పట్టపగలే రూ.100 కోట్లకుపైగా సొత్తు చోరీ,,,,సినిమా రేంజ్‌లో భారీ దోపిడీకి పాల్పడిన ముఠా

అది అత్యంత రద్దీగా ఉండే ప్రాంతం. బాగా ఖరీదైన ఆభరణాలు, విలువైన గడియారాలతో ఉండే దుకాణం. అదే సమయంలో అక్కడికి చేరుకున్న ముగ్గురు దొంగలు.. పట్టపగలే భారీ లూటీకి పాల్పడ్డారు. ఆయుధాలతో వచ్చి.. ఆ దుకాణంలో ఉన్న వారిని బెదిరించారు. అనంతరం అక్కడ ఉన్న ఆభరణాలు, వాచ్‌లను తమ బ్యాగుల్లో సర్దుకున్నారు. అనంతరం అక్కడి నుంచి క్షణాల్లో పరారయ్యారు. వాటి విలువ రూ. 100 కోట్ల నుంచి రూ. 180 కోట్ల వరకు ఉంటుందని అంచనా వేస్తున్నారు. ఈ ఘటనతో ఖంగుతిన్న ఆ దుకాణం యజమాని పోలీసులను ఆశ్రయించి జరిగిన విషయం వెల్లడించారు. దీంతో రంగంలోకి దిగిన పోలీసులు దర్యాప్తు ప్రారంభించారు. ఈ ఘటన ఫ్రాన్స్‌లో చోటు చేసుకుంది.

ఫ్రాన్స్‌ రాజధాని పారిస్‌లో సినిమాటిక్ స్టైల్‌లో ఓ భారీ దోపిడి ఘటన జరిగింది. విలువైన ఆభరణాలు, విలాసవంతమైన గడియారాలు ఉండే పియాజె దుకాణంలోకి ముగ్గురు దుండగులు ప్రవేశించారు. ఈ లగ్జరీ దుకాణంలోనికి పట్టపగలే మధ్యాహ్నం ఒంటిగంటకు చొరబడ్డారు. ఆ దుకాణంలోకి వెళ్లిన ముగ్గురు వ్యక్తుల చేతుల్లో ఆయుధాలు ఉన్నాయి. వాటితో అక్కడ ఉన్న సెక్యూరిటీ సిబ్బందితోపాటు లోపల ఉన్న దుకాణ సిబ్బందిని బెదిరించారు. దీంతో వారు వెంట తెచ్చుకున్న బ్యాగుల్లో.. దుకాణంలోని నగలు, డబ్బు, ఇతర ఖరీదైన వస్తువులను నింపుకుని.. అక్కడి నుంచి ఉడాయించారు. అయితే ఈ చోరీ సంఘటనలో దుకాణంలో ఉన్న కస్టమర్లు, సిబ్బందికి ఎలాంటి గాయాలు కాలేదని.. ప్యారిస్ పోలీసులు వెల్లడించారు.

ఈ పియాజె అనే సంస్థ స్విట్జర్లాండ్‌కు చెందినది. రిచెమాంట్‌ గ్రూప్‌కు అనుబంధంగా ఉండే ఈ పియాజె సంస్థ.. విలాసవంతమైన గడియారాలు, ఖరీదైన ఆభరణాలను తయారు చేసి అమ్ముతుంది. ఇందులో ఉండే ఒక్కో గడియారం ఖరీదు కనీసం రూ. 9 లక్షల నుంచి రూ.10 లక్షలు ఉంటుందని పోలీసులు వెల్లడించారు. ఈ చోరీకి గురైన పియాజె దుకాణం.. ఫ్రాన్స్ రాజధాని ప్యారిస్‌లోనే అత్యంత రద్దీ ప్రదేశంగా పేరు గాంచిన రూ డె లా ప్రి అనే ప్రాంతంలో జరిగింది. ఈ రూ డె లా ప్రి అనే ప్రాంతంలో మొత్తం అనేక హై ఎండ్‌ జ్యువెలరీ దుకాణాలు, హై ఎండ్ వాచ్‌లు విక్రయించే దుకాణాలు ఉంటాయి. ఫేమస్ టూరిస్ట్ ప్రాంతం అయిన వెండోమ్.. ఈ రూ డె లా ప్రి అనే ప్రాంతానికి దగ్గర్లోనే ఉంటుంది. అయితే గత ఏప్రిల్‌లోనూ ఇలాంటి భారీ దొంగతనం ఈ ప్రాంతంలో జరిగిందని పోలీసులు తెలిపారు. బైక్‌లపై వచ్చిన ముగ్గురు దుండగులు.. బల్గరీ స్టోర్‌లోకి దూరి కోట్ల విలువైన వస్తువులను దోచుకొని వెళ్లినట్లు వివరించారు.