స్కిల్ డెవలప్‌మెంట్ కేసులో చంద్రబాబు అరెస్ట్,,,పవన్ కళ్యాణ్‌కు ఆర్జీవీ 9 ప్రశ్నలు

జనసేన అధినేత, పవర్ స్టార్ పవన్ కళ్యాణ్‌కు వివాదాస్పద దర్శకుడు రామ్ గోపాల్ వర్మ తొమ్మిది ప్రశ్నలు సంధించారు. ఈ తొమ్మిది ప్రశ్నలకు కేవలం ఒక్క పదంలో సమాధానాలు ఇవ్వాలని ఆయన కోరారు. ఈ తొమ్మిది ప్రశ్నలూ స్కిల్ డెవలప్‌మెంట్ కేసుకు సంబంధించినవే. ఈ కేసులో తెలుగుదేశం పార్టీ అధినేత చంద్రబాబు నాయుడుని ఏపీ సీఐడీ పోలీసులు అరెస్ట్ చేయడంతో.. చంద్రబాబుకు మద్దతుగా పవన్ కళ్యాణ్ మాట్లాడిన విషయం తెలిసిందే. కుట్రపూరితంగానే చంద్రబాబుపై తప్పుడు కేసులు పెట్టి అరెస్ట్ చేశారని పవన్ కళ్యాణ్ వ్యాఖ్యానించారు.

అయితే, ఈ స్కిల్ డెవలప్‌మెంట్ కేసుపై పవన్ కళ్యాణ్ చేసిన వ్యాఖ్యలకు వ్యతిరేకంగా రామ్ గోపాల్ వర్మ ఈ 9 ప్రశ్నలను సంధించారు. ఈ మేరకు ఆయన ఎక్స్(ట్విట్టర్) ద్వారా స్పందించారు. ‘గౌరవనీయులైన శ్రీ పవన్ కళ్యాణ్ గారూ, నా ఈ క్రింది తొమ్మిది ప్రశ్నలకు కేవలం వన్ వర్డ్ ఆన్సర్లు ఇవ్వగలరని నా రిక్వెస్ట్

1) అసలు స్కిల్ స్కాం జరిగిందా లేదా??

2) ఒకవేళ జరిగుంటే, చంద్రబాబు నాయుడు గారికి తెలియకుండా జరిగిందా?

3) 300 కోట్లు పైగా ప్రజాధనాన్ని ప్రొసీజర్స్ ఫాలో అవ్వకుండా, ఆఫీసర్స్ చెప్తున్నా వినకుండా రిలీజ్ చేశారా లేదా?

4) ఒక వేళ హెడ్ ఆఫ్ గవర్నమెంట్ చంద్రబాబు నాయుడు గారికి స్కాం గురించి తర్వాత తెలిసుంటే, దాని మీద ఇమ్మీడియట్ యాక్షన్ తీసుకోకపోవటం కరెక్టా?

5) ఎఫ్ఐఆర్ అనేది ఫస్ట్ ఇన్ఫర్మేషన్ రిపోర్ట్ మాత్రమే.. ఇన్వెస్టిగేషన్ ప్రొసీజర్‌లో సేకరించిన ఇన్ఫర్మేషన్ బట్టి ఎప్పుడైనా ఎవరి పేరైనా యాడ్ చెయ్యచ్చన్న విషయం మీకు తెలియదా?

6) చూపించిన డాక్యుమెంట్స్ బట్టి క్రైమ్ చేసినట్టు ప్రైమా ఫేసీ ఎవిడెన్స్ ఉందని నమ్మిన జడ్జ్ గారు బెయిల్ ఇవ్వకపోవటం తప్పా?

7) సెక్షన్ 409 అప్లయ్ అవుతుందని రిమాండ్ గ్రాంట్ చేసిన జడ్జ్ గారు కరప్టా?

8) లీడర్స్.. వాళ్ల నలభై ఏళ్ల బ్యాక్‌గ్రౌండ్ బట్టి కాదు, వాళ్లు చేసే పనులు బట్టి అనే విషయం మీకు తెలియదా?

9) నా తొమ్మిదవ చివరి ప్రశ్న, అసలు స్కిల్ స్కాం కేసు మీకేమర్థమయ్యిందో, దానిలోని తప్పులేంటో ఒక వీడియోలో కెమెరా వంక చూస్తూ వివరించగలరా?

థాంక్యూ అండి’ అని పవన్ కళ్యాణ్‌కు కౌంటర్ ఇస్తూ ప్రశ్నలు సంధించారు ఆర్జీవీ. ఈ ప్రశ్నలకు ఎలాగూ పవన్ కళ్యాణ్ స్పందించరనుకోండి. కాకపోతే, పవన్ కళ్యాణ్ అభిమానులు మాత్రం ఆర్జీవీపై విరుచుకుపడుతున్నారు.