రూ.192 కోట్ల విలువైన బంగారు నాణెం విడుదల.. ప్రపంచంలోనే అత్యంత విలువైంది

ప్రపంచంలోనే అత్యంత ఖరీదైన నాణేన్ని బ్రిటన్‌లో విడుదల చేశారు. ఈ కాయిన్‌ను తయారు చేయడానికి దాదాపు 4 కిలోల బంగారం.. 6,400 కంటే ఎక్కువ వజ్రాలను ఉపయోగించారు. ఇప్పటివరకు ప్రపంచంలో ఉన్న నాణేలలోకెల్లా అత్యంత విలువైందిగా ఈ నాణెం నిలిచింది. దీని విలువ దాదాపు 23 మిలియన్ డాలర్లు అంటే భారత కరెన్సీలో రూ.192 కోట్లు అని తెలిపారు. అయితే ఈ నాణేన్ని బ్రిటన్ రాణి క్వీన్ ఎలిజబెత్ 2 గుర్తుగా రిలీజ్ చేశారు. క్వీన్ ఎలిజబెత్ 2 చనిపోయి ఏడాది పూర్తయిన సందర్భంగా ఈ అత్యంత విలువైన నాణేన్ని విడుదల చేశారు.

దివంగత క్వీన్ ఎలిజబెత్ 2 గౌరవార్థం ఈ బంగారు, వజ్రాలతో తయారు చేసిన నాణేన్ని రూపొందించారు. ఈ నాణెం విలువ సుమారు 23 మిలియన్‌ డాలర్లు రూ.192 కోట్లు ఉంటుందని అని సీఎన్‌ఎన్‌ వార్తా సంస్థ నివేదించింది. బంగారం, వజ్రాలతో కలిపి తయారు చేసిన ఈ నాణేం ఇప్పుడు ప్రపంచంలోనే అత్యంత విలువైన నాణెంగా రికార్డు సృష్టించింది. క్వీన్‌ ఎలిజిబెత్‌ రాణి 2 మరణించి సెప్టెంబరు నాటికి ఏడాది పూర్తయింది. ఈ సందర్భంగా ఆమె గౌరవార్థం లైఫ్‌ స్టైల్‌ బ్రాండ్‌ ఈస్ట్‌ ఇండియా కంపెనీ అత్యంత ఖరీదైనా నాణేన్ని ఆవిష్కరించింది.

ఈ నాణెం తయారీలో భారీగా బంగారం, వజ్రాలను ఉపయోగించారు. 4 కిలోల బంగారం.. 6400 లకు పైగా వజ్రాలను వాడారు. 9.6 అంగుళాల కంటే ఎక్కువ వ్యాసంతో ఈ నాణెం.. బాస్కెట్‌బాల్‌ అంత పెద్ద పరిమాణంలో ఉంటుంది. కామన్వెల్త్‌ దేశాలకు చెందిన ప్రముఖ హస్త కళాకారులు మేరీ గిల్లిక్‌, ఆర్నాల్డ్‌ మచిన్‌, రాఫెల్‌ మక్లౌఫ్‌, ఇయాన్‌ ర్యాంక్‌ ఈ నాణేన్ని తయారు చేశారు. సుమారు 16 నెలల పాటు శ్రమించి ఈ నాణేన్ని రూపొందించిన్నట్లు ఈస్ట్ ఇండియా కంపెనీ ఓ ప్రకటనను విడుదల చేసింది.

ఈ నాణెంపై క్వీన్‌ ఎలిజిబెత్‌ 2 చిత్రాలు ఉంచారు. ఇక ఆ కాయిన్ మధ్యలో పెద్ద పరిమాణంలో కిరీటం గుర్తు ఉండే చిత్రం కనిపిస్తోంది. ఆ కాయిన్ వెనుక భాగంలో రాణి చిత్రం ఉంది. దాని చుట్టూ 10 చిన్న నాణేలను ఉంచారు. ఇప్పటి వరకు అత్యంత విలువైన నాణెంగా.. 1933 లో రూపొందించిన ‘‘డబుల్‌ ఈగిల్‌’’ పేరిట గిన్నిస్‌ రికార్డ్‌ ఉంది. సోథెబైస్‌ న్యూయార్క్‌లో జరిగిన వేలంలో ఇది 18.9 మిలియన్ల డాలర్లు అంటే మన కరెన్సీలో రూ.157 కోట్లు పలికింది. ప్రస్తుతానికి అయితే ఈ కొత్త కాయిన్‌ను విక్రయం గురించి ఎలాంటి వివరాలను ఈస్ట్ ఇండియా కంపెనీ వెల్లడించలేదు. బ్రిటిష్‌ పాలకులు వర్తక వ్యాపారం కోసం నెలకొల్పిన ఈస్ట్‌ ఇండియా కంపెనీ 1874 లో మూతపడిన విషయం తెలిసిందే. భారత సంతతికి చెందిన వ్యాపారవేత్త సంజీవ్‌ మెహతా 2010లో దీనిని కొనుగోలు చేశారు.