ఫేస్‌బుక్‌లో పరిచయం,,గుడిలో ప్రేమ పెళ్లి

యువకుడికి మరో యువతి ఫేస్‌బుక్‌లో పరిచయం అయ్యింది. ఆ తర్వాత ఇద్దరు ప్రేమించుకుని గుడిలో పెళ్లి చేసుకున్నారు. మూడు నెలల తర్వాత ఉన్నట్టుండి యువతి కుటుంబ సభ్యులు యువకుడి కుటుంబంపై దాడికి దిగారు. అసలు ఏం జరిగిందని ఆరా తీస్తే.. అసలు ట్విస్ట్ బయటపడింది. తిరుపతి జిల్లా పెళ్లకూరు మండలంలోని చెన్నప్పనాయుడుపేట వడ్డిపాలెంకు చెందిన హరిబాబు పాత ఇనుము వ్యాపారం చేస్తున్నాడు. అతడికి నంద్యాల జిల్లా పాణ్యం మండలం బలపనూరుకు చెందిన సుకన్యతో పరిచయం ఏర్పడింది.

సుకన్య నెట్‌ సెంటర్‌లో పని చేస్తుండగా.. వీరిద్దరికీ ఫేస్‌బుక్‌ ద్వారా పరిచయం ఏర్పడి ప్రేమగా మారింది. మూడు నెలల క్రితం నెల్లూరు జిల్లా బుచ్చిరెడ్డిపాలెం మండలం జొన్నవాడలోని కామాక్షితాయి ఆలయంలో ఇద్దరు పెళ్లి చేసుకున్నారు. కూతురి ప్రేమపెళ్లి ఇష్టం లేని సుకన్య తల్లిదండ్రులు కృష్ణుడు, చౌడేశ్వరి పెళ్లకూరు పోలీస్‌ స్టేషన్‌లో ఫిర్యాదు చేశారు. దీంతో పోలీసులు ఇద్దరినీ పిలిచి ప్రశ్నించారు. తాను హరిబాబుతోనే ఉంటానని సుకన్య చెప్పడంతో తల్లిదండ్రులు అక్కడి నుంచి వెళ్లిపోయారు.

అయితే తమ కుమార్తె జీవితానికి భరోసాగా హరిబాబుకు చెందిన కొంత ఆస్తి ఇవ్వాలని సుకన్య తల్లిదండ్రులు అడిగారు. యువకుడికి తమ్ముడు ఉండటంతో ఆస్తి రాయడం కుదరదని చెప్పారు. ఈ క్రమంలో ఏం జరిగిందో ఏమో మంగళవారం మూడు కార్లలో బలపనూరు నుంచి సీఎన్‌పేట వడ్డిపాలెం వచ్చిన 20మంది యువతి బంధువులు.. ఇంట్లో ఉన్న హరిబాబుపై, ఆయన తల్లి కోటమ్మపై కర్రలతో, రాడ్లతో దాడికి దిగారు. బాదితులు పెద్దగా కేకలు వేయడంతో స్థానికులు వచ్చి నిందితుల్ని అడ్డుకున్నారు. అయితే కొంతమంది కారులో పరారయ్యారు.. దాడి చేసిన సుకన్య తల్లిదండ్రులతో పాటు మరో ఇద్దరు మహిళలను స్థానికులు పట్టుకుని పోలీసులకు అప్పగించారు.

ఈ దాడిలో గాయపడిన తల్లీ కొడుకులను నాయుడుపేట ప్రభుత్వ ఆస్పత్రికి తరలించారు. అనంతరం మెరుగైన వైద్యం కోసం కోటమ్మను తిరుపతికి తరలించారు. ఆమె పరిస్థితి విషమంగా ఉన్నట్లు తెలుస్తోంది. ఈ ఘటనపై పోలీసులు కేసు నమోదు చేసి దర్యాప్తు చేస్తున్నారు. హరిబాబు కుటుంబంపై దాడి జరిగిన సమయంలో సుకన్య తన భర్త బంధువుల గ్రామానికి వెళ్లినట్లు చెబుతున్నారు. ఈ ఘటన స్థానికంగా కలకలంరేపింది. ఈ దాడి ఘటనకు సంబంధించిన పూర్తి వివరాలు తెలియాల్సి ఉంది. ఈ దాడికి ఆస్తి వ్యవహారమే కారణమా.. ఇతర కారణాలు ఉన్నాయా అనే కోణంలో పోలీసులు ఆరా తీస్తున్నారు. హరిబాబును అడిగి వివరాలు సేకరిస్తున్నారు.