పుంగనూరు ఘటనపై ఎన్‌హెచ్‌ఆర్సీకి ఫిర్యాదు,,,,సీఎం జగన్, మంత్రి పెద్దిరెడ్డిపై టీడీపీ కంప్లైంట్

ఏపీలో పుంగనూరు అల్లర్లు ఇప్పుడు కలకలం సృష్టిస్తున్నాయి. టీడీపీ, వైసీపీ కార్యకర్తలు పోటాపోటీగా రాళ్ల దాడులు చేసుకోవడంతో అల్లర్లు చెలరేగాయి. వైసీపీ కార్యకర్తలు చంద్రబాబు పర్యటనను అడ్డుకోవడం, పోలీస్ వాహనాలకు టీడీపీ కార్యకర్తలు నిప్పు పెట్టడంతో హింసాత్మక ఘటనలు చోటుచేసుకున్నాయి. దీంతో పోలీసులు పరిస్థితులు అదుపు చేసేందుకు భాష్పవాయివు ప్రయోగించడం, లాఠీఛార్జ్ చేయడం, రబ్బర్ బుల్లెట్లు ఫైర్ చేయడంతో హైటెన్షన్ క్రియేట్ అయింది. ఈ ఘటనలతో పుంగనూరు యుద్ద భూమిని తలపించింది. పోలీసులు కూడా ఏం చేయలేక చేతులెత్తిసిన పరిస్థితి నెలకొంది.

అయితే పుంగనూరులో టీడీపీ నేతలు, కార్యకర్తలపై దాడులపై ప్రతిపక్ష టీడీపీ ఆగ్రహం వ్యక్తం చేస్తోంది. అధికార వైసీపీ కనుసన్నల్లోనే పోలీసులు టీడీపీ కార్యకర్తలపై జులుం ప్రదర్శించారని, పోలీసులను అడ్డు పెట్టుకుని వైసీపీ నేతలు దాడులకు పాల్పడ్డారని టీడీపీ ఆరోపిస్తోంది. ఈ క్రమంలో పుంగనూరు దాడి ఘటనలపై ఎన్‌హెచ్‌ఆర్సీకి టీడీపీ ఫిర్యాదు చేసింది. ఈ మేరకు టీడీపీ సీనియర్ నేత వర్ల రామయ్య ఇవాళ ఎన్‌హెచ్‌ఆర్సీకి ఫిర్యాదు చేశారు. సీఎం జగన్, మంత్రి పెద్దిరెడ్డి రామచంద్రారెడ్డి, కొందరు పోలీస్ ఉన్నతాధికారులపై ఫిర్యాదు చేశారు.

పుంగనూరులో టీడీపీ కార్యకర్తలపై పోలీసులు జులుం ప్రదర్శించడం వెనుక ప్రభుత్వంలోని పెద్దల హస్తం ఉందని ఎన్‌హెచ్‌ఆర్సీకి రాసిన లేఖలో వర్ల రామయ్య పేర్కొన్నారు. ఈ దాడి ఘటనపై స్పందించి బాధ్యులైన వారిపై చర్యలు తీసుకోవాలని విజ్ఞప్తి చేశారు. వైసీపీ నేతలు చెప్పినట్లు పోలీసులు చేస్తున్నారని, ప్రజల రక్షణ కోసం పనిచేయడం లేదని ఆరోపించారు. అలాంటి పోలీసులపై చర్యలు తీసుకోవాలని లేఖలో కోరారు.

పుంగనూరులో కావాలని టీడీపీ అల్లర్లు సృష్టించిందని వైసీపీ నేతలు ఆరోపిస్తుండగా.. చంద్రబాబు పర్యటనను అడ్డుకునేందుకు వైసీపీనే కుట్ర పన్నిందంటూ టీడీపీ ఆరోపిస్తోంది. దీంతో ఈ దాడులకు అసలు కారణం ఎవరనేది ఇప్పుడు పెద్ద చర్చనీయాంశంగా మారింది. పుంగనూరులో దాడి ఘటనపై ఇవాళ కూడా టీడీపీ అధినేత చంద్రబాబు స్పందించారు. తనకు కేంద్ర బలగాల సెక్యూరిటీ ఉంది కాబట్టి సరిపోయిందని, లేకపోతే వివేకాను చంపేసినట్లు చంపేసి ఉండేవారని సంచలన వ్యాఖ్యలు చేశారు. పోలీసులతో తమకేమి ఇబ్బంది లేదని, కానీ కొంతమంది పోలీసులు వైసీపీ నేతల చేతుల్లో పావులై ప్రజాస్వామ్యాన్ని అపహస్యం చేస్తున్నారని ఆరోపించారు. అటు ఈ దాడులపై ఇప్పటికే రాష్ట్ర గవర్నర్‌కు టీడీపీ ఫిర్యాదు చేసింది. టీడీపీ నేతల బృందం గవర్నర్‌ను స్వయంగా కలిసి కంప్లైంట్ చేశారు. రాష్ట్రంలో శాంతి భద్రతలు అదుపు తప్పాయని, తక్షణమే చర్యలు తీసుకోవాలని కోరారు.