ప్రపంచంలోనే అత్యంత చవకైన,,,,రూ. 80 కే డబుల్ బెడ్‌రూం ఇల్లు

ప్రస్తుతం ఎక్కడ చూసినా ఇళ్లు, భూముల ధరలు ఆకాశాన్నంటుతున్నాయి. పట్టణాలు, నగరాల్లో గజం భూమి కూడా లక్షల్లో పలుకుతోంది. ఇళ్లు కొనాలంటే సామాన్యుడికి అందుబాటులో ఉండటం లేదు. అయితే ఒక డబుల్ బెడ్‌రూమ్ ఇల్లు అయితే కేవలం రూ.80 కే అమ్మకానికి పెట్టారు. ఎంత మారుమూల పల్లె అయినా అంత తక్కువకు దొరకదు అని ఆలోచన వస్తుంది కదా. కానీ ఇది నిజం. ఏదో అపార్ట్‌మెంట్ ఫ్లాట్ కూడా కాదు. ఇండిపెండెంట్ ఇల్లు. అది కూడా 724 చదరపు అడుగుల విస్తీర్ణం. వినడానికే ఇది ఆశ్చర్యంగా ఉన్నా ఇది నిజమే. అయితే ఇదేదో పేద దేశం.. కనీసం ఉండడానికి కూడా వీల్లేదు అనే దేశం అనుకుంటే పొరపాటే. ఎందుకంటే ఈ ఇల్లు ఉంది ప్రపంచంలోనే అగ్రరాజ్యాల్లో ఒకటైన అమెరికాలో. మరి ఈ ఇల్లును మీరు కొనుగోలు చేసుకుంటారా.

అమెరికాలోని మిచిగాన్ రాష్ట్రంలో ఈ డబుల్ బెడ్‌రూం ఇల్లు ఉంది. డెట్రాయిట్ అనే నగరానికి 30 కిలోమీటర్ల దూరంలో ఉన్న పోంటియాక్‌‌లోని ఈ ఇంటిని.. జిల్లో అనే రియల్ ఎస్టేట్ సంస్థ వేలానికి ఉంచింది. అయితే ఈ 724 చదరపు అడుగుల విస్తీర్ణంలో ఉన్న ఆ ఇంటికి ఒక డాలర్ అని పెట్టి సంచలనానికి తెరలేపింది. ప్రస్తుతం ఆ ఇల్లు పూర్తిగా శిథిలావస్థకు చేరుకుని కూలిపోయే దశలో ఉంది. ఆ ఇంటిని 1956 లో నిర్మించినట్లు జిల్లో వెల్లడించింది. పూర్తిగా ధ్వంసమైన ఆ ఇంటిని బాగు చేయించడానికి దాదాపు 20,000 డాలర్ల నుంచి 45 వేల డాలర్ల వరకు ఖర్చు అవుతుందని జిల్లో సంస్థ ఏజెంట్ హుబెల్ పేర్కొన్నారు. అయితే ఈ ఇంటిని 2022 లో 4092 డాలర్లు అంటే దాదాపు రూ. 3.34 లక్షలకు విక్రయించడం విశేషం.

పావు ఎకరం స్థలంలో ఉన్న ఆ ఇంటి పైకప్పును తారుతో వేశారు. కిచెన్ గోడలు పెచ్చులు ఊడిపోయాయి. బాత్రూమ్ మొత్తం మురికిగా ఉంది. ఇంటి పెరట్లో గడ్డి మొక్కలు బాగా పెరిగాయి. అయితే ఆ ఇంటికి ఏడాదికి 1200 డాలర్లు అంటే దాదాపు రూ. లక్ష ప్రాపర్టీ టాక్స్.. నెల నెలా నీటి బిల్లు 50 డాలర్లు అంటే రూ.4 వేలు.. డ్రైనేజీ బిల్లు నెలకు 75 డాలర్లు అంటే దాదాపు రూ.6 వేలు వస్తుందని జిల్లో సంస్థ వెల్లడించింది. ఈ విషయం తెలిసిన వారు అంతా రూ.80 కే డబుల్ బెడ్‌రూం ఇల్లు రావడం ఏంటని ఆశ్చర్యపోతున్నారు. ప్రస్తుతం ఈ ఇల్లు సోషల్ మీడియాలో మారుమోగిపోతోంది.