బిడ్డపై సామూహిక హత్యాచారం.. కుమార్తె చితిలోకి దూకిన తండ్రి

సామూహిక హత్యాచారానికి గురైన తన కుమార్తెకు అంత్యక్రియలు నిర్వహిస్తుండగా.. తండ్రి ఆమె చితిలోకి దూకి ఆత్మహత్యాయత్నం చేసిన ఘటన రాజస్థాన్‌లోని భిల్వారాలో సోమవారం చోటుచేసుకుంది. భిల్వారా జిల్లాలో ఆగస్టు 2న 14 ఏళ్ల మైనర్ బాలికపై సామూహిక అత్యాచారానికి పాల్పడిన కామాంధులు.. అత్యంత కిరాతకంగా ఆమె హత్య చేశారు. అనంతరం మృతదేహాన్ని బొగ్గుల కొలిమిలో కాల్చి, శరీర భాగాల్ని ఓ చెరువులో విసిరేశారు. గుర్తుపట్టలేని విధంగా లభ్యమైన ఆ మృతదేహానికి కుటుంబసభ్యులు అంత్యక్రియలు నిర్వర్తిస్తుండగా.. అప్పటి వరకూ మౌనంగా రోదించిన ఆ తండ్రి హృదయం ఆ సమయంలో తల్లడిల్లిపోయింది.

అల్లారుముద్దుగా పెంచుకున్న తన బంగారు తల్లికి జరిగిన అన్యాయాన్ని భరించలేకపోయాడు. ఆమెతో పాటు తాను కూడా కాలిపోయేందుకు చితిలోకి దూకాడు. అయితే, అక్కడ ఉన్నవారు వెంటనే అతడిని బయటికి లాగి చికిత్స కోసం ఆస్పత్రికి తరలించారు. ప్రస్తుతం ఆ తండ్రి పరిస్థితి నిలకడగానే ఉందని, ప్రాణాలకు ప్రమాదం లేదని వైద్యులు వెల్లడించారు. అక్కడున్నవారు తక్షణమే స్పందించడంతో అతడికి ప్రాణాపాయం తప్పిందని భిల్వారా జిల్లా ఆస్పత్రి డైరెక్టర్ డాక్టర్ అరుణ్ గౌర్ వెల్లడించారు.

మరోవైపు, సామూహిక అత్యాచార ఘటనలో ఆరుగురు పురుషులు, నలుగురు మహిళల్ని నిందితులుగా గుర్తించినట్టు పోలీసులు తెలిపారు. కేసు నమోదుచేసి ఐదుగురిని అరెస్టు చేశామని వివరించారు. కేసులో నిర్లక్ష్యంగా వ్యహరించిన కోట్రా పోలీసు స్టేషన్‌ అసిస్టెంట్‌ సబ్‌-ఇన్‌స్పెక్టర్‌పై సస్పెన్షన్‌ వేటు వేసినట్టు పేర్కొన్నారు. ఇది అత్యంత అరుదైన కేసు అని, నిందితులందరికీ ఉరిశిక్ష పడేలా చూస్తామని భిల్వారా ఎస్పీ ఆదర్శ్‌ సిద్ధూ హామీ ఇచ్చారు. ఆగస్టు 2న బాలిక పశువులను మేపడానికి వెళ్లి అదృశ్యం కాగా.. రెండు రోజుల తర్వాత గ్రామ సమీపంలోని చెరువులో సగం కాలిన శరీర భాగాలు లభ్యమయ్యాయి. సామూహిక అత్యాచారానికి పాల్పడిన దుండగులు.. ఆమెను చంపి ఆధారాలు దొరక్కుండా చేసేందుకు ప్రయత్నించారు.