ప్రస్తుత ప్రభుత్వాన్ని మార్చే విధంగా పొత్తులుంటాయి....పవన్ కళ్యాణ్

 సీఎం పదవిపై తన ఆసక్తిని ఇప్పటికే చెప్పానని, పొత్తులపై చర్చలు జరుగుతున్నాయని జనసేన అధినేత పవన్ కళ్యాణ్  అన్నారు. టీడీపీ, జనసేననా? లేక బీజేపీతో కలిసి వెళ్లడమా? అనే దానిపై చర్చలు జరుగుతున్నాయని స్పష్టం చేశారు. ప్రతి పనికి రేట్ కార్డులు పెట్టి వైసీపీ నేతలు వసూళ్లకు పాల్పడుతున్నారని, రాష్ట్రాన్ని పన్నుల మయం చేశారన్నారు. గ్రీన్ ట్యాక్స్ పేరుతో వేల రూపాయలు వసూళ్లు చేస్తున్నారని ఆరోపించారు.

విశాఖలో ఏర్పాటు చేసిన మీడియా సమావేశంలో వైసీపీ సర్కార్‌పై పవన్ మండిపడ్డారు. విశాఖపై ప్రేమతో పాలకులు రాజధాని అని చెప్పడం లేదని, 2004 నుంచి కొన్న భూముల కోసమే విశాఖకు వస్తున్నారని విమర్శించారు. అభివృద్ది చేయడానికి రాయలసీమలో అవకాశం లేదని, ఉత్తరాంధ్ర వనరులను దోపిడీ చేస్తే అడిగేవారే లేరని ఆరోపించారు. ఉత్తరాంధ్రలో భూముల దోపిడీ పెరిగిపోయిందని, వైసీపీ నేతలు ఉత్తరాంధ్ర వనరులను దోచేస్తున్నారన్నారు. లాటరైట్ అని చెప్పి బాక్సైట్ తవ్వుకుంటున్నారని, రాష్ట్రం నేరాలకు నిలయంగా మారిందన్నారు. జగన్ వ్యాపారిగా మారిపోయారని, క్రిమినాలిటీని వ్యవస్థీకృతం చేశారని ఆరోపించారు.

బ్రిటీష్ వాళ్లలా వైఎస్ జగన్ ప్రజలను విభజించి పాలిస్తున్నారని, మైనింగ్ దోపిడీ పెరిగిపోయిందని పవన్ అన్నారు. చిత్తూరులో ఒకేరోజు చాలామంది బాలికలు అదృశ్యం అయ్యారని, దర్యాప్తు చేయాలని కోరితే ఏమీ జరగనట్లే మాట్లాడుతున్నారన్నారు. ఏ ఆధారాలతో మాట్లాడుతున్నారని అంటున్నారని, పీఎస్ వరకు రాకముందే చాలా పిటిషన్లు తన దగ్గరకు వస్తున్నాయని తెలిపారు. దీనిపై ప్రశ్నిస్తే తల్లిదండ్రుల పెంపక లోపమని చెబుతున్నారన్నారు. తాడేపల్లిలో కూడా నేరాలు పెరిగిపోయాయని, బాధితులు పోలీసుల దగ్గరకు పోతే పట్టించుకోవడం లేదన్నారు.

'బీహార్ కంటే ఏపీ నేరాల కేంద్రంగా మారింది. విశాఖ జిల్లాలో 271 ఎకరాల్లో తవ్వకాలు జరిపి కడప సిమెంట్ కర్మాగారానికి పంపుతున్నారు. ఖనిజాల తవ్వకాలతో పర్యావరణం తీవ్ర స్థాయిలో విధ్వంసం అవుతుంది. తూర్పు గోదావరి జిల్లా ఏజెన్సీలో లాటరైట్ తవ్వకాలు జరుగుతున్నట్లు గిరిజనులు చెబుతున్నారు' అని పవన్ ఆరోపించారు.

కాగా విశాఖపట్నంలో పవన్ మూడో విడత వారాహి విజయ యాత్ర ముగిసింది. ఈ యాత్రలో భాగంగా వారం రోజుల పాటు విశాఖలో పవన్ పర్యటించారు. విశాఖపట్నంలోని జగదాంబ సెంటర్, గాజువాక నియోజకవర్గంలో బహిరంగ సభలు నిర్వహించారు. అలాగే రుషికొండ, భీమిలిలోని ఎర్రమట్టి దిబ్బలతో పాటు నర్సన్నపేట భూ ఆక్రమణలను పరిశీలించారు. నేటితో పవన్ మూడో విడత యాత్ర ముగియగా.. ఈ సందర్భంగా మీడియా సమావేశం ఏర్పాటు చేశారు.