ఫ్రీగా గిఫ్ట్‌లు ఇస్తారని చెప్పడంతో,,,,అభిమాన సెలబ్రిటీని చూసేందుకు ఎగబడిన జనం

సెలబ్రిటీ వచ్చాడంటే అభిమానులు తండోపతండాలుగా తరలి వస్తారు. ఇక తాము అభిమానించే ఆ వ్యక్తి ఉచితంగా బహుమతులు ఇస్తున్నాడని తెలిస్తే. ఇంకేముంది పరుగెత్తుకుంటూ వెళ్లి.. స్వామి కార్యం స్వకార్యం రెండూ చూసుకుందామని వెళ్లారు. ఇలాగే అనుకుని ఒకేసారి వేలాది మంది ఒకే చోటులో గుమి కూడడంతో అక్కడ తీవ్ర తోపులాట, వాగ్వాదం చోటు చేసుకున్నాయి. దీంతో ప్రజల మధ్య ఘర్షణలు చెలరేగి తీవ్ర ఉద్రిక్త పరిస్థితులు నెలకొన్నాయి. ఈ పరిస్థితిని అదుపు చేసేందుకు పోలీసులు రంగంలోకి దిగారు. గంటల పాటు కష్టపడి అక్కడ ఉన్నవారందరినీ చెదరగొట్టారు. ఈ ఘటన న్యూయార్క్ నగరంలో జరిగింది. 21 ఏళ్ల సోషల్ మీడియాను చూసేందుకు.. అతడు ఇచ్చే ఉచిత గిఫ్ట్‌లను తీసుకునేందుకు వేలాది మంది చొచ్చుకురావడంతో న్యూయార్క్ నగర వీధులన్నీ రణరంగంగా మారాయి. వారిని అదుపు చేసేందుకు పోలీసుల తల ప్రాణం తోకకు వచ్చింది. ఈ ఘటనలో పలువురు గాయపడ్డారు.

న్యూయార్క్‌కు చెందిన 21 ఏళ్ల కై సీనట్.. ఒక సోషల్ మీడియా ఇన్‌ఫ్లూయెన్సర్. అతి చిన్న వయసులోనే తనకు ఆన్‌లైన్‌లో భారీగా క్రేజ్ రావడం.. లక్షలాది మంది తనను ఫాలో అవడంతో సెలబ్రిటీగా ఎదిగాడు. దీంతో మాన్‌హట్టన్ యూనియన్ స్క్వేర్ పార్క్‌లో శుక్రవారం సాయంత్రం ఒక కార్యక్రమాన్ని నిర్వహించాడు. దీనికి సంబంధించి లైవ్ స్ట్రీమింగ్ ఈవెంట్ చేయనున్నట్లు తన ఇన్‌స్టాగ్రామ్ పేజ్‌లో ఓ పోస్టు పెట్టాడు. ఈ ఈవెంట్‌లో తాను నేరుగా తన అభిమానులను కలుస్తానని.. ప్లే స్టేషన్ 5 గేమ్ కన్సోల్స్‌తోపాటు వివిధ రకాలైన గిఫ్ట్‌లు అందిస్తానని ఆ పోస్టులో వెల్లడించాడు. ఇది చూసిన అతని అభిమానులు, స్థానిక ప్రజలు ఒక్కసారిగా అక్కడికి ఎగబడ్డారు. దీంతో న్యూయార్క్ నగర వీధులన్నీ దద్దరిల్లిపోయాయి. ఈ క్రమంలోనే అల్లర్లు చెలరేగి పరిస్థితులు రణరంగంగా మారాయి.

కై సీనట్‌ చేసిన ఇన్‌స్టాగ్రామ్ పోస్టుతో మాన్‌హట్టన్‌ పార్క్‌కు అతని అభిమానులు భారీగా చేరుకున్నారు. దాదాపు 2 వేల మందికి పైగా యువతీ యువకులు కై సీనట్‌ను చూసేందుకు ఎగబడ్డారు. దీంతో ఆ ప్రాంతమంతా కిక్కిరిసిపోయింది. దీంతో అక్కడికి చేరుకున్న పోలీసులు ఆ యువతీ యువకులను అదుపు చేసేందుకు బారికేడ్లు ఏర్పాటు చేశారు. ఈ క్రమంలోనే తీవ్ర తోపులాట, వాగ్వాదా చోటు చేసుకుని ఉద్రిక్తత తలెత్తింది. ఈ క్రమంలోనే కొంత మందిని అక్కడికి రాకుండా పోలీసులు ముందుగానే అడ్డగించారు. దీంతో కొంతమంది సీనట్‌ అభిమానులు ఆ ప్రాంతంలో అల్లర్లకు దిగారు. ఒకరినొకరు తోసుకోవడం, వాటర్ బాటిళ్లు విసురుకోవడం, కార్లను ధ్వంసం చేయడం చేశారు. మరికొందరు అక్కడున్న బిల్డింగ్‌లపైకి ఎక్కి అరుపులు, కేకలు పెట్టారు. దీంతో వారిని అదుపు చేసేందుకు పోలీసులు తీవ్రంగా శ్రమించారు.

ఈ ఘర్షణల్లో పలువురు పోలీసు అధికారుల సహా ప్రజలు కూడా గాయపడ్డారు. ఉద్రిక్తతలు తీవ్రమవడం, పరిస్థితులు మరింత దిగజారిపోతుండటంతో కొంతమంది ఆందోళనకారులను పోలీసులు అదుపులోకి తీసుకుని అక్కడి నుంచి తరలించారు. మరోవైపు.. భద్రతా కారణాల దృష్ట్యా సీనట్‌ను కూడా పోలీసులు అక్కడి నుంచి మరో ప్రాంతానికి తరలించి ప్రశ్నించారు. ఇలా ఓ ఈవెంట్ నిర్వహించి.. ఉద్రిక్తతలకు కారణమైనందుకు సీనట్‌పై క్రిమినల్ కేసు కూడా పెట్టేందుకు పోలీసులు సిద్ధమయ్యారు. 21 ఏళ్ల కై సీనట్‌ ఓ పాపులర్‌ వీడియో క్రియేటర్‌. ట్విచ్ అనే లైవ్‌ స్ట్రీమింగ్‌ ప్లాట్‌ఫాంలో కై సీనట్‌కు ఏకంగా 65 లక్షల మంది ఫాలోవర్లు ఉన్నారు. యూట్యూబ్‌, ట్విటర్‌ వంటి సోషల్ మీడియాల్లోనూ కై సీనట్‌కు లక్షల్లో ఫాలోవర్లు ఉన్నారు. గతేడాది ప్రకటించిన స్ట్రీమ్‌ అవార్డుల్లో స్ట్రీమర్‌ ఆఫ్ ది ఇయర్‌గా నిలవడంతో సీనట్‌కు పాపులారిటీ మరింత పెరిగింది.