చంద్రబాబుకు మరో రెండు రోజుల పాటూ రిమాండ్ పొడిగింపు

మాజీ ముఖ్యమంత్రి చంద్రబాబుకు ఏసీబీ కోర్టు రెండు రోజుల పాటూ రిమాండ్ పొడిగించారు. ఇవాళ చంద్రబాబు రిమాండ్‌ సమయం ముగియడంతో చంద్రబాబును ఆన్‌లైన్‌ (వీడియో కాన్ఫరెన్స్‌) ద్వారా విజయవాడ ఏసీబీ స్పెషల్ కోర్టు జడ్జి ముందు హాజరయ్యారు. పోలీసు కస్టడీపై న్యాయమూర్తి చంద్రబాబు అభిప్రాయం కోరారు. చంద్రబాబును వర్చువల్‌గా కోర్టుకు హాజరుపరిచారు. సీఐడీ కస్టడీ అడుగుతోంది అభిప్రాయమేంటని.. 'మీ లాయర్లు కస్టడీ అవసరం లేదని వాదించారని.. కస్టడీకి ఇస్తే మీకేమైనా ఇబ్బంది ఉంటుందా?' అని అడిగారు.

అక్రమంగా తనను అరెస్ట్ చేశారని.. తన నిజాయితీ గురించి దేశం, రాష్ట్రంలో అందరికీ తెలుసన్నారు. తన హక్కుల్ని రక్షించాలని.. న్యాయాన్ని కాపాడాలని కోరారు. రాష్ట్రంలో తాను చేసిన అభివృద్ధి కనిపిస్తుందన్నారు.. తనపై రాజకీయంగా కక్షసాధిస్తున్నారు అన్నారు. తనకు నోటీసు ఇవ్వకుండా అరెస్ట్ చేశారని.. తన తప్పు ఉంటే విచారణ చేసి అరెస్ట్ చేయాల్సింది అన్నారు. తన మీద ఉన్నవి ఆరోపణలు మాత్రమేనని.. చట్టం ముందు అందరూ సమానమేనని, న్యాయాన్ని గౌరవిస్తానన్నారు.. అలాగే చంద్రబాబు చెప్పిన విషయాలను జడ్జి కూడా నోట్ చేసుకున్నారు. అలాగే జైల్లో ఎవైనా ఇబ్బందులు ఉంటే చెప్పాలన్నారు.. జైల్లో చంద్రబాబుకు కల్పిస్తున్న సౌకర్యాలపై జడ్జి నివేదిక కోరారు. 'మీరు పోలీసు కస్టడీలో లేరు.. జ్యుడీషియల్‌ కస్టడీలో ఉన్నారు. మీరు దీన్ని శిక్షగా భావించవద్దు. మీపై వచ్చినవి ఆరోపణలు మాత్రమే.. నేర నిరూపణ కాలేదు. చట్టం, నిబంధనల ప్రకారమే మీకు రిమాండ్‌ విధించాం' అని విజయవాడ ఏసీబీ స్పెషల్ కోర్టు జడ్జి చంద్రబాబుకు తెలిపారు.