భారత్‌పై మరోసారి అక్కసు వెళ్లగక్కిన చైనా,,,,అబద్ధపు ప్రచారాన్ని తిప్పికొట్టిన భారత్‌

భారత్ అంటే గిట్టని చైనా.. ఎప్పుడూ మన దేశంపై తప్పుడు ప్రచారం చేయడంలో ముందు ఉంటుంది. అంతర్జాతీయ వేదికలపై జరిగిన సంఘటనల గురించి అక్కసు వెళ్లగక్కే డ్రాగన్.. మరోసారి తన అక్కసును బయట పెట్టింది. బ్రిక్స్ సమావేశం సందర్భంగా ప్రధాని మోదీ, చైనా అధ్యక్షుడు షీ జిన్‌పింగ్ భేటీపైన తాజాగా రాజకీయం చేస్తోంది. భారత్ చేసిన విజ్ఞప్తి మేరకే మోదీ, జిన్‌పింగ్ సంభాషణ జరిగిందని అసత్య ప్రచారానికి తెర లేపింది. అయితే చైనా చేసిన ఈ అసత్య ప్రచారాన్ని భారత్ సమర్థవంతంగా తిప్పికొట్టింది. చైనా చేస్తున్న ప్రచారం మొత్తం అబద్ధమని కుండ బద్ధలు కొట్టినట్లు చెప్పింది.

దక్షిణాఫ్రికాలో జరిగిన బ్రిక్స్‌ సమావేశాల సందర్భంగా ప్రధాని నరేంద్ర మోదీ, చైనా అధ్యక్షుడు షీ జిన్‌పింగ్‌ కొద్దిసేపు మాట్లాడుకున్నారు. అయితో మొదట భారత్, చైనా ద్వైపాక్షిక భేటీ జరగనున్నట్లు వార్తలు వచ్చాయి. అయితే అది జరగకపోవడంతో చైనా తన అక్కసును వెళ్లగక్కింది. భారత్ చేసిన అభ్యర్థనతోనే బ్రిక్స్‌ సదస్సులో మోదీ జిన్‌పింగ్‌ సంభాషణ జరిగినట్లు ఆరోపణలు చేసింది. దీంతో చైనా చేస్తున్న ఆరోపణలపై భారత్‌ తీవ్ర ఆగ్రహం వ్యక్తం చేసింది. భారత్‌తో ద్వైపాక్షిక సమావేశం కోసం చైనానే కోరిందని.. అది పెండింగ్‌లో ఉందని వెల్లడించింది.

గురువారం జరిగిన బ్రిక్స్‌ సదస్సులో భాగంగా వేదిక వద్దకు వెళ్లే ముందు మోదీ, జిన్‌పింగ్‌ సంభాషించుకున్నారు. అయితే ప్రెస్ మీట్ తర్వాత కూడా కాసేపు మాట్లాడుకున్నారు. సరిహద్దుల్లో శాంతిని నెలకొల్పే ప్రయత్నాలు చేయాలని, తూర్పు లడఖ్‌లో వాస్తవాధీన రేఖ వెంట సమస్యల పరిష్కారం చేసుకుంటేనే ఇరుదేశాల మధ్య మునుపటి సాధారణ పరిస్థితులు నెలకొంటాయని చైనా అధ్యక్షుడు షీ జిన్‌పింగ్‌కు ప్రధాని నరేంద్ర మోదీ స్పష్టం చేసినట్లు కేంద్ర ప్రభుత్వ వర్గాలు వెల్లడించాయి.

మరోవైపు.. గల్వాన్‌ లోయలో ఘర్షణలు, తూర్పు లడఖ్‌లో బలగాల ప్రతిష్టంభనతో భారత్, చైనాల మధ్య సంబంధాలు తీవ్రంగా దెబ్బతిన్నాయి. ఈ క్రమంలోనే ఇరు దేశాల మధ్య సరిహద్దు వివాదాన్ని పరిష్కరించుకునేందుకు ఇటీవల రెండు దేశాల మధ్య 19 వ సారి కార్ప్స్‌ కమాండ్‌ స్థాయి చర్చలు జరిగాయి. ఈ చర్చల్లో ఇరు దేశాల మధ్య అనేక అంశాల గురించి అధికారులు చర్చించినట్లు భారత విదేశాంగశాఖ వెల్లడించింది. ఇరు వైపుల సానుకూల వాతావరణం కనిపించిందని తెలిపింది. గల్వాన్ ఘర్షణ తర్వాత ఇప్పటివరకు పలు దఫాల్లో భారత్, చైనా దేశాల మధ్య శాంతిని నెలకొల్పేందుకు వివిధ స్థాయిల్లో చర్చలు జరిపారు.