టెలీ-మెడిసిన్ విధానంపై డబ్ల్యూహెచ్ఓ చీఫ్ టెడ్రోస్ ప్రశంసలు

భారత్‌లో అమలవుతోన్న ఆరోగ్య పథకాలు, వైద్య సేవలపై ప్రపంచ ఆరోగ్య సంస్థ (WHO) ప్రశంసలు కురిపించింది. భారత్ అనుసరిస్తోన్న ఆరోగ్య విధానాలు బేషుగ్గా ఉన్నాయని డబ్ల్యూహెచ్ఓ డైరెక్టర్ జనరల్ డాక్టర్ టెడ్రోస్ అధ్నామ్ ఘ్యాబ్రియోసిస్ అన్నారు. గుజరాత్‌లోని గాంధీనగర్‌లో శుక్రవారం జరిగిన జీ20 సదస్సు ఆరోగ్య శాఖ మంత్రుల సమావేశానికి ఆయన ముఖ్య అతిధిగా ఆయన విచ్చేశారు. ఈ సందర్భంగా భారత ప్రభుత్వం ఎంతో ప్రతిష్టాత్మకంగా ప్రవేశపెట్టిన ఆయుష్మాన్ భారత్ పథకాన్ని డబ్ల్యూహెచ్ఓ చీఫ్ కొనియాడారు.

సదస్సు ప్రారంభోత్సవం సందర్బంగా ఆయన మాట్లాడుతూ.. ఇంతటి స్థాయిలో సదస్సును నిర్వహిస్తున్నందుకు ముందుగా భారత్‌కు కృతఙ్ఞతలు తెలిపారు. ఆరోగ్యం విషయంలో భారత్ అనుసరిస్తోన్న విధానాలను కొనియాడుతూ ఆయుష్మాన్ భారత్ పథకంపై ప్రశంసలు కురిపించారు. యూనివర్సల్ హెల్త్ కవరేజ్, యు ప్రపంచంలోనే అతిపెద్ద ఆరోగ్య హామీ పథకం ఆయుష్మాన్ భారత్‌ను అభివృద్ధి చేయడంలో భారత ప్రభుత్వ చర్యలు అభినందించదగినవి అని వ్యాఖ్యానించారు.

‘నేను ఓ ఆరోగ్య సంరక్షణ కేంద్రానికి వెళ్లాను.. ప్రాథమిక ఆరోగ్య కేంద్రం ద్వారా కనీసం వెయ్యి గృహాల వరకు సేవలందిస్తుండటం చూసి ఆశ్చర్యపోయాను.. గుజరాత్‌లోని టెలీ-మెడిసిన్ సౌకర్యం కూడా చాలా ఆశ్చర్యాన్ని కలిగించింది.. వైద్య రంగంలో డిజిటల్ సేవలు ఒక విప్లవాత్మక మార్పు.. జీ20 సదస్సును ప్రతిష్టాత్మకంగా నిర్వహిస్తున్న భారత్‌కు ప్రత్యేక కృతఙ్ఞతలు’ అని టెడ్రోస్ అన్నారు. ‘స్థానికంగా ప్రిస్క్రిప్షన్లు, చికిత్సను అందించే టెలిమెడిసిన్ సేవలను ఇక్కడ అందిస్తున్నారు.. ఆరోగ్య సంరక్షణ చర్యలకు ఇది ఒక అద్భుతమైన ఉదాహరణ’ అని వివరించారు.

ఈ కార్యక్రమంలో కేంద్ర ఆరోగ్య శాఖమంత్రి మన్‌సుఖ్ మాండవీయ మాట్లాడుతూ.. ఈ సమావేశాలకు సుమారు 70 దేశాల నుంచి ఆరోగ్యశాఖ మంత్రులు, ప్రతినిధులు హాజరయ్యారని తెలిపారు. జీ20 అధ్యక్ష హోదాలో ఈ సదస్సు ద్వారా భారత్ మేము అవలంబిస్తున్న ఆరోగ్య విధానాల గురించి ప్రజలకు తెలియజేశామని.. మోదీ ప్రభుత్వం ఆరోగ్యానికి ఏ స్థాయిలో ప్రాధాన్యతనిచ్చిందో చెప్పే ప్రయత్నం చేశారు.

ఆగస్టు 17న మొదలైన ఈ సమావేశాలు శనివారం ముగియనున్నాయి. ‘ఈ సమావేశం ప్రధానంగా మూడు అంశాలపై ప్రత్యేక దృష్టి సారించింది... అత్యవసర ఆరోగ్య సమస్యలు నివారణ, యాంటీ మైక్రోబయాల్ రెసిస్టెన్స్‌ను క్షుణ్ణంగా అధ్యయనం చేసి పరిస్థితులకు అనుగుణంగా స్పందించి సిద్దంకావడం. సురక్షితమైన, ప్రభావవంతమైన, నాణ్యమైన సేవలందించే విధంగా ఫార్మసీ రంగాన్ని బలోపేతం చేయడం గురించి ప్రస్తావించాం’ అని కేంద్ర మంత్రి తెలిపారు. గతేడాది డిసెంబరు 1న భారత్ జీ20 అధ్యక్ష బాధ్యతలను స్వీకరించిన విషయం తెలిసిందే.