ఎర్ర చందనం దొంగ అక్రమాస్తులని స్వాధీనం చేసుకున్న పోలీసులు
Andhra Pradesh Telugu | Suryaa Desk | Published : Fri, Sep 08, 2023, 01:45 PM
తమిళనాడుకు చెందిన ఎర్ర చందనం స్మగ్లర్ సెల్వరాజ్పై గతంలో మనీలాండరింగ్ నిరోధక చట్టం(పీఎంఎల్ఏ) కింద కేసు నమోదైంది. శేషాచలం ప్రాంతంలో మాత్రమే లభించే అరుదైన ఎర్రచందనాన్ని అక్రమంగా విదేశాలకు తరలించి కోట్లాది రూపాయలు ఆర్జించాడు. ఆ సొమ్ముతో ఖరీదైన ఆడి, బెంజ్, రేంజ్ రోవర్ లాంటి లగ్జరీ కార్లు కొనుగోలు చేసి విలాసవంతమైన జీవితాన్ని గడిపాడు. స్థిరాస్తి వ్యాపారాల్లోనూ పెట్టుబడులు పెట్టాడు. చిత్తూరు పోలీసులు సెల్వరాజ్ను అరెస్టు చేసినప్పుడు విదేశాలకు ఎర్రచందనం అక్రమంగా తరలించి సొమ్ము చేసుకున్నట్లు వెల్లడైంది. మనీలాండరింగ్కు పాల్పడినట్లు కూడా తేలింది. ఈ సమాచారంతో కేసు నమోదు చేసిన ఈడీ నిందితుడికి సంబంధించిన సంజనా మెటల్ వేర్ పేరుతో ఉన్న పరిశ్రమతోపాటు చెన్నైలోని రెడ్ హిల్స్ ప్రాంతంలో ఎనిమిది ఫ్లాట్లు, పుదుచ్చేరిలోని మరిన్ని స్థిరాస్తులు(రూ.7.54 కోట్ల విలువ) జప్తు చేసింది. అయితే, తాను ఎర్రచందనం స్మగ్లింగ్ పూర్తిగా మానేసినట్లు ఈడీ అధికారులకు సెల్వరాజ్ తెలిపాడు. ఏపీ పోలీసులు నమోదు చేసిన స్మగ్లింగ్ కేసు సైతం కోర్టులో వీగిపోయిందని చెప్పాడు. అయితే వన్య ప్రాణుల సంరక్షణ చట్టం, బయో డైవర్సిటీ యాక్టు కింద అతనిపై నమోదు చేసిన కేసులు విచారణలో ఉన్నాయి. ఈ నేపథ్యంలో నిందితుడిపై హైదరాబాద్లోని కోర్టులో అభియోగపత్రం దాఖలు చేసేందుకు ఈడీ సిద్ధమైంది.
|
|