హీరో అక్షయ్‌ కుమార్‌కు భారతీయ పౌరసత్వం

బాలీవుడ్ నటుడు అక్షయ్ కుమార్  ఈసారి స్వాతంత్య్ర దినోత్సవాన్ని మరింత ప్రత్యేకంగా జరుపుకొంటున్నారు. ఎందుకంటే ఆయనకు భారతీయ పౌరసత్వం వచ్చింది. అవును. మీరు చదివింది కరెక్టే. కొన్నేళ్లుగా ఆయన పౌరసత్వం విషయంలో విమర్శలు ఎదుర్కొంటున్నారు. ఎట్టకేలకు భారతీయ పౌరసత్వం లభించింది. దీంతో తన ఆనందం వ్యక్తం చేస్తూ ప్రత్యేక ట్వీట్ చేశారు అక్షయ్ కుమార్. ‘నా మనస్సూ.. పౌరసత్వం.. ఇప్పుడు రెండూ హిందుస్థానీ. స్వాతంత్య్ర దినోత్సవ శుభాకాంక్షలు’ అని అక్షయ్ ట్వీట్ చేశారు.

2019 ఎన్నికలకు ముందు ప్రధాని నరేంద్ర మోదీని అక్షయ్‌ కుమార్ ప్రత్యేక ఇంటర్వ్యూ చేశారు. అప్పట్లో ఈ ఇంటర్వ్యూ బాగా పాపులర్ అయ్యింది. అదే సమయంలో పౌరసత్వం విషయంలో అక్షయ్‌ కుమార్‌పై తీవ్ర విమర్శలు వచ్చాయి. భారతీయులందరూ ఓటు హక్కు వినియోగించుకోవాలని అక్షయ్ కుమార్ అప్పట్లో కోరారు. అయితే, ఓటు హక్కు లేని వ్యక్తి భారత పౌరులకు ఓటింగ్‌ కోసం పిలుపు ఇవ్వడం ఏంటని అక్షయ్‌ని ప్రశ్నిస్తూ కొంత మంది పోస్టులు చేశారు. దీంతో ఆయన పౌరసత్వం విషయం తెరపైకి వచ్చింది. దీనిపై ఆయన వివరణ ఇచ్చారు.

తనకు కెనడా పౌరసత్వం ఉందన్న విషయాన్ని అక్షయ్ కుమార్ గతంలో చెప్పారు. కెనడా పౌరసత్వం తీసుకోవడానికి గల కారణాన్ని కూడా వివరించారు. ‘1990ల్లో గడ్డు పరిస్థితులు ఎదుర్కొన్నా. వరుసగా 15 సినిమాలు ఫెయిల్ అయ్యాయి. కెనడాలో ఉన్న స్నేహితుడి సూచనతో అక్కడికి వెళ్లి పని చేయాలని నిర్ణయించుకున్నా. అందుకోసం పాస్‌పోర్ట్‌కు దరఖాస్తు చేశా. కెనడా పాస్‌పోర్ట్‌ వచ్చింది’ అని అక్షయ్ కుమార్ తెలిపారు. (కెనడా పాస్‌పోర్ట్ వచ్చిందంటే.. అప్పటికే కెనడా పౌరసత్వం కూడా వచ్చిందని అర్థం)

కెనడా పాస్‌పోర్టుకు సంబంధించిన ప్రక్రియ కొనసాగుతుండగానే.. అప్పటికే తాను నటించిన రెండు సినిమాలు సక్సెస్‌ఫుల్‌గా ఆడాయని, దీంతో కెనడాకు వెళ్లాల్సిన అవసరం రాలేదని అక్షయ్ చెప్పుకొచ్చారు. కానీ, ఆ తర్వాత పాస్‌పోర్ట్‌ విషయం మరిచిపోయానని చెప్పారు. 2019లో ప్రధాని మోదీని ఇంటర్వ్యూ చేసిన తర్వాత తనపై పెద్ద ఎత్తున విమర్శలు రావడంతో వెంటనే భారత పౌరసత్వం కోసం అక్షయ్ దరఖాస్తు చేసుకున్నారు. తాజాగా తనకు భారతీయ పౌరసత్వం వచ్చినట్లు వెల్లడిస్తూ ఆయన తన సంతోషాన్ని అభిమానులతో పంచుకున్నారు.