హిందూ ఆలయాలపై ఖలీస్థానీలు దాడులు,,,కెనడాలో హత్యకు గురైన ఉగ్రవాది నిజ్జాార్

కెనడాలో మరోసారి రెచ్చిపోయిన ఖలీస్థాన్ మద్దతుదారులు.. దేవాలయంపై దాడికి పాల్పడ్డారు. బ్రిటిష్ కొలంబియాలోని అతి పురాతన ఆలయాల్లో ఒకటైన సర్రె లక్ష్మి నారాయణ ఆలయంలోకి శనివారం రాత్రి చొరబడి ధ్వంసం చేశారు. ఆలయ గోడలు, గేటుపై ఖలీస్థాన్ మద్దతు పోస్టర్లను అతికించారు. ఖలీస్థాన్ తీవ్రవాది హర్దీప్ సింగ్ నిజ్జార్ హత్యలో భారత్ పాత్రపై కెనడా దర్యాప్తు చేపట్టాలని డిమాండ్ చేస్తూ పోస్టర్లను వేశారు. మాస్క్‌లు వేసుకున్న ఇద్దరు వ్యక్తులు.. ఆలయ గోడలు, గేటుపై పోస్టర్ల అతికిస్తున్న దృశ్యాలు అక్కడి సీసీటీవీ కెమెరాల్లో రికార్డయ్యాయి.

ఖలిస్తాన్ టైగర్ ఫోర్స్, కెనడియన్ ఆర్మ్ ఆఫ్ సిక్ ఫర్ జస్టిస్ కి నేతృత్వం వహించిన ఉగ్రవాది హర్దీప్ సింగ్ నిజ్జర్ ఈ ఏడాది జూన్‌ 18న గుర్తుతెలియని దుండగుల కాల్పుల్లో హతమయ్యాడు. కాగా, ఈ ఏడాది కెనడాలో హిందూ ఆలయాలను ధ్వంసం చేసిన ఘటన ఇది నాలుగోది. జనవరిలో బ్రాంప్టన్‌లోని దేవాలయాన్ని ధ్వంసం చేసి భారత వ్యతిరేక నినాదాలు రాశారు. ఫిబ్రవరిలో మిస్సిసాగాలోని రామమందిరంపై దాడి చేయగా.. ఏప్రిల్‌లో ఒంటారియోలో స్వామినారాయణ దేవాలయం ధ్వంసం చేశారు.

కెనడాలో ఖలిస్థాన్ మద్దతుదారుల కార్యకలాపాలు తీవ్రమవుతున్నాయని భారత్ ఆందోళన వ్యక్తం చేసింది. వివిధ దేశాల్లో ఖలీస్థాన్ వేర్పాటువాద సెంటిమెంట్‌ను రెచ్చగొట్టేందుకు ప్రయత్నిస్తున్న సంస్థలు, వ్యక్తులపై కేంద్రం ఉక్కుపాదం మోపింది. గత నెల కెనడాలో పలువురు సీనియర్ భారతీయ దౌత్యవేత్తలను ‘కిల్లర్స్’గా పేర్కొంటూ పోస్టర్లు వెలిశాయి. దీనిపై విదేశాంగ మంత్రి ఎస్ జైశంకర్ స్పందిస్తూ.. ఖలిస్థాన్ ఉగ్రవాద భావజాలానికి వేదికలగా మారడానికి సహకరించవద్దని కెనడా, యూకే, అమెరికాతో సహా భాగస్వామ్య దేశాలకు పిలుపునిచ్చారు. ఇది అంతర్జాతీయ సంబంధాలకు హానికరం అని స్పష్టం చేశారు.

ఖలిస్థాన్ మద్దతుదారులకు కెనడా ఆశ్రయం కల్పించడంపై భారత్ తీవ్ర ఆగ్రహం వ్యక్తం చేస్తోంది. వారి పట్ల ట్రూడో ప్రభుత్వం మెతక వైఖరి అవలంభిస్తోన్న భారత్ వాదనలను ఆ దేశ ప్రధాని తోసిపుచ్చారు. ఎల్లప్పుడూ హింసాత్మక బెదిరింపులను తాము అత్యంత తీవ్రంగా తీసుకుంటామని అన్నారు. ‘మేము ఎల్లప్పుడూ తీవ్రవాదంపై తీవ్రమైన చర్యలు తీసుకున్నాం.. ఇకపై అదే చేస్తాం’ అని కెనడా ప్రధాని ట్రూడో చెప్పారు. కాగా, ఆస్ట్రేలియాలోని హిందూ ఆలయాలపై కూడా ఇటీవల ఖలీస్థానీలు దాడి చేసిన విషయం తెలిసిందే. బ్రిస్బేన్‌లో ప్రఖ్యాత హిందూ ఆలయంపై దాడి చేశారు. శ్రీలక్ష్మీనారాయణ ఆలయ గోడలను ధ్వంసం చేసి.. ఖలీస్థాన్ అనుకూల నినాదాలను గోడలపై రాశారు.