లడఖ్‌లో పర్యటిస్తున్న రాహుల్ గాంధీ,,,,థ్యాంక్స్ చెప్పిన కేంద్రమంత్రి కిరణ్ రిజిజు

కాంగ్రెస్ మాజీ అధ్యక్షుడు, ఎంపీ రాహుల్ గాంధీ ప్రస్తుతం లడఖ్ టూర్‌లో ఉన్నారు. ఈ క్రమంలోనే ఇటీవల బైక్‌ రైడింగ్ చేసిన వీడియోలు, ఫోటోలు సోషల్ మీడియాలో వచ్చాయి. తన తండ్రి, మాజీ ప్రధాని రాజీవ్ గాంధీ జయంతి వేడుకలతోపాటు పలు కాంగ్రెస్ పార్టీ సమావేశాల కోసం లడఖ్‌లో రాహుల్ పర్యటిస్తున్నారు. ఈ క్రమంలోనే రాహుల్ గాంధీకి కేంద్రమంత్రి కిరణ్ రిజిజు ధన్యవాదాలు చెబుతూ ట్వీట్ చేయడం గమనార్హం. అయితే ఈ థ్యాంక్స్ చెప్పింది మాత్రం ప్రేమ, అప్యాయతలతో కాదు. రాహుల్ గాంధీని, కాంగ్రెస్ పార్టీకి చురకలు అంటిస్తూ కిరణ్ రిజిజుతోపాటు మరో కేంద్రమంత్రి ప్రహ్లాద్ జోషి ట్వీట్లు చేశారు.

రాహుల్‌గాంధీ లడఖ్‌లో పర్యటిస్తున్న ఫోటోలు, వార్తలు వైరల్ కావడంతో కేంద్రమంత్రి కిరణ్ రిజిజు ట్విటర్ వేదికగా స్పందించారు. కొండ ప్రాంతమైన లడఖ్‌లో ప్రధాని నరేంద్ర మోదీ నేతృత్వంలోని బీజేపీ ప్రభుత్వం అభివృద్ధి చేసి మంచి రోడ్లు వేసిందని తెలిపారు. అలాంటి రోడ్లపై బైక్ రైడ్ చేసి.. వాటిని దేశం మొత్తానికి చూపించేలా చేసిన రాహుల్ గాంధీకి ధన్యవాదాలు అంటూ కిరణ్ రిజిజు ట్వీట్ చేయడమ గమనార్హం. దీనికి తోడు లడఖ్‌లో 2012 లో ఉన్న రోడ్లు, ప్రస్తుతం ఉన్న రహదారులకు సంబంధించిన వీడియోను పోస్ట్ చేసిన కిరణ్ రిజిజు.. గత కాంగ్రెస్ ప్రభుత్వ పాలన, ప్రస్తుత నరేంద్ర మోదీ పాలనలో తేడా ఇదే అని పేర్కొన్నారు. రాళ్లు, మట్టి ఉండి వాహనాలు ప్రయాణించలేని పరిస్థితిని నుంచి రయ్ మంటూ దూసుకెళ్లే హైవేలు ఏర్పాటయ్యాయని వెల్లడించారు.

మోదీ హయాంలో లడఖ్‌లో నిర్మించిన రహదారులను ప్రమోట్ చేస్తున్నందుకు.. కశ్మీర్ లోయలోనూ టూరిజం అభివృద్ధి చెందుతోందని ప్రచారం చేస్తున్నందుకూ రాహుల్ గాంధీకి థాంక్స్ అని అన్నారు. జమ్ముకశ్మీర్ శ్రీనగర్‌లోని లాల్‌చౌక్‌లో ఇప్పుడు భారతీయ జెండాను గర్వంగా ఎగరేయచ్చని పేర్కొన్నారు. మరోవైపు.. రాహుల్ బైక్‌ రైడ్‌పై మరో కేంద్రమంత్రి ప్రహ్లాద్ జోషి కూడా స్పందించారు. రాహుల్ స్వయంగా వెళ్లి లడఖ్ టూరిజాన్ని ప్రమోట్ చేస్తున్నారని పేర్కొన్నారు. ఆర్టికల్ 370 రద్దు చేసిన తర్వాత కశ్మీర్‌లో జరుగుతున్న అభివృద్ధిని స్వయంగా రాహుల్ గాంధీ ప్రమోట్ చేస్తుండటం సంతోషమని.. రోడ్‌ ట్రిప్‌ ఫొటోలు, వీడియోలు చూసి చాలా సంతోషించినట్లు ప్రహ్లాద్ జోషి తెలిపారు.

మరోవైపు.. ఇటీవల లడఖ్‌లో పర్యటిస్తున్న రాహుల్ గాంధీ.. తన తండ్రి, మాజీ ప్రధాని రాజీవ్‌ గాంధీ జయంతి వేడుకలను ప్యాంగాంగ్‌ సరస్సు వద్ద ఆదివారం రాహుల్ గాంధీ జరుపుకున్నారు. ఈ సందర్భంగా సరస్సు వద్ద ఏర్పాటు చేసిన రాజీవ్ గాంధీ చిత్రపటానికి పూలమాలలు వేసి శ్రద్ధాంజలి ఘటించారు. దాదాపు 6 రోజుల పాటు రాహుల్‌ గాంధీ లడఖ్‌లో పర్యటించనున్నారు.

ఈ సందర్భంగా తన తండ్రి రాజీవ్‌గాంధీ చెప్పిన విషయాన్ని రాహుల్ గాంధీ గుర్తు చేసుకున్నారు. ప్రపంచంలో అందమైన ప్రదేశాల్లో లేహ్‌, పాంగాంగ్‌ సరస్సు ఉంటాయని తన తండ్రి చెప్పినట్లు రాహుల్‌ వెల్లడించారు. అందుకే తాను ఆ ప్రాంతాలను సందర్శిస్తునట్లు చెప్పారు. 2019 లో ఆర్టికల్‌ 370 రద్దు తర్వాత లడఖ్‌లో రాహుల్ గాంధీ పర్యటించడం ఇదే తొలిసారి కావడం గమనార్హం. సెప్టెంబరు 10న లడఖ్‌ అటానమస్‌ హిల్‌ డెవలప్‌మెంట్‌ కౌన్సిల్‌ - కార్గిల్‌ ప్రాంతంలో కౌన్సిల్‌ ఎన్నికలు జరగనున్నాయి. ఈ ఎన్నికల్లో స్థానిక నేషనల్‌ కాన్ఫరెన్స్‌ పార్టీతో కాంగ్రెస్‌ పొత్తు పెట్టుకుంది. ఇదే సమయంలో రాహుల్‌.. లేహ్‌, లడఖ్‌లలో పర్యటించడం ప్రాధాన్యత సంతరించుకుంది.