జీ 20 సదస్సు జరగనున్న నేపథ్యంలో,,,సెప్టెంబరు 8 నుంచి 11 వరకు 3 రోజులు విమానాలు బంద్

ప్రతిష్ఠాత్మక జీ 20 దేశాధినేతల సదస్సుకు సర్వం సిద్ధమైంది. దేశ రాజధాని ఢిల్లీలోని ప్రగతి మైదాన్‌లో ఉన్న భారత్ మండపంలో జరిగే జీ 20 దేశాధినేతల సమావేశానికి అన్ని ఏర్పాట్లను ప్రభుత్వం పూర్తి చేసింది. ఈ నేపథ్యంలోనే ఈ నెల 9, 10 తేదీల్లో ఈ సమావేశాలు జరగనున్నాయి. ఈ క్రమంలోనే ఢిల్లీలోని ఇందిరా గాంధీ అంతర్జాతీయ విమానాశ్రయం కీలక విషయాలు వెల్లడించింది. జీ 20 సదస్సు జరుగుతున్న నేపథ్యంలో దాదాపు 160 విమానాలు రద్దయ్యే అవకాశాలు ఉన్నాయని ఢిల్లీ ఎయిర్‌పోర్టు లిమిటెడ్ ప్రతినిధులు వెల్లడించారు. సెప్టెంబరు 9 నుంచి 11 వరకు 3 రోజుల పాటు ఢిల్లీ నుంచి బయల్దేరే 80 విమానాలతోపాటు ఢిల్లీకి వచ్చే మరో 80 విమానాలను రద్దు చేస్తున్నట్లు ప్రకటించారు. జీ 20 దేశాధినేతలు వస్తున్న సందర్భంగా కేంద్ర ప్రభుత్వం విజ్ఞప్తి చేయడంతో ఢిల్లీలో ఈ తరహ ఆంక్షలు విధిస్తున్నట్లు తెలిపారు.

జీ 20 దేశాధినేతల సదస్సుకు ఢిల్లీ ఆతిథ్యం ఇస్తున్న కారణంగా ఆ 3 రోజుల్లో విధించిన ట్రాఫిక్‌ నిబంధనలతో ఈ పరిస్థితి తలెత్తిందని ఢిల్లీ ఎయిర్‌పోర్టు లిమిటెడ్ అధికారులు పేర్కొన్నారు. ఈ సదస్సు కోసం ఎయిర్‌ పోర్టులో అన్ని రకాల పరికరాలు, పార్కింగ్‌ సౌకర్యాలను సిద్ధంగా ఉంచినట్లు వివరించారు. అంచనాల ప్రకారం ఆ 3 రోజుల్లో రాకపోకలు సాగించే 160 డొమెస్టిక్ ఫ్లైట్‌లు రద్దు అయ్యే అవకాశం ఉందని భావిస్తున్నట్లు తెలిపారు. సాధారణంగా ఈ సంఖ్య ఇందిరాగాంధీ ఇంటర్నేషనల్ ఎయిర్‌ పోర్టు నుంచి సాగించే దేశీయ విమానాల రాకపోకల్లో కేవలం 6 శాతానికి సమానమని వెల్లడించారు. అయితే తాజాగా విధించిన ఆంక్షల కారణంగా ఇంటర్నేషనల్ ఫ్లైట్స్‌కు ఎలాంవంటి ఇబ్బందులు లేవని స్పష్టం చేశారు. ప్రయాణికులకు కలిగే అసౌకర్యాన్ని వీలైనంత వరకు తగ్గించేందుకు ఆయా విమానయాన సంస్థలతో కలిసి పనిచేస్తున్నట్లు ఢిల్లీ ఎయిర్‌పోర్టు లిమిటెడ్‌ ప్రతినిధి పేర్కొన్నారు.

మరోవైపు విమానయాన సంస్థలు కూడా ప్రయాణికులకు అసౌకర్యాన్ని తగ్గించేందుకు చర్యలు చేపట్టాయి. ముఖ్యంగా విస్తారా, ఎయిర్‌ ఇండియా వంటి సంస్థలు తాము ఎంపిక చేసిన రీషెడ్యూల్‌ అయిన విమానాలకు సంబంధించిన బుకింగ్స్‌ను.. ప్రయాణికులు మార్చుకునేందుకు అవకాశం కల్పించాయి. అయితే ఇది ఒకసారి మార్చుకొనేందుకు ఎలాంటి అదనపు ఛార్జీలు చెల్లించాల్సిన అవసరం లేదని స్పష్టం చేశాయి. ఈ విషయాన్ని ట్విటర్‌ వేదికగా విస్తారా, ఎయిర్‌ఇండియా ప్రకటించాయి. ఇక ఆ 3 రోజుల్లో ప్రయాణికులు తమ విమాన సర్వీసుల స్టేటస్‌లను జాగ్రత్తగా చెక్‌ చేసుకోవాలని విస్తారా, ఎయిర్‌ ఇండియాలు సూచించాయి. మరోవైపు జీ 20 సందర్భంగా ఢిల్లీలో విధించే ట్రాఫిక్‌ ఆంక్షల నేపథ్యంలో ప్రయాణికులు తొందరగా బయల్దేరి విమానాశ్రయానికి చేరుకోవాలని స్పైస్‌జెట్‌ సూచించింది. చెక్‌ ఇన్‌ కౌంటర్లను కూడా ప్రయాణానికి గంట ముందే మూసివేస్తామని వెల్లడించింది.

ప్రస్తుతం ఢిల్లీ ఎయిర్‌ పోర్టులో 220 పార్కింగ్‌ స్టాండ్‌లు ఉన్నాయి. అయితే విమానాల రద్దీ పెరగడంతో అవి కూడా సరిపోవడం లేదు. వీటితో పాటు గో ఫస్ట్‌ విమానయాన సంస్థ దివాలా తీయడంతో ఆ సంస్థకు చెందిన 50 విమానాలు ఇప్పటికే అక్కడ పార్కింగ్‌లో ఉన్నాయి. దీంతో ఆ 3 రోజుల్లో ఢిల్లీ ఎయిర్‌పోర్టులో ఛార్టర్డ్‌ విమానాలు, బిజినెస్‌ జెట్‌ల ల్యాండింగ్‌, టేకాఫ్‌లను అనుమతించకూడదని ఎయిర్‌పోర్ట్‌ అథారిటీ ఆఫ్‌ ఇండియా, ఎయిర్‌ ఆర్మ్‌ ట్రాఫిక్‌ కంట్రోల్‌ తాజాగా ఆదేశాలు జారీ చేశాయి.