నేనూ చిరంజీవి అభిమానినే.. ర్ని నాని

చిరంజీవి కేంద్ర మంత్రిగా ఉన్నప్పుడు రాష్ట్రానికి అన్యాయం జరిగిందని మాజీ మంత్రి, మచిలీపట్నం ఎమ్మెల్యే పేర్ని నాని కౌంటర్ ఆరోపించారు. రాష్ట్ర విభజన సమయంలో చిరు ఏ పార్టీలో ఉన్నారని ప్రశ్నించారు. తమపై దాడి చేస్తే ఎదురుదాడి తప్పదని హెచ్చరించారు. తాను వ్యక్తిగతంగా చిరంజీవికి అభిమానినని, చదువుకునే రోజుల్లో దండలు వేసిన విషయాన్ని గుర్తు చేసుకున్నారు. చిరు పారితోషికం గురించి తాము మాట్లాడలేదన్నారు. సినిమాను సినిమాలాగే చూడాలని, రాజకీయాన్ని రాజకీయంలాగే చూడాలని పేర్ని నాని సూచించారు. ఇతర హీరోలపై తాము ఎప్పుడూ మాట్లాడలేదని, మహేష్ బాబు, జూనియర్ ఎన్టీఆర్, రామ్ చరణ్ గురించి ఏ రాజకీయ పార్టీ అయినా మాట్లాడిందా అని ప్రశ్నించారు. సినిమావాళ్లు అందరూ వేరు.. పవన్ కల్యాణ్ వేరు అని వ్యాఖ్యానించారు. సినిమాల్లో హీరో విలన్ని కొడుతుంటే చూస్తూ కూర్చున్నట్లు రాజకీయాల్లో కూర్చోరని, రాజకీయాల్లో ఒకరు గోకితే ఎదుటివారు కూడా గోకుతారని అన్నారు.

పుంగనూరు ఘటనలో ప్రధాన ముద్దాయి చంద్రబాబు అని, అధికారం కోసం చంద్రబాబు ఎంతకైనా తెగిస్తారని ఆరోపించారు.పుంగనూరులో బాబు రౌడీయిజానికి పాల్పడ్డారని, పోలీసులపై దాడులు చేసి అల్లర్లు సృష్టించాలని కుట్ర పన్నారని విమర్శించారు. పక్కా స్కెచ్‌తోనే చంద్రబాబు రెక్కీ చేయించారని, ముందు రోజే రాళ్లు, కర్రలు దాచి పెట్టారని ఆరోపించారు. పక్క జిల్లా నుంచి రౌడీ మూకలను తెచ్చి మోహరించారన్నారు. ఎస్పీ రిషాంత్ రెడ్డి కళ్లకు ఆపరేషన్ చేయిస్తాననటం లోకేష్ బలుపు అని, పోలీసులకు కులం ఉంటుందా? అని ప్రశ్నించారు. పుంగనూరు మారణకాండలో బాబును మొదటి ముద్దాయిగా పరిగణించాలని, అంగళ్లు, పుంగనూరులో పోలీసులపై దాడులు చేశారని అన్నారు.

1995 నుంచి రాయలసీమకు నీళ్లు ఇవ్వకుండా చంద్రబాబు ఏం చేశారని పేర్ని నాని ప్రశ్నించారు. 35 ఏళ్లుగా గెలుస్తున్న పెద్దిరెడ్డి నిజంగా మొగాడేనని, పోలీసులపై దాడులు చేసి కాల్పులు జరగాలని చంద్రబాబు చూశారని పేర్ని నాని ఆరోపించారు. పోలీసులకు అండగా వైసీపీ ఉంటుందన్నారు. లోకేష్ పోలీసుల సంగతి చూస్తారా..? పోలీసులు లేకుంటే గడపదాటి అడుగు పెట్టరని విమర్శించారు. చంద్రబాబు అధికారంలోకి వస్తే ఏమీ చేయరన్నారు. అటు చిరంజీవి కామెంట్స్‌పై మంత్రి అంబటి రాంబాబు సెటైర్లు వేశారు. బ్రో సినిమాలో తన క్యారెక్టర్ పెట్టారో లేదో చిరంజీవి చెప్పాలని ప్రశ్నించారు. చిరంజీవి ఏం మాట్లాడారో చూసి రేపు మాట్లాడతానని తెలిపారు. తమ్ముడు తనవాడైనా ధర్మం చెప్పాలని అన్నయ్యగారు అంటూ అంబటి వ్యాఖ్యానించారు.