విమానం టేకాఫ్ అయిన కొద్దిసేపటికి చిన్నారికి తీవ్ర అస్వస్థత

విమానం గాల్లో ఉండగా ఓ చిన్నారికి ఊపిరి ఆగిపోతే.. ఎయిమ్స్ వైద్యులు అద్బుతం చేసి ఆ పాపను బతికించారు. ఈ ఘటన బెంగళూరు-ఢిల్లీ విస్తారా విమానంలో శనివారం చోటుచేసుకుంది. శ్వాస ఆగిపోయి మరణం అంచుల దాకా వెళ్లిన ఆ రెండేళ్ల చిన్నారి అద్భుతంగా కోలుకుంది. విస్తారా ఎయిర్‌లైన్స్‌కు చెందిన యూకే-814 విమానం.. బెంగళూరులోని కెంపెగౌడ అంతర్జాతీయ విమానాశ్రయం నుంచి శనివారం ఢిల్లీకి బయలుదేరింది. ఆ విమానం టేకాఫ్ అయిన కొద్దిసేపటికే తల్లిదండ్రులతో కలిసి ప్రయాణిస్తోన్న ఓ రెండేళ్ల చిన్నారి తీవ్ర అస్వస్థతకు గురైంది. చిన్నారికి మెడికల్ ఎమర్జెన్సీ అవసరం కాగా.. అదృష్టవశాత్తూ అదే విమానంలో ఆల్ ఇండియా ఇనిస్టిట్యూట్ ఆఫ్ మెడికల్ సైన్సెస్ కి చెందిన ఐదుగురు వైద్యులు ప్రయాణిస్తున్నారు.

వారు తక్షణమే స్పందించి.. చిన్నారిని పరీక్షించారు. అప్పటికే పల్స్ పూర్తిగా పడిపోయి.. ఒళ్లంతా చల్లబడి.. పెదవులు, వేళ్లు నీలంగా మారిపోయాయి. పాపకు ఊపిరి కూడా ఆగిపోయింది. పరిస్థితి విషమంగా ఉండటంతో అందుబాటులో ఉన్న వనరులతో వైద్యులు వెంటనే చికిత్సను ప్రారంభించారు. సీపీఆర్ చేసిన వైద్యులు.. చిన్నారికి అత్యవసరంగా శస్త్రచికిత్స చేయాల్సి ఉందని తెలిపారు. దీంతో విమానాన్ని నాగ్‌పూర్‌ విమానాశ్రయానికి మళ్లించారు. ఎయిర్‌పోర్ట్ నుంచి నేరుగా నాగ్‌పూర్ ఎయిమ్స్‌కు చిన్నారిని తరలించి.. శస్త్రచికిత్స నిర్వహించారు. ప్రస్తుతం ఆ చిన్నారి ఆరోగ్య పరిస్థితి నిలకడగా ఉందని అధికారులు తెలిపారు.

ఈ సంఘటనకు సంబంధించిన వివరాలను ఎయిమ్స్ న్యూఢిల్లీ తన అధికారిక ట్విట్టర్ (ఎక్స్)‌లో వెల్లడించింది. చిన్నారి, వైద్యుల ఫోటోలను కూడా షేర్ చేసింది. ‘‘బెంగళూరులో జరిగిన ఇండియన్ సొసైటీ ఫర్ వాస్క్యూలర్ అండ్ ఇంటర్వెన్షన్ రేడియాలజీ (ISVIR) వార్షిక సదస్సుకు హాజరైన తమ వైద్యులు శనివారం సాయంత్రం ఢిల్లికి విస్తారా విమానంలో తిరిగి వస్తున్నారు. ఈ విమానంలో సైనోటిక్ సమస్యతో బాధపడుతున్న రెండేళ్ల చిన్నారి అస్వస్థతకు గురై అపస్మారక స్థితిలోకి వెళ్లిపోయింది.. విమానంలో ఉన్న మావైద్యులు నవదీప్ కౌర్ (సీనియర్ అనెస్థీషియా), దమన్‌దీప్ సింగ్ (కార్డియాక్ రేడియాలజీ), రిషబ్ జైన్ (రేడియాలజీ), ఓషికా (గైనజకాలజిస్ట్), అవిచల్ తక్సక్ (కార్డియాక్ రేడియాలజీ)లు తక్షమే ఆ చిన్నారిని పరీక్షించారు.

పల్స్ పూర్తిగా పడిపోయి.. ఒళ్లంతా చల్లబడి.. పెదవులు, వేళ్లు నీలంగా మారిపోయి.. ఊపిరి కూడా ఆగిపోయింది. పరిస్థితి విషమంగా ఉండటంతో అందుబాటులో ఉన్న వనరులతో వైద్యులు వెంటనే చికిత్సను ప్రారంభించారు. సీపీఆర్ చేసి.. తన నైపుణ్యంతో విజయవంతంగా ఐవీ క్యానల్ పెట్టి.. ఓరోఫారింజియల్ చేశారు.. దీంతో శిశువు తిరిగి ఊపిరి తీసుకోవడం ప్రారంభించింది.. కార్డియాక్ అరెస్ట్ కారణంగా ఏఈడీ సంక్లిష్టంగా మారింది.. 45 నిమిషాల పాటు శ్రమించి పాపకు ప్రాణం పోశారు.. విమానాన్ని నాగ్‌పూర్‌కు తరలించారు.. నాగ్‌పూర్‌కు చేరుకోగానే చిన్నారికి అత్యవసరంగా శస్త్రచికిత్స నిర్వహించారు’’ అని తెలిపింది.