బ్రిడ్జ్ సమీపంలో కొండచరియలు విరిగిపడి దుకాణాలపై పడినట్టు పేర్కొన్నారు. రుద్రప్రయాగ్ ఎస్పీ డాక్టర్ విశాఖ మాట్లాడుతతూ.. గల్లంతైన వారికోసం గాలింపు కొనసాగుతోందని చెప్పారు.

‘భారీ వర్షం కారణంగా కొండచరియలు విరిగిపడి మూడు దుకాణాలు ధ్వంసమైనట్టు మాకు సమాచారం వచ్చింది.. హుటాహుటిన అక్కడకు చేరుకుని సెర్చ్ ఆపరేషన్ చేపట్టాం.. శిథిలాల కింద 10 నుంచి 12 మంది ఉన్నారు.. కానీ, వారి ఆచూకీ ఇంకా లభించలేదు’ అని డిజాస్టర్ మేనేజ్‌మెంట్ అధికారి దిలీప్ సింగ్ రాజ్వార్ ఏఎన్ఐతో అన్నారు.

ఈ విపత్తులో గల్లంతైన 12 మందిలో ఏడుగురు ఒకే కుటుంబానికి చెందినవారు. వీరంతా నిద్రపోతుండగా మూడు దుకాణాలపై కొండచరియలు విరిగిపడ్డారు. ఒకే కుటుంబంలోని వారిలో అమర్ బోహ్రా.. అతని భార్య అనితా బోహ్రా, వారి కుమార్తెలు రాధిక బోహ్రా, పింకీ బోహ్రాగా, కుమారులు పృథ్వీ బోహ్రా (7), జటిల్ (6), వకీల్ (3) ఉన్నారని అధికారులు తెలిపారు. వీరితో పాటు వినోద్ (26), ములాయం (25), అషు (23), ప్రియాంషు చమోలా (18), రణబీర్ సింగ్ (28) ఉన్నారని వారు వెల్లడించారు.

గౌరీకుండ్ అనేది పార్వతిదేవి ఆలయం ఉండే యాత్రాస్థలి. ఇది కేదార్‌నాథ్ ఆలయానికి ట్రెక్కింగ్ కోసం బేస్ క్యాంప్‌గా కూడా పనిచేస్తుంది. ఈ వర్షాకాలంలో వర్షాల కారణంగా కొండచరియలు విరిగిపడటం వంటి ప్రమాదాల భయంతో కేదార్‌నాథ్ పుణ్యక్షేత్రానికి వచ్చే యాత్రికుల సంఖ్య తగ్గింది. ఈ ఏడాది చార్‌ధామ్ యాత్ర సీజన్ మొదలైనప్పటి నుంచి ఏదో ఒక రూపంలో ప్రకృతి విపత్తులు సంభవించి.. ఆటంకం కలిగిస్తున్నాయి.