తిరుమలకు 120 మైక్రాన్ల కంటే తక్కువైన ప్లాస్టిక్ వస్తువులు తీసుకురావొద్దు,,,మంత్రి పెద్దిరెడ్డి

తిరుమలలో చిరుతల సంచారంపై మంత్రి పెద్దిరెడ్డి రామచంద్రారెడ్డి స్పందించారు. చిరుతల దాడి ఘటనలు జరగకుండా పటిష్ట చర్యలు తీసుకుంటామని తెలిపారు. ఇటీవల చిరుత దాడిలో మృతి చెందిన చిన్నారి కుటుంబానికి ప్రభుత్వం తరపున రూ.5 లక్షల ఎక్స్‌గ్రేషియా అందించామని, జరిగిన ఘటన చాలా బాధాకరమని చెప్పారు. మ్యాన్ ఈటర్‌గా మారిన రెండు చిరుతలను తిరుపతిలోని ఎస్వీ జూపార్క్‌లోని ఉంచుతామని స్పష్టం చేశారు. టీటీడీ పరిధిలోని అటవీ ప్రాంతంలో సంఘటన జరిగిందని, ప్రభుత్వం తరపున పూర్తి స్థాయిలో టీటీడీకి సహకరిస్తామని పేర్కొన్నారు.

తిరుపతిలో పోల్యుషన్ కంట్రోల్ బోర్డు రీజనల్ ఆఫీస్, ల్యాబరేటరీని పెద్దిరెడ్డి రామచంద్రారెడ్డి శనివారం ప్రారంభించారు. ఈ సందర్భంగా ఆయన మాట్లాడుతూ.. తిరుమలలో 120 మైక్రాన్ల కంటే తక్కువగా ఉంటే ప్లాస్టిక్ వస్తువులపై నిషేధం విధించామని, భక్తులెవ్వరూ తిరుమలకు తీసుకురావొద్దని సూచించారు. తిరుమలకు వచ్చే భక్తులకు ప్లాస్టిక్‌పై అవగాహన కల్పిస్తున్నామని, పూర్తి స్థాయిలో ప్లాస్టిక్‌ను నియంత్రిస్తున్నామన్నారు. తిరుమల నడకమార్గంలో శాశ్వత ప్రాతపదికన కంచె ఏర్పాటు చేసే దిశగా టీటీడీ, అటవీశాఖ ఆలోచన చేస్తోందని, టీటీడీ దేవస్థానం నివేదిక వచ్చిన తర్వాత ఢిల్లీలో అటవీ డైరెక్టర్ జనరల్ అనుమతి తీసుకుంటామని పెద్దిరెడ్డి స్పష్టం చేశారు.

ఏపీ కాలుష్య నియంత్రణ మండలి బాగా పని చేస్తుందని, ఉద్యోగుల సంక్షేమం కోసం తాము కూడా పనిచేస్తున్నామని పెద్దిరెడ్డి తెలిపారు. త్వరలోనే ఖాళీ పోస్టులు భర్తీ చేస్తామని హామీ ఇచ్చారు. ఆక్వా పరిశ్రమలో ఆక్వా పొల్యూషన్ తగ్గిస్తున్నామన్నారు. 1974లో నీటి నియంత్రణ మండలి, 1981లో కాలుష్య నియంత్రణ మండలి, 1976లో కాలుష్య నియంత్రణ మండలి అమల్లోకి వచ్చినట్లు చెప్పారు. తిరుమతిలో ఏర్పాటు చేసిన కంట్రోల్ బోర్డు రీజనల్ ఆఫీస్, ల్యాబరేటరీ భవనానికి డాక్టర్ వైఎస్సార్ పర్యావరణ భవనంగా నామకరణం చేసినట్లు తెలిపారు. మొత్తం రూ.16.50 కోట్లతో 34 వేల చదరపు అడుగులతో ఈ నూతన కార్యాలయ భవనం నిర్మించామన్నారు. భవిష్యత్తులో జోనల్ కార్యాలయం తిరుపతిలో ఏర్పాటు చేసిన ఇదే భవనం సరిపోతుందని పెద్దిరెడ్డి తెలిపారు.

'సీఎం జగన్ పర్యావరణంపై ప్రత్యేక శ్రద్ద తీసుకుని మార్పులు తెచ్చారు. కొత్త పరిశ్రమలు పెద్దఎత్తున రాష్ట్రంలో ఏర్పాటు చేస్తున్నారు. ఎక్కడా కాలుష్యం లేకుండా కాలుష్య నియంత్రణ మండలి అనేక చర్యలు చేపట్టింది. వైసీపీ ప్రభుత్వం వచ్చాక కాలుష్య కారక వ్యర్థాల నియంత్రణలో చర్యలు చేపట్టాం. ల్యాబ్‌లో పరిశ్రమలు ఎలాంటి వ్యర్ధాలు విడుదల చేస్తున్నాయనేది ఎప్పటికప్పుడు గమనించి చర్యలు చేపడుతున్నాం. ప్రమాదాలు లేకుండా రెడ్, ఆరెంజ్ కేటగిరీ పరిశ్రమలు పని చేస్తున్నాయి. నియమాలు అధిగమిస్తే వెంటనే చర్యలు చేపడుతున్నాం' అని పెద్దిరెడ్డి పేర్కొన్నారు.