సర్జరీతో తిరిగి బతికేలా చేసిన ప్రభుత్వ వైద్యులు,,,అరుదైన సర్జరీ చేసిన లక్నో డాక్టర్లు

లక్నోలోని కింగ్ జార్జ్ మెడికల్ కాలేజీ వైద్యులు ఓ యువతి ప్రాణం కాపాడటం కోసం అరుదైన ప్రక్రియ చేపట్టారు. అయోధ్యకు చెందిన 28 ఏళ్ల మహిళ గుండె సంబంధిత సమస్యతో బాధపడేది. ఆమె గుండె నుంచి మిగతా శరీర భాగాలకు రక్తాన్ని తీసుకెళ్లే రక్త నాళాల్లో సమస్య ఉంది. దీంతో ఆమెను తిరిగి మాములు మనిషి చేయడం కోసం లక్నో డాక్టర్లు ‘డీప్ హైపోథెర్మిక్ సర్క్యులేటరీ అరెస్ట్‌’ (డీహెచ్‌సీఏ) ప్రక్రియ ద్వారా ఆరు నిమిషాలపాటు ఆమె ‘మరణించేలా’ చేశారు. తద్వారా ఆమెకు విజయవంతంగా సర్జరీ చేయగలిగారు.

తాత్కాలికంగా ఆమె చనిపోయేలా చేయడం కోసం డాక్టర్లు డీహెచ్‌సీఏ టెక్నిక్‌ను ఉపయోగించారు. ఈ పద్ధతిలో ఆమె శరీరాన్ని చల్లబర్చారు. తద్వారా ఆమె శరీరంలోని అవయవాలకు రక్త ప్రసరణ నిలిచిపోయేలా చేశారు. ఇలా చేసినప్పుడు మనిషి మరణించిన స్థితిలోకి వెళ్తాడు.

ఈ టెక్నిక్ ద్వారా నరాల బలహీనత రాకుండా 30 నిమిషాలపాటు పేషెంట్‌ను 18 డిగ్రీల సెల్సియస్ వద్ద అచేతనంగాఉంచొచ్చు. మస్తిష్క రక్షణలో హైపోథెర్మియా అనేది ప్రధాన పద్ధతి. ఫార్మాలాజికల్ పద్ధతులు, గ్లూకోజ్ నియంత్రణ, హై మాడ్యిలేషన్, యాసిడ్ బేస్ మేనేజ్‌మెంట్ తదితర న్యూరో ప్రొటెక్టివ్ స్ట్రాటజీలను ఇందులో ఉపయోగిస్తారు.

ఉత్తరప్రదేశ్‌లోని ఓ ప్రభుత్వ ఆసుపత్రిలో ఇలా ప్రక్రియను చేపట్టడం ఇదే తొలిసారని లక్నో డాక్టర్లు తెలిపారు. ఆ మహిళ బృహద్దమనిలో తీవ్రమైన సమస్య ఉంది.. దీని వల్ల రక్తనాళం గోడ ఉబ్బిపోయింది.. దీన్ని అవోర్టిక్ సూడోఅనేరిజం అంటారని డాక్టర్లు చెప్పారు.

డీహెచ్‌సీఏను చేపట్టడానికి ముందు డాక్టర్లు మరో పద్ధతిలో శస్త్రచికత్స చేసినప్పటికీ.. దాని వల్ల ఆమె రక్త నాళం లీకయ్యి.. ప్రాణాలకే ముప్పు వాటిల్లే పరిస్థితి తలెత్తింది. దీంతో డీహెచ్‌‌సీఏ చేపట్టిన డాక్టర్లు.. ఆ తర్వాత నాలుగు గంటలపాటు ఆమె కోలుకుంటున్న తీరును జాగ్రత్తగా గమనించారు. ఆ తర్వాత వెంటిలేటర్ తీసేసిన వైద్యులు.. ఓ వారం తర్వాత హాస్పిటల్ నుంచి డిశ్చార్జ్ చేశారు. ఇప్పుడు ఆమె పూర్తి ఆరోగ్యంగా ఉందని డాక్టర్లు తెలిపారు.

ఈ డీచ్‌సీఏ అనేది కొత్త ప్రక్రియేం కాదు. పుట్టుకతో వచ్చిన గుండె సమస్యలను సరి చేయడానికి 1970ల నుంచే ఈ టెక్నిక్‌ను ఉపయోగిస్తున్నారు. ముఖ్యంగా గర్భస్థ శివులు, పసికందుల్లో.. అప్పుడప్పుడు కొద్దిగా ఎదిగిన పిల్లల్లో ఈ టెక్నిక్‌‌ను వాడుతుంటారు. కార్డియోపల్మోనరీ బైపాస్ మీద పేషెంట్ ఉండాల్సిన టైమ్‌‌ను డీహెచ్‌సీఏ తగ్గిస్తుంది.