కొడుకు ప్రేమ పెళ్లి,,,,పార్టీ రాష్ట్ర ఉపాధ్యక్ష పదవి నుంచి తండ్రిని సస్పెండ్ చేసిన బీజేపీ

కుమారుడు ప్రేమ పెళ్లి చేసుకున్నాడని తండ్రిపైనే పార్టీ వేటు వేసింది. రాష్ట్ర ఉపాధ్యక్ష హోదా నుంచి తప్పించి పార్టీ నుంచి సస్పెండ్ చేసింది. ఈ ఘటన లద్ధాఖ్‌లో చోటు చేసుకుంది. అయితే తన కుమారుడి మతాంతర వివాహంలో తన ప్రమేయం ఏదీ లేదని ఆ తండ్రి ఎంత మొత్తుకున్నా పార్టీ పట్టించుకోలేదు. లద్ధాఖ్ బీజేపీ ఉపాధ్యక్షుడిగా ఉన్న 74 ఏళ్ల నాజీర్ అహ్మద్‌ను ఆ పార్టీ బహిష్కరించింది. దీంతోపాటు నాజీర్ అహ్మద్ పార్టీ ప్రాథమిక సభ్యత్వాన్ని కూడా రద్దు చేసింది. పార్టీ ఎగ్జిక్యూటివ్ మెంబర్స్ ఈ నిర్ణయం తీసుకున్నట్లు లద్ధాఖ్ బీజేపీ విభాగం తాజాగా ఓ ప్రకటన విడుదల చేసింది. అయితే దీనంతటికీ కారణం నాజీర్ అహ్మద్ కుమారుడు.. ఇంటి నుంచి పారిపోయి బౌద్ధ మతానికి చెందిన యువతిని పెళ్లి చేసుకోవడమే. అయితే నాజీర్ అహ్మద్‌కు ఒక అవకాశం ఇస్తున్నామని బీజేపీ పేర్కొంది. తన కుమారుడు ఇంటి నుంచి వెళ్లిపోయి.. బౌద్ధ మతానికి చెందిన యువతిని పెళ్లి చేసుకునే విషయంలో నాజీర్ అహ్మద్ ప్రమేయం లేదని నిరూపించుకోవాలని షరతు పెట్టింది.

అయితే ఇంటి నుంచి పారిపోవడం, ఇతర మతాలవారిని పెళ్లి చేసుకోవడం లద్ధాఖ్‌లోని అన్ని మతాల వారు ఆమోదించరు. అలా చేస్తే లద్ధాఖ్‌లో నివసించే వివిధ మతాల మధ్య శాంతి, సామరస్యం, ఐక్యత దెబ్బతింటుందని నమ్ముతారని బీజేపీ వెల్లడించింది. అయితే ఈ ఘటనపై బీజేపీ నుంచి బహిష్కరణకు గురైన నాజీర్ అహ్మద్ వివరణ ఇచ్చుకున్నారు. అయితే కుమారుడి ప్రేమ వివాహం గురించి తనకు ఎలాంటి సమాచారం లేదని చెప్పారు. వారి లవ్ మ్యారే‌జ్‌కు తాను వ్యతిరేకమని వివరించారు. తనతోపాటు తన కుటుంబ సభ్యులు ఎవరు కూడా ఈ పెళ్లికి అనుమతి ఇవ్వలేదని.. తమకు అసలు ఇష్టం లేదని వెల్లడించారు. అయితే తాను ఇటీవల హజ్ యాత్రకు వెళ్లానని.. ఆ సమయంలో ఈ పెళ్లి జరిగిందని తెలిపారు.

అయితే గత నెల రోజులుగా తన కుమారుడు.. అతనితోపాటు వెళ్లిన యువతి కోసం తాము వెతుకుతూనే ఉన్నామని చెప్పారు. వారు ఎక్కడున్నారనే విషయం తెలియడం లేదన్నారు. తన కుమారుడు ఎక్కడ ఉన్నారో కనిపెట్టలేకపోవడంతో తనను పార్టీ నుంచి తప్పుకోమన్నారని నాజీర్ అహ్మద్ ఆవేదన వ్యక్తం చేశారు. కుమారుడి కోసం శ్రీనగర్ సహా వివిధ ప్రాంతాలన్నీ వెతికానని.. కొడుకు ప్రేమ పెళ్లి చేసుకుంటే తనను ఎందుకు శిక్షిస్తున్నారో అర్థం కావడం లేదని వాపోయారు.