విమానంలో 40 పల్లీ ప్యాకెట్లు కొన్న ప్రయాణికురాలు,,,ఎలర్జీ ఉందని చెప్పినా వినిపించుకోని క్యాబిన్ సిబ్బంది

ఆ మహిళకు పల్లీలంటే అలర్జీ.. కానీ, విమానం ఎక్కిన తర్వాత వాటిని ఆమె బలవంతంగా కొనాల్సి వచ్చింది. ఒకటి రెండు కాదు ఏకంగా 48 ప్యాకెట్లను ఆమెతో విమాన సిబ్బంది కొనిపించారు. అంతేకాదు, విమాన టిక్కెట్ ధర కంటే పల్లీకే మూడు రెట్లు ఎక్కువ చెల్లించింది. జర్మనీ నుంచి లండన్‌కు ప్రయాణించిన బాధితురాలు తనకు ఎదురైన ఈ అనుభవాన్ని మీడియాతో పంచకుంద. ది ఇండిపెడెంట్ కథనం ప్రకారం.. దక్షిణ ఇంగ్లాండ్‌లోని హాంప్‌షైర్‌కు చెందిన 27 ఏళ్ల లేహ్ విలియం అనే మహిళ జర్మనీ నుంచి లండన్‌కు యూరోవింగ్ విమానంలో ప్రయాణించింది.

క్యాబిన్ సిబ్బంది ఆమె వద్దకు వచ్చి పల్లీ ప్యాకెట్లు కొనాలని ఒత్తిడి చేశారు. ఆమె వద్దని చెప్పినా వినిపించుకోలేదు. దీంతో ప్రతి ఒక్క ప్యాకెట్ కొనడం తప్ప తనకు వేరే మార్గం లేదని వాపోయింది. మొత్తం 48 పల్లీ ప్యాకెట్ల కోసం 144 యూరోలు (సుమారు రూ. 13,088) వెచ్చించాల్సి వచ్చిందని ఆవేదన వ్యక్తం చేసింది. ఆమె బడ్జెట్ విమాన టిక్కెట్‌కు చెల్లించిన 50 యూరోల కంటే దాదాపు మూడు రెట్లు ఎక్కువ.

డిజైనర్‌గా ఉద్యోగం చేస్తోన్న లేహ్ విలియమ్.. విమానంలో ఉన్నప్పుడు పల్లీ ప్యాకెట్‌ని కనీసం తెరిచే ప్రయత్నం చేయలేదు. ఎందుకంటే ఒకసారి విమానంలో ప్రయాణిస్తూ పల్లీ ప్యాకెట్ కొనుగోలు చేసి తినడానికి తెరవగా చేతులకు దద్దుర్లు వచ్చాయి. దీంతో అప్పటి నుంచి విమానంలో పల్లీ ప్యాకెట్ చూస్తే భయపడిపోతుంది. ఈసారి కూడా ఆమె ఎలాంటి ఛాన్స్ తీసుకోలేదు. విలియమ్స్ మాట్లాడుతూ.. దీనిపై ఎయిర్‌లైన్స్ సిగ్గుపడాలని, తాను కొనుగోలుచేసిన పల్లీ ప్యాకెట్ల సొమ్మును వాపస్ ఇవ్వాలని ఆమె డిమాండ్ చేశారు.

ఈ వ్యవహారంపై స్పందించిన యూరోవింగ్స్ ప్రతినిధి మాట్లాడుతూ.. ‘బాధితురాలికి కలిగిన అసౌకర్యానికి చింతిస్తున్నాం.. కానీ, ముందు ఒక విషయం తెలుసుకోవాలి.. లేహ్ విలియమ్స్ అన్ని ప్యాకెట్లు కొనుగోలు చేయమని బలవంతం చేయలేదు... మా సిబ్బంది ఆమెకు అలెర్జీ ఉన్న విషయం గురించి చుట్టూ ఉన్న ప్రయాణీకులందరికీ తెలియజేసి ప్రత్యామ్నాయ పరిష్కారాన్ని అందించడానికి ప్రయత్నించారు.. ఇష్టపూర్వకంగానే ప్యాకెట్లు కొన్నారు.’ అని తెలిపారు.

కొన్నిసార్లు అలర్జీ కలిగించే వేరుశెనగ వంటి ఆహార పదార్థాలు విమానంలో ఉంచబోమని ప్రయాణికులకు హామీ ఇవ్వలేమని ఎయిర్‌లైన్ తెలిపింది. అంతేకాదు, ప్రయాణికులు తమ వెంట అలెర్జీ ఔషదాలను తీసుకురావాలని, దీని గురించి క్యాబిన్ సిబ్బందికి ముందుగానే తెలియజేయాలని కోరింది. ‘విమానంలో ఇబ్బంది లేదా అలెర్జీ వంటి సమస్యలు తలెత్తితే అత్యవసర చికిత్సను అందించడానికి వైద్యపరంగా శిక్షణ పొందిన క్యాబిన్ సిబ్బంది, మందులు ఎల్లప్పుడూ అందుబాటులో ఉంటాయని అధికార ప్రతినిధి పేర్కొన్నారు.