యువతికి అండగా నిలిచిన దిశ,,,,రెండు నిమిషాల్లోనే వెళ్లిన పోలీసులు

జగన్ సర్కార్ ప్రతిష్టాత్మకంగా తీసుకొచ్చిన దిశ యాప్ ఇబ్బందుల్లో ఉన్న ఎంతోమంది మహిళలకు అండగా ఉంటోంది. తాజాగా డాక్టర్ బీఆర్ అంబేద్కర్ కోనసీమ జిల్లా అమలాపురంలో ఆపదలో ఉన్న యువతి వద్దకు కేవలం రెండు నిమిషాల్లో దిశ పోలీసులు చేరుకొని రక్షణ కల్పించారు. యువతి పట్ల అసభ్యంగా ప్రవర్తించిన వ్యక్తిని అరెస్ట్ చేశారు. అమలాపురం మోబర్లీపేటలోని ఓ ఆయిల్ షాప్‌లో యువతి పని చేస్తోంది. ఆదివారం రాత్రి 8:15 నిమిషాల సమయంలో ఆయిల్ షాప్‌కు వచ్చిన ఓ వ్యక్తి ఆమెతో అసభ్యంగా ప్రవర్తించాడు.

ఆ యువతి వెంటనే దిశ SOSకు కాల్ చేసి ఫిర్యాదు చేసింది. కేవలం రెండు నిమిషాల వ్యవధిలో బాధిత యువతి ఉంటున్న లొకేషన్‌కు దిశ పోలీసులు చేరుకున్నారు. యువతితో గొడవ పడుతూ అసభ్యంగా ప్రవర్తిస్తున్న బొక్క భాను అనే వ్యక్తిని పోలీసులు అదుపులోకి తీసుకున్నారు. బాధిత యువతి ఇచ్చిన ఫిర్యాదుతో భాను అనే నిందితుడిపై ఐపీసీ సెక్షన్ 354 A, 506, 509 ల కింద అమలాపురం పోలీసులు కేసు నమోదు చేశారు.

దిశ ఎస్ఓఎస్ కు కాల్ చేసిన రెండు నిమిషాల వ్యవధిలోనే దిశ టీం తన వద్దకు రావడం నిజంగా పోలీసుల అద్భుతమైన పనితీరుకు నిదర్శనమన్నారు బాధిత యువతి. తాను పనిచేస్తున్న షాప్ వద్దకు ఓ వ్యక్తి వచ్చి అసభ్యంగా ప్రవర్తిచడంతో ఏమి చేయాలో తెలియలేదని.. తన మొబైల్‌లో ఉన్న దిశ SOS యాప్ గుర్తుకొచ్చి ఎమర్జెన్సీ కాల్ ను ప్రెస్ చేసి సమాచారం అందించినట్లు యువతి తెలిపింది. కేవలం రెండు నిమిషాల్లోనే దిశ పోలీసులు వచ్చి.. తనతో అసభ్యకరంగా ప్రవర్తించిన వ్యక్తిని పోలీసులు అదుపులోకి తీసుకున్నట్లు యువతి తెలిపింది.

తన లాంటి ఎంతో మంది అమ్మాయిలకు దిశ యాప్ ఒక రక్షణ కవచంలాగ ఉపయోగపడుతోందని బాధిత యువతి అన్నారు. రాష్ట్రంలో ప్రతి ఒక్కరూ దిశ యాప్ ను డౌన్లోడ్ చేసుకోవాలని యువతి కోరారు. ఈ సందర్భంగా మహిళల పట్ల అసభ్యంగా ప్రవర్తించే వారిపై చట్ట ప్రకారం కఠిన చర్యలు తీసుకుంటామని దిశ పోలీస్ ఉన్నతాధికారులు హెచ్చరించారు.