స్నేహితుల దినోత్సవం రోజున విషాదం,,,ముగ్గురు స్నేహితులు మృతి

ఫ్రెండ్‌షిప్ డే రోజు కారు పంట కాలువలోకి దూసుకెళ్లిన ఘటనలో ముగ్గురు స్నేహితులు ప్రాణాలు కోల్పోయారు. మరో ముగ్గురు తీవ్రంగా గాయపడి ఆసుపత్రిలో చేరారు. తూర్పుగోదావరి జిల్లా కోరుకొండ మండలం బూరుగుపూడి వద్ద కారు అదుపు తప్పి పై వంతెన నుంచి కాలువలోకి దూసుకెళ్లటంతో ఈ ప్రమాదం చోటు చేసుకుంది. పోలీసులు తెలిపిన వివరాల ప్రకారం.. ఏలూరు రామచంద్ర ఇంజనీరింగ్ కాలేజీకి చెందిన పలువురు విద్యార్థులు విహారయాత్రకు వెళ్లేందుకు ప్లాన్ చేసుకున్నారు. కాలేజీలో థర్డ్ ఇయర్ చదువుతున్న 10 మంది విద్యార్థులు రెండు కార్లలో మారేడుమిల్లికి వెళ్లాలని డిసైడ్ అయ్యారు. వారి వెంట ఓ డ్రైవర్‌ను కూడా వెంటబెట్టుకొని శనివారం మారేడుమిల్లి వెళ్లారు. అక్కడ పర్యాటక ప్రాంతాలను ఆస్వాదించిన తర్వాత.. విద్యార్థులంతా శనివారం రాత్రి తిరుగుపయనమయ్యారు.

రెండు కార్లు.. తూర్పుగోదావరి జిల్లా కోరుకొండ మండలం బూరుగుపూడి దగ్గరకు వచ్చే సరికి అర్ధరాత్రి దాటింది. రెండు కార్లలో ఓ కారు పాత, కొత్త బ్రిడ్జిల మధ్యలో ఉన్న పంట కాలువలోకి దూసుకొని వెళ్లింది. ప్రమాద సమయంలో కారులో మొత్తంగా ఆరుగురు ఉన్నారు. ప్రమాదాన్ని గమనించిన మరో కారులోని స్నేహితులు పోలీసులకు సమాచారం ఇచ్చారు. వెంటనే ఘటనా స్థలానికి చేరకున్న పోలీసులు.. సహాయక చర్యలు చేపట్టారు. కారును క్రేన్ల సాయంతో వెలికితీయగా.. అందులోని ముగ్గురు విద్యార్థులు ప్రాణాలు కోల్పోయారు. మృతులు ఉదయ్ కిరణ్, హర్షవర్ధన్, హేమంత్‌లుగా గుర్తించారు.

గాయపడిన మరో ముగ్గురుని రాజమహేంద్రవరం ప్రభుత్వ ఆసుపత్రికి తరలించారు. ప్రస్తుతం వారికి ఆసుపత్రిలో చికిత్స అందుతోంది. ఘటనపై కేసు నమోదు చేసుకున్న పోలీసులు విచారణ చేపట్టారు. అయితే ప్రమాదానికి గల కారణాలు, పూర్తి వివరాలు తెలియాల్సి ఉంది. ఓవర్ స్పీడ్ కారణంగానే కారు ప్రమాదానికి గురైనట్లు పోలీసులు అనుమానిస్తున్నారు. ఇదే కారుపై తెలంగాణలోని నల్లగొండ జిల్లాలో ఓవర్ స్పీడ్‌కు సంబంధించిన చలాన్లు ఉన్నట్లు గుర్తించారు.