గాల్లో ఉన్న విమానం ఇంజిన్ నుంచి చెలరేగిన మంటలు,,,అత్యవసర ల్యాండింగ్

వేల అడుగుల ఎత్తులో ఉన్న సజావుగా సాగుతున్న ఆ విమాన ప్రయాణంలో అనుకోకుండా ఒక్కసారిగా మంటలు చెలరేగాయి. ఇంజిన్‌లో ప్రారంభమైన మంటలు క్రమంగా వ్యాపించి.. పెద్దగా చెలరేగాయి. దీంతో ఆ మంటలను చూసి అందులో ప్రయాణిస్తున్న వారంతా ప్రాణాలు అరచేతిలో పట్టుకుని బిక్కుబిక్కు మంటూ కూర్చున్నారు. ఈ ఘటనతో అప్రమత్తమైన పైలట్.. విమానాన్ని మళ్లీ వెనక్కి మళ్లించి.. ఎక్కడైతే టేకాఫ్ అయిందో అదే విమానాశ్రయంలో ల్యాండ్ చేశారు. ఎలాంటి ప్రమాదం జరగకపోవడంతో ఆ విమానంలోని ప్రయాణికులంతా ఊపిరిపీల్చుకున్నారు.

ఈ ఘటన అమెరికాలో సౌత్‌ వెస్ట్ ఎయిర్‌లైన్స్‌కు చెందిన బోయింగ్ 737 విమానంలో చోటు చేసుకుంది. టెక్సాస్‌ రాష్ట్రంలోని విలియం పి హాబీ ఎయిర్‌పోర్టు నుంచి ఈ బోయింగ్ 737 విమానం మెక్సికోలోని కాంకస్ ఇంటర్నేషనల్ ఎయిర్‌పోర్టుకు బయల్దేరింది. అయితే టేకాఫ్‌ అయిన తర్వాత కొంత సేపటికి విమానంలో మంటలు చెలరేగాయి. ఇంజిన్ నుంచి అగ్నికీలలు ఒక్కసారిగా ఎగిసిపడ్డాయి. వాటిని విమానంలోని సిబ్బంది, ప్రయాణికులు గుర్తించారు. వాటిని చూసి వారు తీవ్ర భయాందోళనకు గురయ్యారు. ఈ ఘటనతో అప్రమత్తమైన విమాన పైలట్.. ఎయిర్ ట్రాఫిక్ కంట్రోల్‌కు సమాచారం అందించారు. దీంతో ఆ విమానాన్ని టేకాఫ్ అయిన టెక్సాస్‌లోని విలియం పి హాబీ ఎయిర్‌పోర్టులోనే తిరిగి ల్యాండింగ్ చేయాలని నిర్ణయించారు.

ఈ ఘటనతో టేకాఫ్ అయిన 30 నిమిషాలకే ఆ విమానం అదే ఎయిర్‌పోర్టులో ల్యాండ్ అయింది. విమానానికి ఏ ప్రమాదం జరగకుండా సేఫ్‌గా ల్యాండ్ కావడంతో అందులో ఉన్న ప్రయాణికులు ఊపిరిపీల్చుకున్నారు. అయితే మంటలు రావడానికి ముందు ఏదో పేలినట్లు భారీ శబ్దం వినిపించిందని విమానంలోని ప్రయాణికులు వివరించారు. ఆ తర్వాత విమానం ఇంధనానికి సంబంధించి వాసన వచ్చినట్లు వెల్లడించారు. అయితే ఈ ఘటనపై సదరు సౌత్ వెస్ట్ ఎయిర్‌లైన్స్ సంస్థ వివరణ ఇచ్చింది. మెకానికల్‌ సమస్య రావడంతో ఈ పరిస్థితి తలెత్తిందని పేర్కొంది. విమానంలోని ప్రయాణికుల కోసం మరో విమానాన్ని ఏర్పాటు చేసి.. వారి గమ్యస్థానాలకు పంపించినట్లు తెలిపింది. అయితే విమానంలో మంటలు చెలరేగిన సమయంలో అందులో ఉన్న ప్రయాణికులు వీడియో తీశారు. ఆ వీడియోలను కాస్త సోషల్ మీడియాలో ఉంచడంతో తెగ వైరల్‌గా మారాయి. దీంతో నెటిజన్లు స్పందిస్తున్నారు. ఘోర ప్రమాదం నుంచి ఆ విమానంలోని ప్రయాణికులు అందరూ సురక్షితంగా బయటపడ్డారని కామెంట్లు చేస్తున్నారు. పైలట్ సమయస్ఫూర్తితో విమానాన్ని వెంటనే ల్యాండింగ్ చేసినందుకు అతడిని అభినందిస్తున్నారు.