రాహుల్‌ను పెళ్లి చేసుకునేందుకు సిద్ధమన్న బాలీవుడ్ బ్యూటీ షెర్లిన్ చోప్రా

కాంగ్రెస్ మాజీ అధ్యక్షుడు రాహుల్ గాంధీ పెళ్లి విషయం మళ్లీ తెరపైకి వచ్చింది. అయితే సాధారణంగా చాలా మంది పెళ్లి ఎప్పుడు చేసుకుంటారు అని రాహుల్‌కు ప్రశ్నలు వేస్తూ ఉంటారు. అయితే ఇప్పుడు మాత్రం ఓ బాలీవుడ్ నటి.. రాహుల్‌ను పెళ్లి చేసుకునేందుకు తాను సిద్దమని తెలిపింది. అయితే తాను పెళ్లి చేసుకునేందుకు ఒక షరతు కూడా పెట్టింది. ఇంతకీ ఆ వ్యాఖ్యలు చేసింది ఎవరు అనుకుంటున్నారా. ఆమె బాలీవుడ్ హాట్ బ్యూటీ, బిగ్‌బాస్ కంటెస్టెంట్ షెర్లిన్ చోప్రా. అయితే తరచూ వివాదాస్పద వ్యాఖ్యలు చేస్తూ బాలీవుడ్‌లో తీవ్ర విమర్శలకు గురయ్యే షెర్లిన్ చోప్రా తాజాగా చేసిన వ్యాఖ్యలు తీవ్ర చర్చనీయాంశంగా మారాయి. ఓ ప్రెస్‌మీట్‌లో భాగంగా మాట్లాడిన ఈ బోల్డ్ బ్యూటీ.. కాంగ్రెస్ ఎంపీ రాహుల్ గాంధీని పెళ్లి చేసుకునేందుకు సిద్ధమని బోల్డ్ కామెంట్స్ చేసింది.

రాహుల్‌ గాంధీని పెళ్లి చేసుకుంటానని సంచలన ప్రకటన చేసిన షెర్లిన్ చోప్రా.. అందుకు ఒక కండీషన్ కూడా ఉన్నట్లు తెలిపింది. పెళ్లి తర్వాత తన ఇంటి పేరును మార్చుకోనని తేల్చి చెప్పింది. తన పేరులో చోప్రా అనే ఇంటి పేరును అలాగే ఉంచుకుంటానని పేర్కొంది. అలా అయితేనే రాహుల్‌ గాంధీని పెళ్లి చేసుకుంటానని వెల్లడించింది. అయితే షెర్లిన్ చోప్రా చేసిన పెళ్లి వ్యాఖ్యలపై రాహుల్ గాంధీ ఇప్పటివరకు స్పందించలేదు. ప్రస్తుతం.. షెర్లిన్ చోప్రా చాలా ఏళ్ల గ్యాప్ తర్వాత పౌరాష్‌పూర్ -2 అనే వెబ్ సిరీస్‌లో నటించింది. ఇటీవల ఆమె 'పౌరాష్‌పూర్- 2' వెబ్ సిరీస్ ప్రమోషన్లతో బిజీ బిజీగా ఉంది. ఈ వెబ్ సిరీస్ జూలై 28 న ఓటీటీ ప్లాట్‌ఫామ్‌లో విడుదలైంది. ఇంతకుముందు ఫ్రెండ్స్ ఫర్ ఎవర్, రెడ్ స్వస్తిక్, వజా తుమ్ హో, గేమ్, చమేలీ, జవానీ దివానీ: ఎ యూత్‌ఫుల్ జాయ్‌రైడ్ లాంటి సినిమాల్లో షెర్లిన్ చోప్రా నటించింది. అమితాబ్ బచ్చన్ హోస్ట్ చేసిన బిగ్ బాస్ మూడో సీజన్‌లో షెర్లిన్ పాల్గొంది.

అయితే ఇటీవల ఢిల్లీలోని సోనియా గాంధీ నివాసానికి వచ్చిన హర్యానా మహిళా రైతులు కూడా రాహుల్ పెళ్లి ప్రస్తావన తీసుకువచ్చారు. రాహుల్‌కు ఎప్పుడు పెళ్లి చేస్తారని సోనియాను అడగ్గా.. ఒక మంచి అమ్మాయిని మీరే చూడండి అంటూ ఆమె బదులు ఇచ్చారు. అంతకుముందు బెంగళూరు వేదికగా నిర్వహించిన విపక్షాల ఐక్యత సమావేశం ఇండియా కూటమి భేటీలో భాగంగా ఆర్జేడీ అధినేత లాలూ ప్రసాద్ యాదవ్ కూడా రాహుల్ గాంధీ పెళ్లి గురించి ప్రస్తావన తీసుకువచ్చారు. త్వరగా పెళ్లి చేసుకోవాలని సూచించారు. రాహుల్ పెళ్లి చేసుకుంటే తామంతా వచ్చి ఆ వివాహ వేడుకకు హాజరవుతామని లాలూ చమత్కరించారు.