టైగర్ నాగేశ్వరరావు టీజర్‌పై పిల్,,,ఏపీ హైకోర్టు సీరియస్ కామెంట్స్
Andhra Pradesh Telugu | Suryaa Desk | Published : Thu, Aug 31, 2023, 07:26 PM
హీరో రవితేజ నంటించిన టైగర్ నాగేశ్వరరావు సినిమా టీజర్‌పై ఏపీ హైకోర్టు (Ap High Court) అభ్యంతరం వ్యక్తం చేసింది. టైగర్ నాగేశ్వరరావు సినిమా ఎరుకల సామాజికవర్గ మనోభావాలను కించపరిచేదిగా ఉందని.. అలాగే స్టువర్టుపురం గ్రామప్రజల ప్రతిష్ఠకు భంగం కలిగించేలా ఉందంటూ చుక్కా పాల్‌రాజ్‌ హైకోర్టులో పిల్ వేశారు. ఇది తమ జీవితాలపై ప్రతికూల ప్రభావాన్ని చూపుతుందని.. సినిమా ప్రదర్శనకు ధృవీకరణ పత్రం ఇవ్వకుండా నిలువరించాలని కోరారు. బుధవారం జరిగిన విచారణలో పిటిషనర్‌ తరఫున లాయర్లు వాదనలు వినిపించారు.
అయితే విచారణ సందర్భంగా హైకోర్టు ప్రధాన న్యాయమూర్తి జస్టిస్‌ ధీరజ్‌సింగ్‌ ఠాకుర్‌, జస్టిస్‌ ఏవీ శేషసాయితో కూడిన ధర్మాసనం సీరియస్ కామెంట్స్ చేసింది. టీజర్‌లో వాడిన పదప్రయోగం ఓ సామాజిక వర్గాన్ని, స్టువర్టుపురం ప్రాంత వాసులను అవమానించేదిగా ఉందని ధర్మాసనం వ్యాఖ్యానించింది. సెంట్రల్‌ బోర్డు ఫిల్మ్‌ సర్టిఫికెట్‌ లేకుండా టీజర్‌ ఎలా విడుదల చేస్తారని.. సమాజం పట్ల బాధ్యతగా ఉండొద్దా అని సినిమా నిర్మాణ సంస్థపై ఆగ్రహం వ్యక్తం చేసింది.
ఇలాంటి టీజర్‌ ద్వారా సమాజానికి ఎలాంటి సందేశం ఇవ్వాలనుకుంటున్నారని ప్రశ్నించింది.. నిర్మాతకు నోటీసులు జారీ చేసింది. ఈ పిటిషన్‌లో ముంబై సెంట్రల్‌ బోర్డు ఫిల్మ్‌ సర్టిఫికేషన్‌ ఛైర్‌పర్సన్‌ను ప్రతివాదిగా చేర్చాలని పిటిషనర్‌కు హైకోర్టు ధర్మాసనం సూచించింది. అభ్యంతరాలపై ఛైర్‌పర్సన్‌కు ఫిర్యాదు చేసుకునేందుకు పిటిషనర్‌కు వెసులుబాటు కల్పించింది. విచారణను నాలుగు వారాలకు వాయిదా వేసింది.
|
|