వన్డే ప్రపంచ కప్ జట్టులో తెలుగు క్రికెటర్ తేజ నిడమనూరు

భారత్ వేదికగా మరో నాలుగు వారాల్లో ప్రారంభం కానున్న వన్డే వరల్డ్‌కప్‌- 2023 టోర్నీకి నెదర్లాండ్స్‌ క్రికెట్‌ బోర్డు తమ జట్టును ప్రకటించింది. ఈ మెగా టోర్నీ కోసం ఇప్పటికే భారత్, ఆస్ట్రేలియా, ఇంగ్లాండ్, సౌతాఫ్రికా వంటి జట్లు తమ జట్లను ప్రకటించాయి. తాజాగా నెదర్లాండ్స్ క్రికెట్ బోర్డు సైతం మెగా ఈవెంట్‌లో పాల్గొనే 15 మంది సభ్యుల పేర్లను ప్రకటించింది. ఈ జట్టులో తెలుగు మూలాలున్న తేజ నిడమనూరుకు చోటు దక్కింది. తేజ పూర్తి పేరు అనిల్‌ తేజ నిడమనూరు. స్వస్థలం ఆంధ్రప్రదేశ్‌లోని విజయవాడ. 1994లో ఆగష్టు 22న పాండురంగారావు, పద్మావతి దంపతులు తేజకు జన్మనిచ్చారు.

తేజ ఏడళ్ల వయసులో ఉన్నప్పుడే అతడి కుటుంబం న్యూజిలాండ్‌కు షిఫ్ట్ అయింది. అక్కడి నుంచి నెదర్లాండ్స్‌కు వెళ్లిన తేజ.. తన ప్రతిభతో నెదర్లాండ్స్ క్రికెట్ జట్టులో చోటు సాధించాడు. వన్డే వరల్డ్ కప్‌ కోసం నెదర్లాండ్స్ ఎంపిక చేసిన జట్టులో తేజ నిడమనూరు పుట్టిన దేశమైన భారత్‌లో జరిగే మెగా టోర్నీలో నెదర్లాండ్స్ తరఫున బరిలో దిగనున్నాడు.

ఇక జింబాబ్వే వేదికగా జరిగిన క్వాలిఫయర్స్ టోర్నీలో నెదర్లాండ్స్ అద్భుత ప్రదర్శనతో ఆకట్టుకుంది. సూపర్‌ సిక్స్‌ మ్యాచ్‌లో స్కాట్లాండ్‌పై భారీ విజయం సాధించి చివరి బెర్తును సొంతం చేసుకుంది. ప్రపంచకప్ క్వాలిఫయర్స్ ప్రారంభానికి ముందే తేజ నిడమనూరు ఓ వాగ్దనం చేశాడు. ఒకవేళ నెదర్లాండ్స్ టీం.. భారత్‌లో జరిగే వన్డే వరల్డ్ కప్‌కి అర్హత సాధిస్తే గుండు తీయించుకుంటానని మాట ఇచ్చాడు. ఇచ్చిన మాట ప్రకారం గుండు తీయించుకొని ఆశ్చర్యపరిచాడు.

ఇక వన్డే వరల్డ్ కప్‌లో నెదర్లాండ్స్ జట్టును వికెట్‌ కీపర్‌ బ్యాటర్‌ స్కాట్‌ ఎడ్వర్డ్స్‌ ముందుండి నడిపించన్నాడు. ప్రపంచకప్ క్వాలిఫయర్స్ టోర్నీకి దూరంగా ఉన్న వాన్ డెర్ మెర్వే, అకెర్మాన్‌లకు తిరిగి జాతీయ జట్టులో చోటు దక్కించుకున్నారు. ఇక నెదర్లాండ్స్‌ ప్రపంచకప్ ఆడటం ఇది ఐదోసారి. చివరిసారిగా భారత్‌ వేదికగా జరిగిన 2011 వన్డే ప్రపంచకప్‌లో ఆడింది. మళ్లీ 12 ఏళ్ల తర్వాత భారత్ వేదికనే టోర్నీలోకి అడుగుపెట్టనుంది. మెగాటోర్నీలో భాగంగా నెదర్లాండ్ జట్టు తన తొలి మ్యాచులో పాకిస్థాన్‌తో తలపడనుంది. అక్టోబర్ 6న హైదరాబాద్ వేదికగా మ్యాచు జరగనుంది.

నెదర్లాండ్స్ వన్డే ప్రపంచకప్ జట్టు:

స్కాట్ ఎడ్వర్డ్స్ (కెప్టెన్‌), మాక్స్ ఓడౌడ్, బాస్ డి లీడే, విక్రమ్ సింగ్, తేజ నిడమనూరు, పాల్ వాన్ మీకెరెన్, కోలిన్ అకెర్మాన్‌, రోలోఫ్ వాన్ డెర్ మెర్వే, లోగాన్ వాన్ బీక్, ఆర్యన్ దత్, ర్యాన్ క్లైన్, వెస్లీ బరేసి, సకిబ్ జుల్ఫికర్, షరీజ్ అహ్మద్, సిబ్రాండ్ ఎంగెల్‌బ్రెచ్ట్.