తెలివైన, చురుకైన వ్యక్తి ,,,,వివేక్ రామస్వామిపై మరోసారి ట్రంప్ ప్రశంసలు

అమెరికా అధ్యక్ష ఎన్నికల క్రమంలో అటు రిపబ్లికన్, ఇటు డెమోక్రటిక్ పార్టీల తరఫున పోటీ పడే అభ్యర్థులు పోటా పోటీగా సమావేశాలు నిర్వహిస్తున్నారు. ఈ క్రమంలోనే రిపబ్లికన్ పార్టీ తరఫున మరోసారి తాను బరిలోకి దిగుతానని మాజీ అధ్యక్షుడు డొనాల్డ్ ట్రంప్ స్పష్టం చేశారు. మరోవైపు.. ఇదే రిపబ్లికన్ పార్టీ తరఫున భారత సంతతికి చెందిన వ్యక్తులు పోటీ పడుతున్నారు. అందులో వివేక్ రామస్వామి, నిక్కీ హేలీ ఉన్నారు. అయితే ఇప్పటివరకు జరిగిన డిబేట్లలో వివేక్ రామస్వామి ముందు వరుసలో ఉన్నారు. ఈ క్రమంలోనే గతంలోనే వివేక్ రామస్వామిపై ప్రశంసలు కురిపించిన మాజీ అధ్యక్షుడు డొనాల్డ్ ట్రంప్.. తాజాగా మరోసారి అతడిపై తనకు ఉన్న అభిమానాన్ని వ్యక్తం చేశారు. అమెరికా ఉపాధ్యక్షుడిగా వివేక్ రామస్వామి తగిన వ్యక్తి అంటూ తాజాగా ఇచ్చిన ఓ ఇంటర్వ్యూలో డొనాల్డ్ ట్రంప్ మెచ్చుకున్నారు.

ఈ సందర్భంగా వివేక్ రామస్వామి గురించి మాట్లాడిన డొనాల్డ్ ట్రంప్.. ఆయన చాలా తెలివి గల వ్యక్తి అని కొనియాడారు. వివేక్ రామస్వామి ఎల్లప్పుడు ఎంతో చురుగ్గా ఉంటారని పేర్కొన్నారు. అయితే వచ్చే అమెరికా అధ్యక్ష ఎన్నికల్లో మీరు అధ్యక్షుడిగా.. వివేక్ రామస్వామిని ఉపాధ్యక్ష అభ్యర్థిగా పరిగణించారా అని ఇంటర్వ్యూ చేసే వ్యక్తి ప్రశ్నించారు. దీనికి సమాధానం ఇచ్చిన డొనాల్డ్ ట్రంప్.. అమెరికా ఉపాధ్యక్ష పదవికి వివేక్ రామస్వామి తగిన వ్యక్తి అని భావిస్తున్నట్లు బదులిచ్చారు.

అయితే ఇప్పటివరకు వస్తున్న వార్తలు.. జరిగిన తొలి అధ్యక్ష అభ్యర్థిత్వ డిబేట్‌లో వివేక్ రామస్వామి ముందు వరుసలో ఉన్నట్లు తెలుస్తోంది. ఇటీవల ఆగస్టు 23 వ తేదీన రిపబ్లికన్‌ పార్టీ తొలి ప్రెసిడెన్షియల్‌ డిబేట్‌ జరిగింది. అయితే ఈ డిబేట్‌కు డొనాల్డ్‌ ట్రంప్‌ హాజరు కాలేదు. ఈ డిబేట్‌లో వివేక్‌ రామస్వామి, నిక్కీ హేలీ తోపాటు అమెరికా అధ్యక్ష అభ్యర్థిత్వానికి పోటీ పడుతున్న వారు

పాల్గొన్నారు. అయితే ఈ తొలి ప్రెసిడెన్షియల్ డిబేట్‌పై డొనాల్డ్ ట్రంప్‌ స్పందించారు. ఈ డిబేట్‌లో వివేక్‌ రామస్వామి నిజాయతీ కారణంగా భారీ విజయం సాధించినట్లు తాను భావిస్తున్నట్లు డొనాల్డ్ ట్రంప్ తెలిపారు. థాంక్యూ వివేక్‌ అని తన సొంత సోషల్‌ మీడియా వేదిక ట్రూత్‌లో ట్రంప్‌ వెల్లడించారు.

మరోవైపు.. అమెరికా అధ్యక్ష అభ్యర్థిత్వ రేసులో రిపబ్లికన్ పార్టీ తరఫున అందరికంటే డొనాల్డ్ ట్రంప్ ముందున్నట్లు సర్వేలు చెబుతున్నాయి. ఇటీవల పార్టీ సదస్సులో వివేక్ రామస్వామి తన వాదనలతో అందర్నీ ఆకట్టుకున్నారు. అయితే డొనాల్డ్ ట్రంప్‌పై కేసులు, ఇతర కారణాలతో ఆయన అధ్యక్ష పోటీలో చివరి వరకు నిలుస్తారా లేదా అనేది సందేహాస్పదంగా మారిన నేపథ్యంలో వివేక్ రామస్వామి కీలకం కానున్నారు. ట్రంప్‌తో పోటీ పడటానికి వివేక్ రామస్వామి వ్యూహాలా రచిస్తున్నారు. మరోవైపు.. అన్ని అడ్డంకులు తొలిగిపోయి.. డొనాల్డ్ ట్రంప్ అధ్యక్ష అభ్యర్థిగా ఎన్నికైతే ఉపాధ్యక్ష అభ్యర్థిగా ఉండటానికి కూడా వివేక్ రామస్వామి సిద్ధమవుతున్నట్లు తెలుస్తోంది.