ఢిల్లీ ఎయిమ్స్‌లో ఫైర్ యాక్సిడెంట్,,,ఎండోస్కోపీ రూమ్‌లో చెలరేగిన మంటలు

దేశ రాజధాని ఢిల్లీలో ఉన్న ఆల్‌ ఇండియా ఇన్‌స్టిట్యూట్‌ ఆఫ్‌ మెడికల్‌ సైన్సెస్‌ - ఎయిమ్స్‌లో అగ్నిప్రమాదం జరిగింది. పాత ఓపీడీ భవనంలోని రెండో అంతస్తులో ఉన్న ఎండోస్కోపీ రూమ్‌లో మంటలు చెలరేగాయి. దీంతో దట్టమైన పొగ కమ్ముకుని బయటికి వచ్చింది. ఒక్కసారిగా ఫైర్ యాక్సిడెంట్ అయి.. భారీగా పొగ రావడంతో ఏం జరుగుతోందో అక్కడ ఉన్న వారికి తెలియని పరిస్థితి నెలకొంది. ఈ క్రమంలోని ప్రాణ భయంతో పేషంట్లు, వారితో వచ్చిన వారు, ఆస్పత్రి సిబ్బంది.. భయాందోళనతో పరుగులు తీశారు. అగ్ని ప్రమాదం తర్వాత పేషంట్లను అక్కడి నుంచి తరలించారు. తాత్కాలికంగా ఎమర్జెన్సీ వార్డును మూసివేశారు.

అయితే ఆ ఎండోస్కోపీ రూమ్ కింది అంతస్తులోనే ఎమర్జెన్సీ వార్డు కూడా ఉండటంతో ఆస్పత్రిలో ఉన్న పేషంట్లు, సిబ్బంది, డాక్టర్లు తీవ్ర భయాందోళనకు గురయ్యారు. మంటలు రాగానే ఫైర్ అలారమ్ మోగడంతో సిబ్బంది అప్రమత్తమ్యయారు. వెంటనే అగ్నిమాపక సిబ్బందికి జరిగిన విషయం చెప్పడంతో వారు రంగంలోకి దిగారు. ఎయిమ్స్‌లో అగ్నిప్రమాదం జరిగిన విషయం తెలుసుకున్న పోలీసులు, ఫైర్ సిబ్బంది వెంటనే సంఘటనా స్థలానికి చేరుకుని సహాయక చర్యలు చేపట్టారు. దాదాపు 6 ఫైర్‌ ఇంజిన్ల సాయంతో మంటలను పూర్తిగా అదుపు చేసినట్లు వెల్లడించారు. సకాలంలో స్పందించి ఫైర్ ఇంజిన్లు రంగంలోకి దిగడంతో మంటలు ఇతర వార్డులకు వ్యాప్తి చెందకుండా అడ్డుకున్నట్లు వివరించారు.

ఎండోస్కోపి రూమ్‌లో ఉన్న పేషంట్లను, సిబ్బందిని సురక్షితంగా బయటకు తీసుకు వచ్చారు. ఘటన తర్వాత ఢిల్లీ ఎయిమ్స్‌లోని ఎమర్జెన్సీ వార్డును తాత్కాలికంగా మూసివేస్తున్నట్లు హాస్పిటల్ వర్గాలు వెల్లడించాయి. దీంతో ఇప్పుడు మంటలు పూర్తిగా చల్లారి.. పరిస్థితి అదుపులోకి వచ్చిందని ఢిల్లీ ఫైర్‌ సర్వీసెస్‌ అధికారులు వెల్లడించారు. అయితే అగ్నిప్రమాదం ఎలా జరిగింది.. మంటలు ఎలా చెలరేగాయి అనే దానిపై ఇంకా ఎలాంటి విషయాలు బయటికి రాలేదు. దట్టమైన పొగ, భారీగా మంటలు చెలరేగినా ఢిల్లీ ఎయిమ్స్‌లో ఉన్న ఎవరికీ ఏమీ కాకపోవడంతో అంతా ఊపిరి పీల్చుకున్నారు. అయితే ఈ అగ్ని ప్రమాదం ఎలా జరిగింది అనే దానిపై దర్యాప్తు చేస్తున్నట్లు ఢిల్లీ ఎయిమ్స్ వర్గాలు వెల్లడించాయి. అయితే ఎండోస్కోపీ రూమ్‌లో షార్ట్ సర్క్యూట్ కారణంగానే అగ్ని ప్రమాదం జరిగి ఉండవచ్చని హాస్పిటల్ వర్గాలు అనుమానం వ్యక్తం చేస్తున్నాయి.