లోక్‌సభ ఎంపీగా అనర్హత వేటు,,,మాజీ ప్రధాని దేవెగౌడ మనవడికి హైకోర్టు షాక్

కర్ణాటకలో జేడీఎస్ పార్టీకి బిగ్ షాక్ తగిలింది. 2019 లో ఆ పార్టీ తరఫున గెలిచిన ఏకైక ఎంపీపై వేటు పడింది. లోక్‌సభ ఎంపీ ప్రజ్వల్ రేవణ్ణ ఎన్నిక చెల్లదంటూ కర్ణాటక హైకోర్టు శుక్రవారం కీలక తీర్పు వెలువరించింది. ప్రజ్వల్ రేవణ్ణ.. మాజీ ప్రధాని హెచ్‌డీ దేవెగౌడ మనవడు, కర్ణాటక మాజా మంత్రి హెచ్‌డీ రేవణ్ణ కుమారుడు. 2019 లో జరిగిన సార్వత్రిక ఎన్నికల్లో భాగంగా నామినేషన్‌ వేసినపుడు ప్రజ్వల్ రేవణ్ణ తప్పుడు వివరాలతో అఫిడవిట్‌ దాఖలు చేసినట్లు కర్ణాటక హైకోర్టు ధ్రువీకరించింది. దీంతో ఆయన ఎంపీ పదవిపై అనర్హత వేటు వేసిన కర్ణాటక హైకోర్టు సింగిల్ బెంచ్.. వచ్చే ఆరు ఏళ్ల పాటు ఎలాంటి ఎన్నికల్లో పోటీ చేయకుండా అనర్హత విధిస్తున్నట్లు సంచలన తీర్పు చెప్పింది.

33 ఏళ్ల ప్రజ్వల్‌ రేవణ్ణ.. ప్రస్తుత పార్లమెంట్‌లో మూడో అతి చిన్న వయస్సు ఉన్న ఎంపీగా ఉన్నారు. లోక్‌సభలో జేడీఎస్‌ తరఫున ఉన్న ఒకే ఒక ఎంపీ కూడా ప్రజ్వల్ రేవణ్ణే కావడం గమనార్హం. కర్ణాటక మాజీ మంత్రి హెచ్‌డీ రేవణ్ణ కుమారుడైన ప్రజ్వల్‌ రేవణ్ణ 2019 లోక్‌సభ ఎన్నికల్లో కర్ణాటకలోని హసన్‌ లోక్‌సభ స్థానం నుంచి పోటీ చేసిన విజయం సాధించారు. అయితే ఆ ఎన్నికల్లో ప్రజ్వల్‌ రేవణ్ణ ఎన్నికల సంఘానికి నామినేషన్ సమయంలో తప్పుడు వివరాలు కలిగిన అఫిడవిట్‌ సమర్పించారని ఆరోపిస్తూ రెండు పిటిషన్లు దాఖలు కాగా.. వాటిపై విచారణ జరిపిన కర్ణాటక హైకోర్టు ప్రజ్వల్ రేవణ్ణపై వేటు వేసింది.

హసన్‌ నియోజకవర్గంలోని జి. దేవరాజెగౌడ అనే ఓటరుతోపాటు ఆ స్థానంలో ప్రజ్వల్ రేవణ్ణపై పోటీ చేసిన బీజేపీ అభ్యర్థి ఎ.మంజు చెరో పిటిషన్ దాఖలు చేశారు. ఈ పిటిషన్లను విచారించిన కర్ణాటక హైకోర్టు.. ప్రజ్వల్‌ రేవణ్ణ అఫిడవిట్‌లో తన ఆస్తులను పూర్తిగా వెల్లడించకుండా ఎన్నికల్లో అవకతవకలకు పాల్పడ్డారని గుర్తించింది. దీంతో లోక్‌సభ ఎంపీగా ప్రజ్వల్ రేవణ్ణ ఎన్నిక చెల్లదని శుక్రవారం సంచలన తీర్పు వెలువరించింది. మరోవైపు.. ప్రజ్వల్‌ రేవణ్ణపై అనర్హత వేటు వేయడంతో హసన్‌ స్థానం నుంచి తనను ఎంపీగా ప్రకటించాలని బీజేపీ అభ్యర్థి మంజు చేసిన అభ్యర్థనను కూడా హైకోర్టు కొట్టి వేసింది. మంజు కూడా అవినీతి ఆరోపణలను ఎదుర్కొంటుండటంతో హసన్‌ స్థానం నుంచి అతడు ఎన్నికైనట్లు ప్రకటించలేమని స్పష్టం చేసింది. ఇక ఎన్నికల్లో అవకతవకలకు పాల్పడినందుకు గానూ.. ప్రజ్వల్‌ తండ్రి హెచ్‌డీ రేవణ్ణ, సోదరుడు సూరజ్‌పైనా చర్యలు తీసుకోవాలని ఎన్నికల సంఘాన్ని ఈ సందర్భంగా హైకోర్టు ఆదేశించింది.

జేడీఎస్‌ అధినేత, మాజీ ప్రధాని దేవెగౌడ మనవడు ప్రజ్వల్‌ రేవణ్ణ 2019లో తొలిసారి ఎన్నికల్లో పోటీ చేసి గెలుపొందారు. మనవడి కోసం దేవెగౌడ తన కంచుకోట అయిన హసన్‌ స్థానాన్ని వదిలేసి తుముకూరు స్థానం నుంచి పోటీ చేయగా.. ఓటమిపాలయ్యారు. 2109 లోక్‌సభ ఎన్నికల్లో జేడీఎస్‌ 6 స్థానాల్లో పోటీ చేయగా.. ప్రజ్వల్‌ రేవణ్ణ మినహా ఎవరూ గెలవలేదు. ఇదిలా ఉండగా.. ప్రజ్వల్‌కు వ్యతిరేకంగా హైకోర్టులో పిటిషన్‌ వేసిన మంజు.. ఆ తర్వాత బీజేపీని వీడి జేడీఎస్‌లో చేరడం గమనార్హం. ప్రస్తుతం జేడీఎస్‌ తరఫున ఇటీవల జరిగిన కర్ణాటక అసెంబ్లీ ఎన్నికల్లో విజయం సాధించి మంజు ఎమ్మెల్యేగా కొనసాగుతున్నారు.