చాక్లెట్‌లో మనిషి వేలు చూసి మహిళ షాక్,,,,అధికారుల దర్యాప్తు

చాక్లెట్ అంటే ఇష్టం ఉండని వారు ఉండరు అంటే అతిశయోక్తి కాదు. చాక్లెట్లు కనిపిస్తే వెంటనే కడుపులో పడేసేవారు చాలా మంది ఉంటారు. ఇక చిన్న పిల్లలైతే రోజూ చాక్లెట్లు తినంది ఊరుకోరు అనేది అందరికీ తెలుసు. లవర్స్ అయితే తమ భాగస్వాములకు చాక్లెట్లు ఇచ్చి ఇంప్రెస్ చేస్తూ ఉంటారు. అయితే ఇలా అందరూ ఇష్టంగా లాగించే చాక్లెట్‌ను చూసి ఓ మహిళ భయపడింది. ఎందుకంటే ఆమె తిన్న చాక్లెట్‌లో మనిషి వేలు కనిపించింది. దీంతో ఒక్కసారిగా భయాందోళనకు గురైన ఆ మహిళ.. వెంటనే ఆస్పత్రికి పరిగెత్తి చికిత్స తీసుకుంది. ఈ విషయం తెలిసిన ఫుడ్ కార్పొరేషన్ అధికారులు ఆ చాక్లెట్‌ను తీసుకెళ్లి పరిశీలించారు. అందులో ఉన్న వేలు మనిషిదేనా లేక వేరే ఇతర ఏదైనా వస్తువా అనే దాన్ని నిర్ధారించనున్నారు. ఈ ఘటన శ్రీలంకలో జరిగింది.

శ్రీలంకలోని ఉవా ప్రావిన్స్‌లో ఈ సంఘటన చోటు చేసుకుంది. స్థానికంగా ఉన్న మహియాంగనయ ఆస్పత్రిలో ఓ మహిళ ఈసీజీ విభాగంలో పనిచేస్తోంది. అయితే ఆగస్టు 3 వ తేదీన ఆస్పత్రిలోని క్యాంటీన్‌లో చాక్లెట్‌ బార్‌ను కొనుగోలు చేసింది. కొంత తిని మిగిలిన సగాన్ని ఫ్రిజ్‌లో దాచిపెట్టింది. ఆ తర్వాత ఆగస్టు 8 వ తేదీన.. ఫ్రిజ్‌లో ఉన్న సగం చాక్లెట్‌ను తీసి తినడం ప్రారంభించింది. ఈ సమయంలోనే అందులో ఏదో ఉన్నట్లు గుర్తించింది. తన పళ్ల మధ్యలో ఏదో ఇరుక్కున్నట్లు ఆమెకు అనిపించింది. అయితే అది చాక్లెట్‌లో ఉండే నట్స్ అని భావించింది. అయితే దాన్ని కొరికినా గట్టిగా అలాగే ఉండటంతో ఆమెకు అనుమానం వచ్చి బయటికి తీసింది. అది చూసి ఆమె షాక్‌కు గురైంది.

ఆ చాక్లెట్‌లో మనిషి వేలు కనిపించడంతో ఆ మహిళ ఖంగుతింది. వెంటనే తోటి సిబ్బందికి సమాచారం అందించింది. అనంతరం మహియాంగనాయ మెడికల్ ఆఫీసర్ కార్యాలయంలో ఫిర్యాదు చేసింది. అదే ఆస్పత్రిలో చికిత్స తీసుకుంది. ఈ ఘటనపై ఫిర్యాదు అందుకున్న స్థానిక పబ్లిక్ హెల్త్ ఇన్‌స్పెక్టర్లు.. ఆ మహిళ తినగా మిగిలిన చాక్లెట్‌ సహా క్యాంటీన్‌లో ఉన్న అన్ని చాక్లెట్లను స్వాధీనం చేసుకుని విచారణ చేపట్టారు. దీనిపై స్థానికంగా ఉన్న మేజిస్ట్రేట్ కోర్టులో పబ్లిక్ హెల్త్ ఇన్‌స్పెక్టర్లు సోమవారం నివేదిక సమర్పించారు. అయితే ఆ చాక్లెట్‌లో ఉన్నది మనిషి వేలేనా లేక ఏదైనా ఇతర వస్తువా అనేది తెలియాలంటే దాన్ని కొలంబో లేబొరేటరీకి పంపిస్తామని పబ్లిక్ హెల్త్ ఇన్‌స్పెక్టర్ సల్మాన్ తెలిపారు. అయితే ఈ ఘటన జరిగిన తర్వాత ఆ చాక్లెట్‌ కంపెనీకి సమాచారం అందించడంతో సిబ్బంది వచ్చి జరిగిన ఘటన గురించి తెలుసుకున్నారు. అనంతరం ఈ ఘటనపై చాక్లెట్ ఫ్యాక్టరీ సిబ్బంది.. వైద్య, ఆరోగ్య శాఖ కార్యాలయానికి పూర్తి వివరణ ఇచ్చారు. ఇలాంటి ఘటన జరగడం శ్రీలంకలో ఇదే తొలిసారి అని పబ్లిక్ హెల్త్ ఇన్‌స్పెక్టర్ సల్మాన్ వెల్లడించారు. ఆహార పదార్థాల్లో సాధారణంగా కీటకాలు, పురుగులు వచ్చేవని.. ఇది మాత్రం మొదటి సారి అని తెలిపారు. దీనిపై కఠిన చర్యలు తీసుకుంటామని చెప్పారు.