భార్యాభర్తలపై ఏనుగు దాడి చేయడంతో మృతి,,,,మరో యువకుడికి తీవ్ర గాయాలయ్యాయి
Andhra Pradesh Telugu | Suryaa Desk | Published : Wed, Aug 30, 2023, 06:29 PM
చిత్తూరు జిల్లాలో విషాదం చోటుచేసుకుంది. గుడిపాల మండలంలో ఒంటరి ఏనుగు బీభత్సం సృష్టించింది. ఈ ఏనుగు దాడిలో భార్యాభర్తలు ప్రాణాలు కోల్పోయారు. మరొకరి పరిస్థితి విషమంగా ఉంది. మృతులు 190 రామాపురం దళితవాడకు చెందిన వెంకటేష్, సెల్విగా గుర్తించారు. అలాగే బస్వాపల్లికి చెందిన కార్తీ‌క్‌కు కూడా తీవ్ర గాయాలయ్యాయి. బాధితుడ్ని ఆస్పత్రికి తరలించి చికిత్స అందిస్తున్నారు. ఏనుగు దాడి చేయడంతో ఓ ఆవు దూడ కూడా మృతిచెందింది. దంపతుల మృతితో గ్రామంలో విషాదచాయలు అలుముకున్నాయి
ఈ ఘటనపై స్థానికులు పోలీసులు, అటవీశాఖ అధికారులకు సమాచారం అందించారు. వెంటనే అధికారులు సంఘటనాస్థలికి చేరుకుని పరిశీలించారు. ఒంటరి ఏనుగు సంచారంతో స్థానికులు భయాందోళనలో ఉన్నారు. పొలాల వైపు వెళ్లాలంటేనే వణికిపోతున్నారు. అటవీశాఖ అధికారులు ఆ ఒంటరి ఏనుగును అటవీ ప్రాంతంలోకి తరిమేసేందుకు ప్రయత్నిస్తున్నారు. ఈ ఏనుగు గుంపులో నుంచి తప్పించుకుని ఇలా గ్రామాల వైపు వచ్చి ఉండొచ్చని అనుమానిస్తున్నారు. గత కొంతకాలంగా చిత్తూరు జిల్లాలో గజరాజుల సంచారం ఉంది. ముఖ్యంగా పలమనేరు ప్రాంతంలో గుంపులు సంచరించాయి.
కర్ణాటక, ఏపీకి సరిహద్దులో అటవీ ప్రాంతం ఉంది.. అక్కడి నుంచి వచ్చే ఏనుగుల గుంపులు ఇలా గ్రామాల వైపు వెళుతున్నాయి. పంట పొలాలను ధ్వంసం చేస్తున్నాయని రైతులు ఆవేదన వ్యక్తం చేస్తున్నారు. గతంలోనే అటవీశాఖ అధికారులకు ఫిర్యాదు చేశామని.. అటవీ ప్రాంతంలోకి వాటిని తరిమేసినా మళ్లీ వచ్చి బీభత్సం సృష్టిస్తున్నాయని ఆవేదన వ్యక్తం చేస్తున్నారు.
|
|