బియ్యం ఎగుమతులపై కేంద్రం నిషేధం.. ఆ ఒక్క దేశానికి మాత్రం అవకాశం

దేశంలో ద్రవ్యోల్బణం పెరగడం, వర్షాభావ పరిస్థితుల నేపథ్యంలో బియ్యం కొరతను అడ్డుకునేందుకు ఇతర దేశాలకు ఎగుమతి అయ్యే బియ్యంపై భారత్ నిషేధం విధించింది. తొలుత సన్న బియ్యం ఎగుమతులపై నిషేధం విధించిన భారత్.. ఆ తర్వాత క్రమంగా ఉప్పుడు బియ్యం, బాస్మతి బియ్యం ఎగుమతులపైనా క్రమంగా ఆంక్షలు చేపట్టింది. ఈ క్రమంలోనే విదేశాల్లో ఉన్న భారతీయులతోపాటు.. బియ్యం తినే వారికి తీవ్ర ఇబ్బందులు ఎదురవుతున్నాయి. భారత్ నుంచి ఎగుమతి అయ్యే బియ్యంపై నిషేధం ఉండటంతో అమెరికా సహా వివిధ దేశాల్లో బియ్యం ధరలు భారీగా పెరిగాయి. అయితే అన్ని దేశాలకు బియ్యం ఎగుమతిని నిలిపివేసిన భారత్.. ఒక దేశానికి మాత్రం బియ్యాన్ని అందించేందుకు గ్రీన్ సిగ్నల్ ఇచ్చింది.

ఈ క్రమంలోనే బియ్యం ఎగుమతులపై నిషేధం విధించిన భారత్.. సింగపూర్‌కు బియ్యం ఎగుమతి చేసేందుకు మాత్రం కేంద్ర ప్రభుత్వం పచ్చజెండా ఊపింది. అయితే ఈ విషయంపై విదేశీ వ్యవహారాల మంత్రిత్వ శాఖ ప్రతినిధి అరిందమ్ బాగ్చీ స్పందించారు. భారత్, సింగపూర్‌ దేశాల మధ్య ఎన్నో దశాబ్దాలుగా సన్నిహిత, స్నేహపూర్వక, వ్యూహాత్మక భాగస్వామ్యం ఉందని అరిందమ్ బాగ్చీ వెల్లడించారు. భాగస్వామ్య ఆసక్తి, సన్నిహిత ఆర్థిక సంబంధాల కారణంగానే భారత్ నుంచి సింగపూర్‌కు బియ్యం ఎగుమతులు చేసేందుకు ఆమోదం తెలిపినట్లు తెలిపారు. అయితే భారత్ నుంచి సింగపూర్‌కు బియ్యం ఎగుమతి చేసేందుకు ఇంకా అధికారిక ఉత్తర్వులు రాలేదని తెలుస్తోంది. అయితే ఇది త్వరలోనే జరగనున్నట్లు తెలుస్తోంది. ఈ క్రమంలోనే భారత్ నుంచి సింగపూర్‌కు ఎంత బియ్యం ఎగుమతి అవుతుంది అనే దానిపై ఇంకా ఎలాంటి అధికారిక సమాచారం బయటికి రాలేదు.

భారత్‌లో నెలకొన్న పరిస్థితుల నేపథ్యంలో అంతర్జాతీయంగా బియ్యం ఎగుమతుల్లో అగ్రస్థానంలో ఉన్న దేశం నుంచి ఎగుమతులు నిలిచిపోవడంతో ప్రపంచ వ్యాప్తంగా తీవ్ర గడ్డు పరిస్థితి నెలకొంది. ప్రపంచ బియ్యం ఎగమతుల్లో కేవలం భారత్ నుంచే 40 శాతం కంటే ఎక్కువ బియ్యం ఉత్పత్తి అవుతోంది. 2021 - 2022 సంవత్సరంలో భారత్ దాదాపు 22 మిలియన్ టన్నుల బియ్యాన్ని ఎగుమతి చేసింది. సన్న బియ్యం ఎగుమతులపై పూర్తి నిషేధం విధించిన కేంద్రం.. ఉప్పుడు(పారాబాయిల్డ్‌) బియ్యం ఎగుమతులపై 20 శాతం ట్యాక్స్ విధిస్తూ ఆదేశాలు జారీ చేసింది. మరోవైపు.. బాస్మతి బియ్యం ఎగుమతులపైనా పలు ఆంక్షలు విధించింది. ఇక నూకల ఎగుమతులపై గత ఏడాదే కేంద్రం నిషేధం విధించింది. దీంతో ప్రస్తుతం భారత్ నుంచి ఎగుమతయ్యే అన్ని రకాల బియ్యంపై ఆంక్షలు ఉన్నాయి. భారతీయులు అధికంగా ఉండే.. అమెరికా, కెనడా, ఆస్ట్రేలియా లాంటి దేశాలకు కూడా ఎగుమతులు నిలిపివేసిన భారత్.. సింగపూర్‌కు బియ్యం ఎగుమతి చేసేందుకు మాత్రం పచ్చ జెండా ఊపడం ప్రస్తుతం తీవ్ర చర్చనీయాంశంగా మారింది.