మళ్ళీ వెబ్‌ ఆప్షన్లు పెట్టుకోవాల్సిందే

 మెడికల్‌ పీజీ మేనేజ్‌మెంట్‌ కోటా సీట్లకు మళ్లీ కౌన్సెలింగ్‌ నిర్వహించాలని ఆరోగ్య విశ్వవిద్యాలయం నిర్ణయించింది. ఎన్‌ఎంసీ నుంచి వచ్చిన ఆదేశాల మేరకు రాజమహేంద్రవరంలోని జీఎ్‌సఎల్‌ మెడికల్‌ కాలేజీలో అదనంగా పెరిగిన 14 సీట్లను రద్దు చేసి.. మొత్తం మేనేజ్‌మెంట్‌ కోటా సీట్లకు మళ్లీ కౌన్సెలింగ్‌ నిర్వహించాలని నిర్ణయించినట్టు వర్సిటీ అధికారులు గురువారం రాత్రి నోటిఫికేషన్‌ జారీ చేశారు. అభ్యర్థులంతా మళ్లీ వెబ్‌ ఆప్షన్లు ఇవ్వాలని సూచించారు. గురువారం రాత్రి నుంచి శుక్రవారం రాత్రి 11 గంటల్లోగా వెబ్‌ ఆప్షన్లు పెట్టుకోవడానికి అనుమతి ఇచ్చారు. ఎవరైనా అభ్యర్థులు కొత్తగా వెబ్‌ ఆప్షన్లు ఇవ్వకపోతే గతంలో ఇచ్చిన వాటినే పరిగణలోకి తీసుకుంటామని నోటిఫికేషన్‌లో పేర్కొన్నారు. కాగా, కన్వీనర్‌ కోటా అభ్యర్థులు కాలేజీల్లో చేరేందుకు వర్సిటీ అధికారులు ఇప్పటికే అనుమతి ఇచ్చారు. మరోవైపు ఫేక్‌ ఎల్‌వోపీలు అందుకున్న మూడు కాలేజీల ప్రిన్సిపాల్స్‌ గురువారం వర్సిటీ వైస్‌ చాన్స్‌లర్‌, రిజిస్ట్రార్‌లతో భేటీ అయ్యారు. తమ కాలేజీల్లో ఎలాంటి తప్పు లేదని, ఎన్‌ఎంసీ నుంచి వచ్చిన లేఖల ఆధారంగానే సీట్ల భర్తీకి చర్యలు తీసుకున్నామని వివరణ ఇచ్చినట్టు తెలిసింది. కాగా, తొలి విడత కౌన్సెలింగ్‌ రద్దయిన తర్వాత ఎన్‌ఎంసీ అధికారులు తమ వెబ్‌సైట్‌ ద్వారా కౌన్సెలింగ్‌ నిర్వహించాలని అన్ని రాష్ట్రాల వర్సిటీలకు లేఖలు రాశారు. ఈమేరకు విజయవాడ హెల్త్‌ వర్సిటీ రెండో విడత కౌన్సెలింగ్‌ చేపట్టింది. ఈ కౌన్సెలింగ్‌ తర్వాత కూడా జీఎ్‌సఎల్‌లో రేడియాలజీ సీట్లు 10 నుంచి 24కు పెరిగినట్లు ఎన్‌ఎంసీ గుర్తించింది. తాము 24 సీట్లకు అనుమతి ఇవ్వలేదని, అది ఫేక్‌ ఎల్‌వోపీ అని వర్సిటీకి లేఖ రాసింది. ఎన్‌ఎంసీ వెబ్‌సైట్‌లో ఉన్న దానిని ఎన్‌ఎంసీనే తప్పుపట్టినా ఆ సీట్లను తొలగించలేదు. గురువారం రాత్రి వరకూ జీఎ్‌సఎల్‌లో 24 రేడియాలజీ సీట్లకు అనుమతిచ్చినట్లు కనిపించింది.