ఏసీ ఆన్ చేసిన వెంటనే వింత శబ్దాలు,,,ఏం జరిగిందని చూసి భయంతో పరుగు
Andhra Pradesh Telugu | Suryaa Desk | Published : Sun, Sep 03, 2023, 09:38 PM
విశాఖ స్టీల్ ప్లాంట్ టౌన్షిప్ సెక్టార్ 11లోని ఉద్యోగి రామస్వామి ఇంట్లో కుటుంబ సభ్యులు బెడ్రూమ్లో ఏసీ ఆన్ చేశారు. ఇంతలో ఏసీ నుంచి వింత శబ్దాలు వస్తున్నాయి.. ఏమైందా అని దగ్గరకు వెళ్లి చూస్తే గుండె ఆగినంత పనైంది. ఏసీలో పాము కనిపించింది.. ఏసీ లోపలి నుంచి పాము తొంగి చూడటాన్ని గమనించారు.. దానిని చూసి వారికి వణుకుపుట్టింది. దీంతో వారు భయంతో పరుగులు పెట్టారు. వెంటనే స్నేక్ క్యాచర్ కిరణ్కు సమాచారం అందించారు. ఆయన రంగంలోకి దిగి ఏసీలో నుంచి ఏడు అడుగుల జెర్రిగొడ్డును బయటకు తీశాడు. ఆ పామును తీసుకెళ్లి దూరంగా వదిలేశారు.
ఏసీలోకి చొరబడింది జెర్రిగొడ్డుగా గుర్తించారు. పామును చాకచక్యంగా బయటకు తీయడంతో ఆ కుటుంబం ఊపిరి పీల్చుకుంది. పాము ఏసీ అవుట్ డోర్ యూనిట్ నుంచి.. పైపులో నుంచి ఇండోర్ యూనిట్లోకి వచ్చి ఉండొచ్చని అనుమానిస్తున్నారు. బయట ఎండలు మండిపోతుంటే.. చల్లదనం కోసం పాము కూడా ఏసీలోకి దూరిందని అందరూ నవ్వుకున్నారు. పాము ఏసీలోకి ఎందుకు చొరబడటం చర్చనీయాంశం అయ్యింది. పామును ఆ కుటుంబం ముందుగానే గమనించబట్టి సరిపోయింది.. లేకపోతే పరిస్థితి ఏంటని చర్చించుకున్నారు. ఇటీవల కాలంలో ఇలాంటి ఘటనలు చాలానే జరిగాయి. ఏసీలతో పాటు బైక్, కారుల్లోకి కూడా పాములు దూరేస్తున్నాయి. ఒకప్పుడు బయట తిరిగే పాములు.. ఇప్పుడు జనావాసాల మధ్యకు వస్తున్నాయి. అందుకే ఇళ్లకు సమీపంలో చెత్తను ఉంచొద్దని సూచిస్తున్నారు.. ఎప్పటికప్పుడు తొలగించాలంటున్నారు. మొత్తం మీద పాములు ఇళ్లలోకి రావడం భయాందోళనలు కలిగిస్తోందనే చెప్పాలి.
|
|