ఇండియా భారత్‌ల మధ్య తేడాను వివరించిన లాలూ,,,,వైరల్‌గా మారిన లాలూ పాత వీడియో

జీ 20 దేశాధినేతల సదస్సు సందర్భంగా విందు కోసం ఇచ్చిన ఆహ్వాన పత్రికలో ప్రెసిడెంట్ ఆఫ్ ఇండియా స్థానంలో ప్రెసిడెంట్ ఆఫ్ భారత్ అని.. తాజాగా ప్రధాని ఇండోనేషియా పర్యటన సందర్భంగా ప్రైమ్ మినిస్టర్ ఆఫ్ ఇండియా అనే స్థానంలో ప్రైమ్ మినిస్టర్ ఆఫ్ భారత్ అని ప్రచురించడంతో దేశంలో కొత్త చర్చకు తెరలేసింది. ఇండియా పేరును భారత్ అని మార్చే ప్రయత్నాలు కేంద్ర ప్రభుత్వం చేస్తోందంటూ వార్తలు, ఊహాగానాలు గుప్పుమన్నాయి. ఈ క్రమంలోనే కేంద్రంలోని ఎన్డీఏ సర్కార్‌పై ప్రతిపక్ష పార్టీలు తీవ్ర విమర్శలు గుప్పిస్తున్నాయి. దేశ ప్రజల నుంచి కూడా మిశ్రమ స్పందనలు వినిపిస్తున్నాయి. ఈ క్రమంలోనే గతంలో ఓ టీవీ ఛానల్ ఇంటర్వ్యూలో ఆర్జేడీ అధినేత లాలూ ప్రసాద్ యాదవ్ మాట్లాడిన మాటలు ఇప్పుడు వైరల్‌గా మారాయి. ఇంతకీ లాలూ ఏం అన్నారంటే.

కొన్నేళ్ల క్రితం రాష్ట్రీయ జనతాదళ్ అధినేత లాలూ ప్రసాద్ యాదవ్ ఓ టీవీ ఛానెల్‌కు ఇంటర్వ్యూ ఇచ్చారు. ఈ ఇంటర్వ్యూలో భారత్, ఇండియాకు మధ్య తేడాను వివరించారు. అయితే ఆ వీడియో ఇప్పుడు సోషల్ మీడియాలో తెగ వైరల్ అవుతోంది. వేప పుల్లతో పళ్లు తోముకుంటూ ఉన్న లాలూ ప్రసాద్ యాదవ్ భారత్, ఇండియా మధ్య మధ్య తేడాను వివరించారు. ఇంటర్వ్యూ సందర్భంగా ఢిల్లీలో వేప పుల్లలు దొరుకుతాయా అని సదరు టీవీ ఛానల్ జర్నలిస్ట్.. లాలూ ప్రసాద్ యాదవ్‌కు ఒక ప్రశ్నను సంధిస్తారు. దానికి తనదైన శైలిలో లాలూ సమాధానం ఇచ్చారు. ఢిల్లీ అనేది ఇండియా కిందకు వస్తుందని అక్కడ వేప పుల్లలు దొరకవని.. ఇక తన స్వస్థలం బిహార్‌లోని పాట్నా భారత్ కిందకు వస్తుందని అక్కడ వేప పుల్లలు దొరుకుతాయని వ్యాఖ్యానించారు. పళ్లు తోముకునేందుకు వేప పుల్లలు భారత్‌లో సులువుగా దొరుకుతాయని లాలూ ఆ వీడియోలో చెప్పారు. అయితే దీనికి సంబంధించిన వీడియో ప్రస్తుతం సోషల్ మీడియాలో తెగ చక్కర్లు కొడుతోంది.

తాజాగా కేంద్ర ప్రభుత్వం విడుదల చేస్తున్న కొన్ని ప్రకటనల్లో ఇండియా స్థానంలో భారత్ అని ప్రచురించి ఉండటం దేశ వ్యాప్తంగా తీవ్ర అయోమయానికి గురి చేస్తోంది. ఇండియా పేరును భారత్ అని మార్చుతారు అనే ఊహాగానాలు రోజు రోజుకూ పెరిగిపోతున్నాయి. ఈ క్రమంలోనే ఈనెల 18 నుంచి 22 వ తేదీ వరకు జరిగే ప్రత్యేక పార్లమెంట్ సమావేశాల్లో ఇండియా పేరు భారత్‌గా మార్చుతూ బిల్లు తీసుకురావచ్చనే ఊహాగానాలు వస్తున్నాయి. అయితే కేంద్రం నుంచి ఎలాంటి అధికారిక ప్రకటన రాకపోవడం గమనార్హం. ఈ పేరు మార్పుపై తీవ్రంగా విమర్శలు గుప్పిస్తున్న ప్రతిపక్షాలు.. ఇండియా కూటమి అని పేరు పెట్టుకోవడం వల్లే బీజేపీ భయపడి దేశం పేరు భారత్‌గా మార్చాలని చూస్తోందని మండిపడుతున్నాయి.