డ్రంక్ అండ్ డ్రైవ్ లో దొరికిపోయిన 60మంది మందుబాబులు,,,,జరిమానాతో పాటుగా వినూత్నంగా శిక్ష

మద్యం సేవించి వాహనాలను నడపొద్దని పోలీసులు ఎంత చెప్పినా కొందరు మాత్రం అస్సలు పట్టించుకోరు. పోలీసులు ఎన్ని అవగాహనా కార్యక్రమాలు నిర్వహించినా ఫలితం మాత్రం శూన్యం అనే చెప్పాలి. డ్రంక్ అండ్ డ్రైవ్ నిర్వహించిన ప్రతిసారీ మందబాబులు అడ్డంగా దొరికిపోతూనే ఉన్నారు. తాజాగా విశాఖ భీమిలి కోర్టు భిన్నంగా ఆలోచించింది. మందుబాబుల్లో పరివర్తన కోసం వినూత్నంగా ఆలోచించిన జడ్జి.. కాస్త భిన్నమైన తీర్పును ఇచ్చారు. తగరపువలస, భీమిలి, బీచ్‌రోడ్డు ప్రాంతాల్లో భీమిలి ట్రాఫిక్‌ పోలీసులు ఇటీవల డ్రంక్‌ అండ్‌ డ్రైవ్‌ టెస్టులు నిర్వహించారు. ఆ సమయంలో తాగి వాహనాలు నడుపుతున్న 60 మందిని గుర్తించి కేసులు నమోదు చేశారు. వారిని మంగళవారం భీమిలి ఒకటో అదనపు జూనియర్‌ సివిల్‌ జడ్జి ముందు హాజరుపరచగా.. శిక్షలు విధించారు. మందుబాబులతో భీమిలి ప్రభుత్వ డైట్‌ కళాశాల ప్రాంగణంలో పిచ్చిమొక్కలు తీయించి పరిశుభ్రత పనులు చేయించారు. మొత్తం 60 మంది మందుబాబులకు భీమిలి కోర్టు సేవాశిక్షతోపాటు ఒక్కొక్కరికి రూ.వెయ్యి చొప్పున జరిమానా విధించింది.

కోర్టు కూడా మందుబాబులకు జరిమానా మాత్రమే విధిస్తే సరిపోదని భావించింది. అందుకే ఎలాగైనా వారిలో పరివర్తన తెచ్చేందుకు.. అలాగే సమాజానికి ఉపయోగపడేలా ఏదైనా శిక్ష విధించాలని భావించారు. అందుకే అందరిని ఇలా పిచ్చి మొక్కులు తీయించాలని ఆదేశించారు. ఈ తీర్పు గురించి తెలిసి స్థానికులు ఆనందం వ్యక్తం చేస్తున్నారు. ఇలాగైనా వీరందరిలో మార్పు వస్తుందని.. అలాగే పరిసరాలు కూడా శుభ్రపడతాయి అంటున్నారు. గతంలో కూడా ఇలా డ్రంక్ అండ్ డ్రైవ్‌లో దొరికిపోయిన వారిని పోలీసులు కోర్టులో హాజరుపరిచగా.. ఇలా వినూత్నంగా శిక్షలు విధించిన సందర్భాలు చాలానే ఉన్నాయి. కొన్ని సందర్భాల్లో రోడ్లపై వాహనదారులకు డ్రంక్ అండ్ డ్రైవ్, రోడ్డు ప్రమాదాల గురించి అవగాహన కల్పించేందుకు సిగ్నల్స్ దగ్గర బోర్డును పట్టుకుని నిలబడాలని కోర్టులు శిక్ష విధించాయి. మొత్తానికి కోర్టులు విధిస్తున్న ఈ వింత శిక్షలపై ప్రశంసలు వస్తున్నాయి.