చంద్రబాబుకు తారకరత్న పిల్లల మద్దతు,,,ఫోటోను ట్వీట్ చేసిన తెలుగు దేశం పార్టీ
Andhra Pradesh Telugu | Suryaa Desk | Published : Mon, Sep 18, 2023, 02:31 PM
మాజీ ముఖ్యమంత్రి, టీడీపీ అధినేత చంద్రబాబు స్కిల్ డెవలెప్మెంట్ కేసులో అరెస్టై రిమాండ్పై రాజమహేంద్రవరం సెంట్రల్ జైల్లో ఉన్నారు. అయితే ఆయన్ను అక్రమంగా అరెస్ట్ చేశారంటూ టీడీపీ కేడర్ కొద్దిరోజులుగా నిరసనలు చేపడుతోంది. తెలుగు రాష్ట్రాలతో పాటుగా బెంగళూరు, బళ్లారి వంటి ప్రాంతాల్లో.. విదేశాల్లోనూ టీడీపీ సానుభూతి పరులు, ఐటీ ఉద్యోగులు నిరసనల చేశారు. టీడీపీ కార్యకర్తలు నేతలు దీక్షలు చేస్తున్నారు.. అలాగే వినాయచవితి కావడంతో ప్రత్యేక పూజలు చేస్తున్నారు.
అయితే చంద్రబాబుకు దివంగత నందమూరి తారకరత్న పిల్లలు సంఘీభావం తెలిపారు. అక్రమంగా అరెస్ట్ చేసిన చంద్రబాబుకు తమ సంఘీభావాన్ని తెలుపుతున్న స్వర్గీయ నందమూరి తారకరత్న పిల్లలు అంటూ టీడీపీ ఫోటోను ట్వీట్ చేసింది. చంద్రబాబుతోనే మేము అంటూ ప్లకార్డుల్ని పట్టుకుని కనిపించారు. ఈ ఫోటోపై సోషల్ మీడియాలో వార్ నడుస్తోంది. పిల్లల్ని కూడా రాజకీయాల్లోకి లాగుతారా అంటూ కొందరు అంటుంటే.. తారకరత్న లేకపోయినా ఆయన పిల్లలు ఆ బాధ్యతని తీసుకున్నారు అంటూ కొందరు వ్యాఖ్యానిస్తున్నారు. ఈ ఫోటోను తారకరత్న సతీమణి అలేఖ్య కూడా సోషల్ మీడియాలో పోస్ట్ చేశారు.
|
|