దక్షిణ ధ్రువంపై విజయవంతంగా దిగిన చంద్రయాన్-3,,,,అంతరిక్ష ప్రయోగాలకు బ్రిటన్ నుంచి ఆర్ధిక సాయం

భూమికి కనిపించని, ఇప్పటి వరకూ ఎవరూ అడుగుపెట్టని చీకటిగా ఉండే చంద్రుడి దక్షిణ ధ్రువంపై భారత్ చంద్రయాన్‌-3‌ను విజయవంతంగా దింపింది. దీంతో అసాధ్యమనుకున్న యాత్రను సుసాధ్యం చేసిన ఇస్రో శాస్త్రవేత్తలపై ప్రపంచ దేశాలు ప్రశంసల జల్లు కురిపిస్తున్నాయి. అయితే, చంద్రయాన్-3 విజయంపై యూకేకు చెందిన కొందరు జర్నలిస్టులు అక్కసు వెళ్లగక్కారు. ‘చంద్రుడి దక్షిణ ధ్రువంపైకి రాకెట్లను పంపించేలా అంతరిక్ష రంగంలో పురోగతి సాధించిన దేశాలకు బ్రిటన్‌ ఆర్థిక సాయం అందించాల్సిన అవసరం లేదు’ అని యూకేకు చెందిన సోఫీ అనే జర్నలిస్టు సోషల్‌ మీడియాలో పోస్టు చేశారు.జీబీ న్యూస్‌కు చెందిన మరో మీడియా ప్రజెంటర్ క్రిస్టీ ‘చంద్రుడి దక్షిణ ధ్రువంపై దిగిన భారత్‌ను నేను అభినందించాలనుకుంటున్నాను.. 2016 నుంచి 2021 మధ్య యూకే అందజేసిన 2.3 బిలియన్ పౌండ్ల సహయాన్ని తిరిగి ఇచ్చేయాలని భారత్‌కు చెప్పాలనుకుంటున్నాను.. మేము వచ్చే ఏడాది 57 మిలియన్ పౌండ్‌లను కూడా ఇవ్వడానికి సిద్ధంగా ఉన్నాం.. కానీ బ్రిటీష్ పన్ను చెల్లింపుదారులు దానిని పట్టుకోవాలని కోరుకుంటున్నాను.. నియమం ప్రకారం అంతరిక్ష ప్రయోగాలు చేపట్టిన దేశాలకు మనం సాయం చేయకూడదు’ అని అన్నారు.

ఈ కామెంట్లపై భారతీయులు తీవ్ర ఆగ్రహం వ్యక్తం చేశారు. దాదాపు 250 ఏళ్ల పాటు మా దేశంలో అధికారం చెలాయించి దోచుకున్న మొత్తం 45 ట్రిలియన్‌ డాలర్లను తిరిగిచ్చేయాలంటూ నెట్టింట వైరల్‌ చేస్తున్నారు. దీంతో ఇప్పుడు ‘45 ట్రిలియన్లు’ అనే పదం సోషల్‌ మీడియాలో తీవ్ర చర్చ జరుగుతోంది. ఇంతకీ 45 ట్రిలియన్ల సంపద గురించి ఎలా తెలిసిందంటే.. భారత్‌కు చెందిన ప్రముఖ ఆర్థికవేత్త ఉత్సా పట్నాయక్‌ ఇటీవల కొలంబియా యూనివర్సిటీ ప్రెస్‌లో ఓ అధ్యయనాన్ని ప్రచురించారు. 1765 నుంచి 1938 వరకు బ్రిటన్‌.. భారత్‌ నుంచి 45 ట్రిలియన్‌ డాలర్లు తీసుకెళ్లిందని అందులో పేర్కొన్నారు. పన్నులు, వాణిజ్యంపై అందుబాటులో ఉన్న డేటాను అధ్యయనం చేసి ఆమె ఈ లెక్క చెప్పారు. ఈ మొత్తం ప్రస్తుతం యూకే జీడీపీ కంటే 15 రెట్లు ఎక్కువ. అంతేకాదు, భారత్ అంతరిక్ష ప్రయోగాలకు యూకే ఆర్థిక సాయం 2015లోనే నిలిచిపోయినట్టు ఈ ఏడాది మార్చిలో గార్డియన్‌ ఓ కథనం వెలువరించింది. అయితే, ఆ తర్వాత ఇండిపెండెంట్‌ కమిషన్‌ ఫర్‌ ఎయిడ్‌ ఇంపాక్ట్‌ సమీక్ష .. 2016 నుంచి 2021 వరకు యూకే.. భారత్‌కు 2.3 బిలియన్‌ పౌండ్లు సాయంగా ఇచ్చిందని ప్రకటించింది. దీన్ని ఉద్దేశిస్తూనే యూకే జర్నలిస్టులు పోస్టులు చేశారు. వారికి కౌంటర్‌ ఇస్తూ ఇండియన్స్ పోస్టులు పెడుతున్నారు.