వచ్చే ఎన్నికల్లో జనసేన జెండా ఎగురుతుంది: పవన్ కళ్యాణ్

గాజువాకలో ఓటమిపై జనసేన అధినేత పవన్ కల్యాణ్ మరోసారి స్పందించారు. గాజువాక తన నియోజకవర్గమని, మన నియోజకవర్గమని తెలిపారు. వచ్చే ఎన్నికల్లో గాజువాకలో జనసేన జెండా ఎగురుతుందని ఆశాభావం వ్యక్తం చేశారు. తనను ఓడించి దోపిడీ చేసే వైసీపీని గెలిపించారని వ్యాఖ్యానించారు. జగన్ దోపిడీ చేస్తారని తెలిసినా 151 సీట్లు ఇచ్చారని, వైసీపీ అధికారంలోకి వచ్చిన నెలలోనే భవన కార్మికులు రోడ్డున పడ్డారని అన్నారు. అంబేద్కర్ ఆశయాలతో రాజకీయాల్లోకి వచ్చానని, వెనక్కి తగ్గనని తెలిపారు.

పోరాటం ఎలా చేయాలో ఉత్తరాంధ్ర తనకు నేర్పిందని పవన్ చెప్పారు. ఎన్నో పోరాటాలు చేస్తేనే విశాఖ స్టీల్ ప్లాంట్ వచ్చిందని, ఎంతోమంది ప్రాణాలు అర్పించారని అన్నారు. విశాఖ స్టీల్‌ప్లాంట్ రాష్ట్రానికి గుండెకాయ లాంటిదని, భూములిచ్చినవారిలో ఇంకా సగం మందికి పరిహారం కూడా రాలేదని గుర్తు చేశారు. పరిశ్రమల కోసం భూములు ఇచ్చినవారు రోడ్డుపై పడ్డారన్నారు. ప్రజల కోసం నిలబడలేని వాళ్లు రాజకీయాల్లోకి రావొద్దని సూచించారు. 2018లో ఇక్కడి ఎంపీపై రౌడీషీటర్ ఉందని, రౌడీషీటర్‌ను ఎంపీగా ఎన్నుకుంటే ప్రజల కోసం వారేం చేస్తారని ప్రశ్నించారు. స్టీల్‌ప్లాంట్ ప్రైవేటీకరణ వద్దని చెప్పే దమ్ము రౌడీషీటర్లకు ఉంటుందా? అని ప్రశ్నించారు.

'వైసీపీ నేతలకు పార్లమెంట్‌లో ప్లకార్డు ప్రదర్శించే దమ్ముందా..? స్టీల్‌ప్లాంట్ ప్రైవేటీకరణ చేయవద్దని అమిత్ షాకు చెప్పాను. స్టీల్ ప్లాంట్‌పై ప్రత్యేక దృష్టి సారించాలని కేంద్ర పెద్దలకు చెప్పా. ప్లాంట్‌కు సొంత గనులు కేటాయించాలని సూచించా. ప్రజల కోసం పోరాటం చేసేవారినే ఎన్నుకోవాలి. కేసులు ఉన్నవారికి ప్రశ్నించడానికి ధైర్యం ఎలా వస్తుంది.? నిస్వార్ధంగా ప్రజల కోసం నిలబడేవారికే ధైర్యం ఉంటుంది. ఏపీ ఎంపీలంటే ఢిల్లీ పెద్దలకు చాలా చులకన.. దోపిడీ చేసి ఎంపీలు అయ్యారని కేంద్ర పెద్దలకు తెలుసు. ఒడిశా, తమిళనాడు ఎంపీలను చూసి వైసీపీ ఎంపీలు నేర్చుకోండి. రాష్ట్రానికి పరిశ్రమలు ఎందుకు తేలేకపోతున్నారు?' అని పవన్ ప్రశ్నించారు.

'వచ్చే ఎన్నికల్లో ఆలోచించి ఓటేయండి.. డబ్బు తీసుకుని ఓటు వేస్తే నేనేమీ చేయలేను. విభజన వేళ స్టీల్‌ప్లాంట్‌కు గనులు కేటాయించాలని ఒక్క ఎంపీ అడగలేదు. ప్రజల మద్దతు లేకపోతే నేనేం చేయలేను. రౌడీ ఎంపీ ఏం చేస్తారు? క్రైస్తవ సంస్థల భూమి దోచుకుంటారు? గంగవరం పోర్టు వద్ద పోలీస్ కాల్పుల్లో మత్స్యకారుడు చనిపోయాడు. గంగవరం పోర్టు నిర్వాసితులకు ఇంకా న్యాయం చేయలేదు. ఏ పదవి లేని నేనే ప్రధాని, హోంమంత్రి వద్దకు వెళ్తున్నా. స్వార్థం లేకుండా ఉంటే ప్రధాని ప్రధాని, హోంమంత్రి అన్నీ వింటారు. జగన్‌ను మరో ఆరు నెలలు ప్రజలు భరించాలి' అని పవన్ అన్నారు.