డొనాల్డ్ ట్రంప్ చనిపోయారంటూ ట్వీట్ వైరల్,,,,ట్రంప్ కుమారుడి అకౌంట్ నుంచి పోస్ట్

వచ్చే ఏడాది జరగనున్న అమెరికా అధ్యక్ష ఎన్నికల్లో రిపబ్లికన్ పార్టీ తరఫున మరోసారి పోటీ చేస్తానని అమెరికా మాజీ అధ్యక్షుడు డొనాల్డ్ ట్రంప్ ఇప్పటికే స్పష్టం చేశారు. అయితే ఆయనను ఇప్పటికే ఎన్నో కేసులు చుట్టుముట్టిన వేళ.. అసలు ఆయన 2024 అమెరికా ఎన్నికల్లో పోటీ చేస్తారా లేదా అనే సందిగ్ధంగా మారింది. ఈ నేపథ్యంలోనే డొనాల్డ్ ట్రంప్ కుమారుడు.. డొనాల్డ్ ట్రంప్ జూనియర్ చేసిన ట్వీట్ సంచలనంగా మారింది. డొనాల్డ్ ట్రంప్ చనిపోయారంటూ ఆయన చేసిన ట్వీట్ ప్రస్తుతం సోషల్ మీడియాల్లో తెగ వైరల్‌గా మారింది. దీంతో ఇది నెటిజన్లకు తీవ్ర చర్చనీయాంశంగా మారింది. అయితే డొనాల్డ్ ట్రంప్ జూనియర్ ట్విటర్ అకౌంట్ హ్యాక్ అయ్యిందని.. ఫేక్ ట్వీట్లు చేశారని తర్వాత తెలియడంతో అంతా ఊపిరి పీల్చుకున్నారు. అసలు ఏం జరిగిందంటే.

డొనాల్డ్ ట్రంప్‌ కుమారుడు డొనాల్డ్‌ ట్రంప్‌ జూనియర్‌ ట్విటర్‌లో సెప్టెంబరు 20 బుధవారం ఉదయం 8.25 గంటలకు ఒక పోస్ట్ దర్శనమిచ్చింది. అయితే తన తండ్రి చనిపోయాడని చెప్పడానికి తాను చాలా చింతిస్తున్నానని పేర్కొన్నారు. వచ్చే 2024 అమెరికా అధ్యక్ష ఎన్నికల్లో తాను పోటీ చేయనున్నట్లు ప్రకటించారు. ఈ ట్వీట్ డొనాల్డ్ ట్రంప్ కుమారుడి ఖాతా నుంచి రావడంతో చాలా మంది నెటిజన్లు నిజం అని నమ్మేశారు. ఆ తర్వాత కూడా అదే ట్విటర్ అకౌంట్‌లో ప్రస్తుత అమెరికా అధ్యక్షుడు జో బైడెన్‌ను తిడుతూ మరిన్ని పోస్టులు పెట్టడంతో డొనాల్డ్ ట్రంప్ జూనియర్ ట్విటర్ అకౌంట్ హ్యాక్ అయిందని గుర్తించారు.

దీంతో డొనాల్డ్ ట్రంప్‌ జూనియర్‌ అకౌంట్‌ ట్విటర్ ఖాతా హ్యాక్‌ అయినట్లు గుర్తించిన ఆయన టెక్నికల్ సిబ్బంది రంగంలోకి దిగి చర్యలు చేపట్టారు. కొద్దిసేపటికే ఆ ట్విటర్ అకౌంట్‌ను చేశారు. హ్యాకర్లు పెట్టిన పోస్టులు మొత్తాన్ని డిలీట్ చేశారు. అయితే అప్పటికే ఆ ట్వీట్లన్నీ స్క్రీన్ షాట్లు తీసి నెటిజన్లు సోషల్ మీడియాల్లో పెట్టడంతో వైరల్‌గా మారాయి. అయితే ఈ ట్వీట్లు ఎవరు చేసిందన్నది మాత్రం ఇంతవరకు కనిపెట్టలేదు. అయితే సోషల్ మీడియాలో తాను మరణించినట్లు వస్తున్న వార్తలు, ట్వీట్లు, ప్రచారంపై డొనాల్డ్ ట్రంప్‌ స్పందించారు. డొనాల్డ్ ట్రంప్ జూనియర్ ట్విటర్ అకౌంట్ నుంచి పోస్టులు వచ్చిన తర్వాత అరగంటకు డొనాల్డ్ ట్రంప్ తన సొంత సోషల్‌ మీడియా వేదిక అయిన ట్రూత్‌ సోషల్‌లో ఒక పోస్ట్‌ పెట్టారు. దీంతో ఇదంతా హ్యాకర్ల పనేనని తెలియడంతో నెటిజన్లు ఊపిరి పీల్చుకున్నారు.